ވިލިމާލެ މާރުކޭޓް ހެދި ކުންފުންޏަށް، ފައިސާ ދެއްކުމަށް މާލެސިޓީ ކައުންސިލަށް ހުކުމެއް

ވިލިމާލޭގައި ވަގުތީ ލޯކަލް މާރުކޭޓް އެޅި ކުންފުންޏަށް 150،000 ހަށްވުރެ ގިނަ ރުފިޔާ ދެއްކުމަށް ސިވިލްކޯޓުން މާލެސިޓީ ކައުންސިލްގެ މައްޗަށް މިއަދު ހުކުމްކޮށްފިއެވެ.

ވިލިމާލޭގައި ވަގުތީ ލޯކަލް މާރުކޭޓެއް އެޅުމަށް މާލެސިޓީ ކައުންސިލުން ގްލޯރިއަސް ޓްރޭޑިންގ އެންޑް ޝިޕިން ކުންފުންޏާ ހަވާލުކުރީ 2022 ވަނަ އަހަރުގެ ފެބުރުއަރީމަހުގެ ދެވަނަ ދުވަހުއެވެ. މި މަސައްކަތް އެކުންފުންޏާ ހަވާލުކުރީ 2.5 މިލިއަން ރުފިޔާގެ އަގަކަށެވެ. ގްލޯރިއަސް ކުންފުނިން މާލެސިޓީ ކައުންސިލާ ދެކޮޅަށް މައްސަލަ ހުށަހަޅާފައިވަނީ، މާރުކޭޓު ނިމި ކަނޑައެޅިފައިވާ މުއްދަތު ހަމަވުމުންވެސް އެކުންފުންޏަށް ދޭންޖެހޭ ފައިސާ އެއްކޮށްދީފައި ނުވާތީއެވެ.

ހުކުމްގައިވާގޮތުން މާލެސިޓީ ކައުންސިލުން ނުދީ ހިފެހެއްޓީ ރިޓެންޝަނަށްވާ 125،841.48 ރުފިޔާއެވެ. މި މައްސަލަ ސިވިލްކޯޓަށް ހުށަހެޅުމުން ކޯޓުން ވަނީ، ގްލޯރިއަސް ކުންފުންޏާ އެއްކޮޅަށް މައްސަލަ ނިންމާފައެވެ. ސިވިލް ކޯޓުގައި ކުރިއަށްދިޔަ މި މައްސަލާގައި މާލެސިޓީ ކައުންސިލުން ދައުވާއަށް ޖަވާބުދާރީވެފައެއްވެސް ނުވެއެވެ. އަދި މައްސަލަ ނިންމި ޝަރީއަތުގެ މަޖިލީހަށް މާލެސިޓީ ކައުންސިލްގެ ފަރާތުން ހާޒިރުވެފައެއްވެސް ނުވެއެވެ.

މި މައްސަލާގައި ސިވިލްކޯޓުން ވަނީ ގްލޯރިއަސްއަށް ދޭންޖެހޭ 125،841.48 އާއި ޝަރީއަތުގެ ހަރަދުގެ ގޮތުގައި ނަގައިދިނުމަށް އެދިފައިވާ 25،000 ރުފިޔާ، މާލެސިޓީ ކައުންސިލުން މިއަދުން ފެށިގެން 30 ދުވަހުގެ ތެރޭގައި އެ ކޯޓަށް ދައްކައި ނިންމުމަށް ހުކުމްކޮށްފައެވެ.