މިނިވަން ދުވަހާ ގުޅިގެން ހެވިކަމާއި ކުޅިވަރުގެ ހަރަކާތްތައް ކުރިއަށް ގެންގޮސްފި

މިނިވަން ދުވަހާއި ގުޅިގެން ކުރިއަށްގެންދިޔަ ހެވިކަމާއި ކުޅިވަރުގެ ހަރަކާތްތައް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ޝަރަފްވެރިކޮށްދެއްވައިފިއެވެ.

މިނިވަން ދުވަހާއި ގުޅިގެން އިންތިޒާމްކުރި ހެވިކަމާއި ކުޅިވަރު ހަރަކާތްތައް ކުރިއަށްގެންގޮސްފައިވަނީ، ޖުމްހޫރީ މައިދާން ސަރަހައްދުގައެވެ. މި ހަރަކާތްތައް ބައްލަވާލެއްވުމަށް އިންޑިޔާގެ ބޮޑު ވަޒީރު ނަރެންދުރަ މޯދީގެ އިތުރުން ސަރުކާރުގެ އިސްވެރިންނާއި، ރާއްޖޭގައި ތިއްބަވާ ބޭރުގައުމުތަކުގެ ޑިޕްލޮމެޓުން ވަނީ ޖުމްހޫރީ މައިދާން ސަރަހައްދަށް ވަޑައިގަންނަވާފައެވެ

މިއަދުގެ ހަރަކާތުގައި އެމްއެންޑީއެފްގެ އިތުރުން މާލެ ސަރަހައްދުތަކަށް ނިސްބަތްވާ ބައެއް ސްކޫލްތަކުގެ ދަރިވަރުންގެ ހަރަކާތްތައް ވަނީ ފެނިގެންގޮސްފައެވެ. މީގެ އިތުރުން ކެލާ ޔޫތްފޯރަމާއި މުލީ އެކުވެރިންގެ ދިރުމުގެ ފަރާތުންވެސް ވަނީ ސަގާފީ ހުށަހެޅުމެއް ފެނިގެންގޮސްފައެވެ.

ޖުމްހޫރީ މައިދާނުގައި ހެވިކަމާއި ކުޅިވަރުތައް ފަށާފައިވަނީ މިއަދު 16:10 އިން ފެށިގެން އިރުއޮއްސުމާ ހަމަޔަށެވެ. މި ހަރަކާތުގެ ތެރެއިން މާލޭގެ ބޮޑެތި ބައެއް މަގުތަކުގައި ވަނީ ދިވެހި އަސްކަރިއްޔާ އާއި ޤައުމީ ކެޑޭޓްކޯގެ ފަރާތުން ހިނގާލުމެއް ކުރިއަށްގެންގޮސްފައެވެ. ހިނގާލުން ކުރިއަށްގެންގޮސްފައިވަނީ، މާލޭގެ 4 ސަރަހައްދެއްގައެވެ. މި ހިނގާލުން ބަލާލުމަށް މާލޭގެ މަގުތަކަށް ވަރަށް ގިނަ އަދަދެއްގެ މީހުން ވަނީ ނިކުމެފައެވެ.

ކޮންމެ އަހަރެއްގެވެސް ޖުލައި 26 ވަނަ ދުވަސް ފާހަގަކުރަނީ ދިވެހިރާއްޖޭގެ މިނިވަންދުވަހުގެ ގޮތުގައެވެ. އެދުވަސް މިނިވަންދުވަހުގެ ގޮތުގައި ފާހަގަކުރަނީ އިނގިރޭސިންގެ ހިމާޔަތުން ރަސްމީ ސިފައެއްގައި ރާއްޖެއަށް މިނިވަންކަން ލިބުނު ދުވަހަށްވާތީއެވެ.