ރާއްޖެ އާއި އިންޑިއާއަށް ފައިދާހުރި ގޮތަށް ގުޅުން އިތުރަށް ބަދަހި ކުރަން ތައްޔާރު: ރައީސް މުޢިއްޒު

ރާއްޖެ އާއި އިންޑިއާ އާ ދެމެދު އޮތް ގުޅުން އިތުރަށް ބަދަހިކޮށް، ދެ ޤައުމަށް ފައިދާހުރި ގޮތަށް މަސައްކަތްކުރުމަށް ތައްޔާރަށް ހުންނެވި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އިންޑިއާގެ ޖުމްހޫރީ ދުވަހާ ގުޅިގެން އެ ޤައުމުގެ ރައީސް ދްރައުޕަދީ މުރުމު އަދި ބޮޑުވަޒީރު ނަރެންދްރަ މޯދީ އަށް ވަކި ވަކިން ފޮނުއްވި ސިޓީގައި ރައީސް މުޢިއްޒު ވަނީ ދިވެހި ސަރުކާރާއި ރައްޔިތުންގެ ނަމުގައި އިންޑިއާގެ ސަރުކާރާއި ރައްޔިތުންނަށް ހޫނު މަރުޙަބާއާއި ހެޔޮ އެދުންތައް އަރިސްކުރައްވާފައެވެ.

ރައީސް މުޢިއްޒު ވިދާޅުވީ ދިވެހިރާއްޖެ އާއި އިންޑިއާ އާ ދެމެދު އޮތް ގުޅުމަކީ އެކުވެރިކަމާއި، އިޙްތިރާމާއި، އެއްބައިވަންތަކަމުގެ މައްޗަށް ބިނާވެފައިވާ ގުޅުމެއް ކަމަށެވެ. އަދި މި ގުޅުމަކީ ޒަމާންތަކެއް ވަންދެން ދެމިގެން އައިސްފައިވާ ގުޅުމެއް ކަމަށްވެސް ވިދާޅުވިއެވެ.

މީގެ އިތުރުން، ދެ ޤައުމުގެ ދެމެދުގައި އޮތް އިސްތިރާޖީ ގުޅުން އިތުރަށް ހަރުދަނާކޮށް، ދެ ޤައުމަށް ކުރިމަތިވާ ގޮންޖެހުންތަކާ ކުރިމަތިލުމަށް އެކުގައި މަސައްކަތްކުރުމަށް ދިވެހިރާއްޖެ ފުރިހަމައަށް ތައްޔާރަށް ހުރި ކަމަށްވެސް ރައީސް މުޢިއްޒު ވިދާޅުވިއެވެ.

އިންޑިއާގެ ޖުމްހޫރީ ދުވަސް ފާހަގަކުރަނީ ކޮންމެ އަހަރެއްގެ ޖެނުއަރީ 26 ވަނަ ދުވަހުއެވެ. ދިވެހިރާއްޖެ އާއި އިންޑިއާ އާ ދެމެދު ޑިޕްލޮމެޓިކް ގުޅުން ޤާއިމުކުރެވުނީ 1965 ވަނަ އަހަރުގެ ޖުލައި 26 ވަނަ ދުވަހުއެވެ.

މީގެ އިތުރުން، ރައީސް މުޢިއްޒު ވަނީ އެމަނިކުފާނުގެ ރަސްމީ އެކްސް އެކައުންޓްގައި ޕޯސްޓެއް ކުރައްވައި، އިންޑިއާގެ ޖުމްހޫރީ ދުވަހުގެ މުނާސަބަތުގައި އެ ޤައުމަށް ހެޔޮ އެދުންތައް ފޮނުއްވާފައެވެ.