ކުރީގެ ޗީފް ޖަސްޓިސް މުއުތަސިމް އަދުނާނަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުވައިފި

ކުރީގެ ޗީފް ޖަސްޓިސް ރިޓަޔަޑް އަލްއުސްތާޛް އަހުމަދު މުއުތަސިމް އަދުނާނަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަރުވައިފިއެވެ.

އަހުމަދު މުއުތަސިމް އަދުނާނަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުވާފައިވަނީ މިނިވަންދުވަހުގެ ރަސްމީ ޖަލްސާގައެވެ.

އަހުމަދު މުއުތަސިމް އަދުނާނަށް މި ލަގަބް އެރުވުމަށް ރައީސުލްޖުމްހޫރިއްޔާ ކަނޑައެޅުއްވީ ރާއްޖޭގެ ޝަރުޢީ ދާއިރާއަށާއި ޤާނޫނީ ދާއިރާއަށް މީހުން ބިނާކުރެއްވުމަށާއި ޝަރުޢީ ދާއިރާގެ ކަންކަން ހަރުދަނާ ކުރެވުމަށާއި ރާއްޖޭގެ ޚާރިޖީ ދާއިރާއާ ގުޅޭ ކަންކަމުގައި ޤާނޫނީ ގޮތުން ދެއްވަންޖެހޭ ލަފާދެއްވުމަށް ޓަކައި އެރޮނގުން އެމަނިކުފާނު ކުރައްވާފައިވާ ޚިދުމަތްތަކުގެ އަގު ވަޒަންކުރުމުގެ ގޮތުންނެވެ.

އަޙްމަދު މުޢުތަސިމް އާދަނާއަކީ ޝަރުއީ ދާއިރާގެ ކަންކަން ހަރުދަނާ ކުރެއްވުމުގައި ރާއްޖޭގެ ޝަރުއީ އަދި ޤާނޫނީ ދާއިރާއަށް މީހުން ބިނާ ކުރެއްވުމަށް އަގުހުރި މަސައްކަތްތަކެއް ކުރެއްވި ބޭފުޅެކެވެ. މީގެ އިތުރުން އެ ބޭފުޅާ ވަނީ ރާއްޖޭގެ ޚާރިޖީ ދާއިރާގައި ޤާނޫނީ ލަފާ ދެއްވާ ބޭފުޅެއްގެ ގޮތުގައި ގިނަ ގުނަ ޚިދުމަތްތަކެއް ކޮށްދެއްވާފައެވެ. މުއުތަސިމް ދައުލަތަށް ހިދުމަތްކުރައްވަން ފެއްޓެވީ 1983 ވަނަ އަހަރު މިނިސްޓްރީ އޮފް ފޮރިން އެފެއާޒްގެ ސެކްރެޓަރީ ކަމުގެ މަގާމުންނެވެ. އޭގެ ފަހުން މުއުތަސިމް ވަނީ އެ މިނިސްޓްރީގެ އިނގިރޭސި ސެކްރެޓަރީ ކަމާއި އެސިސްޓެންޓް އަންޑާ ސެކެޓަރީކަމާއި، ޑެޕިއުޓީ ޑިރެކްޓަރު ކަމުގެ މަޤާމާއި ޑިރެކްޓަރ ލީގަލް އެފެއާޒް ކަމުގެ މަޤާމުގެ އިތުރުންވެސް މުހިއްމު މަގާމްތަކެއް ފުރުއްވާފައެވެ.

ނިޝާނުގެ އިއްޒަތަކީ ގައުމީ ހިދުމަތް ނުވަތަ ބައިނަލްއަގްވާމީ ހިދުމަތް ވަޒަންކުރުމުގެ ގޮތުން ދިވެހި ދައުލަތުގެ ފަރާތުން އަރުވާ އިއްޒަތެކެވެ. މި އިއްޒަތް ނިސްބަތެކުރެވެނީ، އައްސުލްތާނުލް ގާޒީ ހަސަން އިއްޒުއްދީން، ސިރީ ކުލަރަންމީބަ ކައްތިރިބަވަނަ މަހާރަދުން ނުވަތަ، ދޮންބަންޑާރައިންނަށެވެ.