އެމްޑީޕީ ޗެއާޕާސަން އިންތިޚާބު: ކެންޑިޑޭޓުންގެ ނަން ތަރުތީބު ކޮށްފި؛ ނަޝީދަށް 1، މީކާއިލް އަށް 3

ދިވެހިރާއްޖޭގެ ޑިމޮކްރެޓިކް ޕާޓީ (އެމްޑީޕީ) އިން ޗެއަރޕާސަންގެ މަގާމަށް ކުރިމަތިލި ކެނޑިޑޭޓުންގެ ނަމާއި އެ ކެނޑިޑޭޓުންގެ ނަންބަރު އިއުލާންކޮށްފިއެވެ.

އެމްޑީޕީން މި އިއުލާން ނެރެފައިވަނީ، މިއަދު އެ ޕާޓީން އެކްސްގައި ކުރި ޕޯސްޓަކުންނެވެ.

މި އަންނަ މަހުގެ 12 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއަރޕާސަން ހޮވުމުގެ އިންތިހާބުގައި އެ ޕާޓީން މައުލޫމާތު ދޭ ގޮތުގައި ޖުމްލަ 3 ކެނޑިޑޭޓަކު ވަނީ ވާދަކުރުމަށް ހުށަހަޅައި، ޕާޓީގެ ޗެއަރޕާސަން ކަމުގެ މަގާމަށް ކުރިމަތިލުމަށް ޝަރުތު ފުރިހަމަވެފައެވެ.

އެގޮތުން، މި އިންތިހާބުގައި ވާދަކުރައްވާ ކެނޑިޑޭޓުންނަކީ:

ކެންޑިޑޭޓު ނަންބަރ: 1- މުޙައްމަދު ނަޝީދު (އަންނި) ގ.ކެނެރީގެ/މާލެ

ކެންޑިޑޭޓް ނަންބަރ 2- އިބްރާހީމް މުޙައްމަދު (ވާޑު) ހުދުވިލާގެ/ލ.ފޮނަދޫ

ކެންޑިޑޭޓް ނަންބަރ 3- މީކާއީލު އަޙްމަދު ނަސީމް ގ.ބަރޯސާ/މާލެ

މި އިންތިހާބުގައި ވާދަކުރައްވާނެ ކަމަށް ކުރީގެ މަޖިލިސް މެންބަރު، އަލްހާން ފަހުމީ ވެސް ވަނީ ވިދާޅުވެފައެވެ. ނަމަވެސް، އިންސާފުވެރި އިންތިހާބެއް ނުބޭއްވޭނެ ކަމަށް ގަބޫލު ކުރައްވާތީ އަލްހާން ވަނީ އޭނާ ވާދަ ކުރަން ނިންމި ނިންމުން އަނބުރާ ގެންގޮސްފައެވެ.

އިންތިޚާބުގައި ދެން ވާދަކުރާ ވާޑު އަކީ ފޮނަދޫ ކައުންސިލް ރައީސް ކަމަށްވެސް މި ހިނގަމުންދާ ދައުރުގައި ވާދަކުރެއްވި ބޭފުޅެކެވެ. ނަމަވެސް ކާމިޔާބީއެއް ނުލިބުނެވެ.