ދެ ދުވަސްތެރޭގައި ބަޖެޓް ފާސްކޮށް، ޖެނުއަރީގައި ބަޖެޓް ތަންފީޒުކުރަން ފެށޭނެ: ނަޝީދު

ކުރިއަށް އޮތް ދެ ދުވަސްތެރޭގައި އަންނަ އަހަރަށް ލަފާކުރާ ދައުލަތުގެ ބަޖެޓު ފާސްކުރާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

2020 ވަނަ އަހަރަށް ލަފާކުރާ ދައުލަތުގެ ބަޖެޓް، ބަޖެޓް ކޮމެޓީން ދިރާސާކުރި ގޮތުގެ ރިޕޯޓު މަޖިލީހަށް ހުށަހެޅުއްވީ ބަޖެޓް ކޮމެޓީގެ މުގައްރިރު، ކިނބިދޫ ދާއިރާ މެމްބަރު އަހުމަދު ނާޝިޒުއެވެ.

ބަޖެޓް ހުށަހެޅުއްވުމުގެ ކުރިން ބަޖެޓާއި ގުޅޭގޮތުން މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަފުޅުގައި ވިދާޅުވީ، ކުރިޔަށް އޮތް ދެ ދުވަސްތެރޭގައި ބަޖެޓް ފާސްކުރެވޭނެ ކަމަށެވެ.

އެހެންކަމުން އަންނަ ޖެނުއަރީމަހުގެ ތެރޭގައި ބަޖެޓް ތަންފީޒުކުރުމުގެ މަސައްކަތްވެސް ފެށޭނެ ކަމަށް ވިދާޅުވިއެވެ.

އަންނަ އަހަރަށް ލަފާކުރާ ބަޖެޓަކީ މިހާތަނަށް ރާއްޖޭގައި ރައްޔިތުންނަށް ހިދުމަތް ދިނުމަށް ކަނޑައެޅި އެންމެ ބޮޑު ބަޖެޓެވެ. އަންނަ އަހަރުގެ ދައުލަތުގެ ބަޖެޓުގެ ގޮތުގައި ކަނޑައަޅާފައިވަނީ 37.5 ބިލިއަން ރުފިޔާއެވެ. ބައެއް މެމްބަރުންގެ ވިސްނުމުގައި އެއީ ރާއްޖެ ބަދަލުކޮށްލާނެ ވަރުގެ ބަޖެޓެކެވެ.

އަންނަ އަހަރު ދައުލަތަށް ލިބޭ އާމްދަނީ ބަހާލައިފައި ވަނީ މައިގަނޑު ފަސް ދާއިރާއަކަށެވެ. އޭގެ ތެރެއިން އެންމެ ބޮޑު އަދަދެއް ލިބެނީ ޓެކްސްގެ ގޮތުގަ އެވެ. އެއީ އާމްދަނީގެ 48 ޕަސެންޓް ނުވަތަ 17.8 ބިލިއަން ރުފިޔާ އެވެ. މީގެ އިތުރުން އާމްދަނީގެ ތެރޭގައި ހިމެނެނީ ޓެކްސް ނޫން އެހެން ގޮތްގޮތުން ލިބޭ 6.8 ބިލިއަން ރުފިޔާ އާއި ހިލޭ އެހީ އާއި އެހެނިހެން ގޮތްގޮތުން ލިބޭ 5.2 ބިލިއަން ރުފިޔާ އެވެ.

އެހެން އަހަރުތަކާ ހިލާފަށް މި އަހަރުގެ ބަޖެޓް ތައްޔާރުކޮށްފައި ވަނީ ސަރުކާރުން މިދިޔަ މަހުގެ ތެރޭގައި ނެރުނު އެކްޝަން ޕްލޭންގައިވާ ކަންކަން ތަންފީޒު ކުރުމަށް އިސްކަން ދީގެންނެވެ.

އެކްޝަން ޕްލޭންގައި ހިމެނެނީ ސަރުކާރުގެ މެނިފެސްޓޯގެ ވައުދުތަކެވެ. އެ ބައިތައް ބެހިފައި ވަނީ މައިގަނޑު ފަސް ބަޔަކަށެވެ. އޭގެ ތެރެއިން ނޫއިގްތިސާދަށް ބަޖެޓްގެ 11 ޕަސެންޓް، އޯގާތެރި ސަރުކާރަށް ބަޖެޓްގެ 33 ޕަސެންޓް، ފަޚުރުވެރި އާއިލާ އަށް 10 ޕަސެންޓް، ޖާޒީރާ ދިރިއުޅުމަށް 16 ޕަސެންޓް އަދި ހެޔޮވެރިކަމެއް ގާއިމްކުރުމަށް ބަޖެޓްގެ 30 ޕަސެންޓް ހޭދަކުރެވޭނެ އެވެ.