މޫސުން އަދިވެސް ވަރަށް ގޯސް، ހަތަރު ވަނަ ފަހަރަށް ރީނދޫ ސަމާލު ދަންމާލައިފި

ރާއްޖޭގެ ބޮޑު ސަރަހައްދަކަށް އަނެއްކާވެސް ރީނދޫ ސަމާލު ނެރެފި އެވެ.

މެޓް އޮފީހުން އަންނަނީ މިއަދު ހެނދުނުން ފެށިގެން ރާއްޖޭގެ ބޮޑު ސަރަހައްދަކަށް ރީނދޫ ސަމާލު ނެރެމުންނެވެ.

އެގޮތުން ށ އަތޮޅުން ފެށިގެން ރ އަތޮޅަށް މިއަދު ހެނދުނު 10:30 އާއި ހަމައަށް އެންމެ ފުރަތަމަ ނެރުނު އެލާޓްގެ މުއްދަތު 2:30 އާއި ހަމައަށް އެ އޮފީހުން ވަނީ ދަންމާލާފައެވެ.

އެއަށްފަހު އަނެއްކާވެސް އެ އެލާޓް 14:45 އިން ހަވީރު 17:30 އަށް މިހާރު ވަނީ ދަންމާލާފައެވެ.

މި ސަމާލުގައި ބުނެފައިވަނީ ގަޑިއަކު 25 މޭލާއި 30 މޭލާއި ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައިގަދަވާނެ ކަމަށް ލަފާ ކުރެވޭ ކަމަށެވެ.

އަދި ކަނޑުތައް ވެސް ވަރަށް ގަދަވާނެ ކަމަށް ލަފާކޮށްފައިވެއެވެ.

މި ދުވަސްވަރަކީ ރާއްޖޭގެ ހުރިހާ ހިސާބަކަށް ވެސް މޫސުން ގޯސް ދުވަސްވަރެއް ކަމުން ކަނޑު ދަތުރުފަތުރުކުރާ ފަރާތްތަކުން ޚާއްސަ ސަމާލުކަމެއް ދިނުމަށް ކަމާބެހޭ އުދާރާތަކުން އަންނަނީ އިލްތިމާސްކުރަމުންނެވެ. އަދި ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ވެސް ވަނީ އިލްތިމާސްކޮށްފައެވެ.

މީގެ އިތުރުން މިހާރު ކުރަމުންދާ ވިއްސާރައިގައި ވައިގަދަވުމުގެ ސަބަބުން ބައެއް ސަރަހައްދުތަކަށް ގެއްލުން ލިބުނު ކަމުގެ ރިޕޯޓުތައް ދަނީ ލިބެމުންދާއިރު ވިއްސާރަވެ ފެން ބޮޑުވުމުގެ ހާދިސާތައް ވެސް ދަނީ ހިނގަމުންނެވެ.

މިދިޔަ ހަފްތާގެ ހުކުރު ދުވަހު ވަނީ މިއަހަރުގެ ހުޅަނގު މޫސުން ރާއްޖޭގެ ދެކުނަށް ފެށިފައެވެ. އަދި މަސް ނިމުމުގެ ކުރިން ރާއްޖޭގެ ހުރިހާ ހިސާބަކަށް ވެސް ހުޅަނގު މޫސުން ފެށޭނެއެވެ.