ފާއިތުވި 48 ގަޑިއިރުގެ ތެރޭގައި 147 އުޅަނދު ޓޯކޮށްފި

މާލެ އަދި ހުޅުމާލޭގެ މަގުތަކުގައި އާންމު ދަތުރު ފަތުރަށާއި ހިނގާބިނގާވެ އުޅުމަށް ދަތިވާގޮތަށް ޕާކްކޮށްފައި ހުންނަ އުޅަނދުތައް ޓޯވކުރުމަށާއި މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންގެންދާ މަސައްކަތުގެ ތެރެއިން ޑިސެންބަރު 1 އަދި 2 ވަނަ ދުވަހު މާލެއާއި ހުޅުމާލެއިން ޖުމުލަ 147 އުޅަނދެއް ޓޯވ ކޮށްފައިވާކަމަށް ފުލުހުން މައުލޫމާތުދީފިއެވެ.

ފުލުހުން މިއަދު އެކްސް ގައި ހިއްސާކުރި މައުލޫމާތުތަކުގައި ވާގޮުތުން ވޭތުވެދިޔަ 48 ގަޑިއިރުގެ ތެރޭގައި ހުޅުމާލެއިން 66 ދެފުރޮޅުލީ އުޅަނދާއި، 3 ހަތަރު ފުރޮޅުލީ އުޅަނދު ހިމެނޭހެން ޖުމުލަ 69 އުޅަނދެއް ވަނީ ޓޯވ ކޮށްފައެވެ. މީގެތެރެއިން 59 ދެ ފުރޮޅުލީ އުޅަނދު ޓޯވ ކޮށްފައިވަނީ ގަވައިދާއި ހިލާފަށް ޕާކުކޮށްފައި ހުރުމުގެ ސަބަބުންނެވެ. އަދި 4 ދެ ފުރޮޅުލީ އުޅަނދާއި 1 ހަތަރު ފުރޮޅުލީ އުޅަނދު ޓޯވކޮށްފައިވަނީ ލައިސަންސް ނެތި ދުއްވުމުގެ ސަބަބުންނެވެ.

ރަޖިސްޓްރި ނަންބަރު ބަދަލުކޮށްގެން ދުއްވުމުގެ ސަބަބުން ދެ ފުރޮޅުލީ 2 އުޅަނދާއި ހަތަރު ފުރޮޅުލީ 1 އުޅަނދު، ރަޖިސްޓްރީ ނުކޮށް ދުއްވުމުގެ ސަބަބުން ހަތަރު ފުރޮޅުލީ 1 އުޅަނދު އަދި އެކްސިޑެންޓުތަކާއި އެހެނިހެން މައްސަލަތަކާއި ގުލިގެން ދެ ފުރޮޅުލީ އުޅަނދެއްވެސް ވަނީ ޓޯވ ކޮށްފައެވެ. ހުޅުމާލެއިން ޓޯވ ކުރެވުނު 69 އުޅަނދުގެ ތެރެއިން ޖޫރިމަނާ ކޮށްފައިވަނީ 19 އުޅަނދެކެވެ. އެއީ ދެ ފުރޮޅުލީ 14 އުޅަނދާއި ހަތަރު ފުރޮޅުލީ 5 އުޅަނދެވެ.

ފާއިތުވި 48 ގަޑިއިރުގެ ތެރެގައި މާލެއިން ޓޯވ ކޮށްފައިވަނީ 78 އުޅަނދެކެވެ. އެއީ ދެ ފުރޮޅުލީ 77 އުޅަނދާއި ހަތަރު ފުރޮޅުލީ 1 އުޅަނދެވެ.

އުޅަނދުތައް ޕާކުކުރާއިރު އާންމު ދަތުރު ފަތުރަށާއި ހިނގާބިނގާވެ އުޅުމަށް ދަތި ނުވާގޮތަށް ޕާކްކުރުމަށޤ ފުލުހުން އިލްތިމާޒްކުރެއެވެ.