ޤައުމީ ޔުނިވަރސިޓީން މާލެ ސަރަހައްދުގައި ޑިމެންޝިއާގެ ހާލަތާ ބެހޭ ދިރާސާއެއް ހަދަނީ

ދިވެހިރާއްޖޭގެ ޤައުމީ ޔުނިވަރސިޓީން މާލެ ސަރަހައްދަށް ހާއްސަކޮށް ޑިމެންޝިއާގެ ހާލަތާ ބެހޭ ދިރާސާއެއް ހެދުމަށް ނިންމައިފިއެވެ.

ޑިމެންޝިއާގެ ހާލަތު އޮތް ހިސާބު ބެލުމަށް ކުރިއަށްގެންދިއުމަށް ނިންމާފައިވާ މި ދިރާސާއާ ގުޅޭގޮތުން އެމްއެންޔޫއިން ބުނެފައިވަނީ، ދިރާސާ ހާއްސަ ކުރާނީ 55 އަހަރުން މަތީގެ މީހުންނަށް ކަމަށެވެ. ދިރާސާގައި އެމީހެއްގެ ހަނދާނުގައި ކަންކަން ބަހައްޓައި ދަސްކުރުމުގެ ގާބިލިއްޔަތުކަން ހުރި މިންގަނޑު ބެލުމަށް ވަނީ ހަމަޖެހިފައެވެ.

މީގެ އިތުރުން ލެބޯޓްރީ މެދުވެރިކޮށް ހަދަންޖެހޭ ޓެސްޓްތައް ހެދުމާއި، ޖެނެޓިކްގެ ސަބަބުން ބަލީގެ ހާލަތު އިތުރުވަމުންދާ މިންވަރު ވަޒަންކުރެވިގެންދާނެއެވެ.

އެމްއެންޔޫއިން މި ދިރާސާ ކުރުމަށް ނިންމާފައިވަނީ އަލްޒެއިމާސް ސޮސައިޓީ އޮފް މޯލްޑިވްސް އާ ގުޅިގެން ދަރުމަވަންތަ ހޮސްޕިޓަލުގައެވެ. މި ދިރާސާގައި އެމީހެއްގެ އިހުތިޔާރުގައި ހަމަ ކޮންމެ މީހަކަށްވެސް ބައިވެރިވުމުގެ ފުރުސަތު އޮތްކަން އެމްއެންޔޫއިން ވަނީ ބުނެފައެވެ.

އަލްޒައިމާސް ސޮސައިޓީ އޮފް މޯލްޑިވްސް އިން ވަނީ މިއަހަރުގެ ތެރޭގައިވެސް އިސްރަށްވެހިންގެ ނާދީގައި ޑިމެންޝިއާ ބައްޔާ ގުޅޭގޮތުން މީހުން އަހުލުވެރިކުރުމަށް ޕްރޮގްރާމްތައް ކުރިއަށްގެންގޮސްފައެވެ. ޑިމެންޝިއާ އަކީ އުމުރުން ދުވަސްވާ މީހުނަށް ދިމާވާ ހަނދާން ނެތުމުގެ ބައްޔަށް ކިޔާ ނަމެކެވެ. މި ބަލީގައި އާއްމު ދިރިއުޅުމަށް އުނދަގޫ ވާވަރަށް ކަންކަން ހަނދާންނެތުމާއި ނިންމުންތައް ނިންމުމަށް އުނދަގޫވެއެވެ.