ދެ ކެނޑިޑޭޓަކަށް ލިބުނު ވޯޓުގެ ޢަދަދު ކައިރިވުމަކީ އަލުން ގުނަން ޖެހޭ ސަބަބެއް ނޫން - ފުއާދު ތައުފީގު

ދެ ކެނޑިޑޭޓަކަށް ލިބުނު ވޯޓުގެ ޢަދަދު ކައިރިވުމަކީ ވޯޓު އަލުން ގުނަން ޖެހޭ ސަބަބެއް ނޫން ކަމަށް އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގު ވިދާޅުވެއްޖެ އެވެ.

ރައްޔިތުން މަޖިލީހުގެ ވިހިވަނަ އިންތިޚާބުގެ ރަސްމީ ނަތީޖާ އިޢުލާން ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ފުއާދު ވިދާޅުވީ އީސީއިން ދެކޭގޮތުގައި ވޯޓު ފޮށްޓެއް އަލުން ގުނަން ޖެހެނީ ވޯޓުލާއިރު ނުވަތަ ގުނާއިރު ޤާނޫނާ ޚިލާފު ޢަމަލެއް ހިނގައިގެން ނުވަތަ ވޯޓު ގުނުމުގެ ތެރޭގައި ޝައްކު އުފެދޭ ކަމެއް ހިނގައިގެން ކަމަށެވެ.

"ދެ ކެނޑިޑޭޓެއްގެ ވޯޓުގެ ޢަދަދު ކައިރުވުމަކީ ފަހަރެއްގައިވެސް އަޅުގަނޑުމެން ދެކޭގޮތުގަ ގުނަން ޖެހޭ ސަބަބެއް ނޫން. އަޅުގަނޑުމެން ދެކޭ ގޮތުގަ ގުނަން ޖެހެނީ ވޯޓުލާއިރު ނުވަތަ ވޯޓު ގުނާއިރު ޤާނޫނާ ޚިލާފު ނުވަތަ ގަވާއިދާ ޚިލާފު އެއްވެސް ކަމެއް އޭގެ ތެރޭގެ ހިނގާފަވާކަމަށް ވަންޏާ. ނޫނިއްޔާ ގުނުމުގެ ތެރޭގަ ޝައްކުވާފަދަ ކަމެއް ވެގެން އެވަގުތު ޝަކުވާ ހުށަހަޅާފައިވާކަމަށް ވަންޏާ."

ފުއާދު ތައުފީޤު ވިދާޅުވިއެވެ.

މަޖިލީހުގެ އިންތިޚާބުގައި އެންމެ ކުޑަ ތަފާތެއް ފެނިފައިވަނީ ދުވާފަރު ދާއިރާއިންުނެވެ. އެ ދާއިރާއަށް ވާދަކުރެއްވި ޕީއެންސީގެ ކެނޑިޑޭޓު މުޙައްމަދު ޢަލީ 1،074 ވޯޓާއެކު އިންތިޚާބު ކާމިޔާބު ކުރެއްވި އިރު އެ ދާއިރާއަށް ވާދަކުރެއްވި މިނިވަން ކެނޑިޑޭޓު އިބްރާހީމް އަބްދުއްރަޙްމާން ވަނީ 1،070 ވޯޓު ހޯދައްވާފައެވެ. ދުވާފަރު ދާއުރާއަށް ޖުމުލަ 41 ބާޠޮލް 41 ވޯޓު ވެސް ލައިފައިވުމާއެކު އިބްރާހިމް އަބްދުއްރަހްމާންގެ މަންދޫބުން ވަނީ، ދާއިރާގެ ހުރިހާ ވޯޓު ފޮށްޓެއް އަލުން ގުނައިދޭން އެދި ޝަކުވާ ހުށަހަޅާފަ އެވެ. ނަމަވެސް އީސީއިން ނިންމީ އަލުން ގުނަން ޖެހޭ ފަދަ ސަބަބެއް ނެތް ކަމަށެވެ.

ނިމިގެންދިޔަ މަޖިލިސް އިންތިޚާބަކީ މިދިޔަ ރިޔާސީ އިންތިޚާބެކޭ އެއްފަދައިން މިހާތަނަށް ބޭއްވުނު އެންމެ ކާމިޔާބު މަޖިލިސް އިންތިޚާބު ކަމަށްވެސް ވެސް މިއަދު ވާހަކަ ދައްކަވަމުން ފުއާދު ވިދާޅުވި އެވެ.

"މަދު ޢަދަދެއްގެ ޝަކުވާތަކެއް އަޅުގަނޑުމެންނަށް ލިބުނު. އެހެންނަމަވެސް އޭގެތެރޭގަ އަޅުގަނޑުމެން އަލުން ގުނަންޖެހޭފަދަ ނޫނީ ސީރިޔަސް އެއްވެސް މައްސަލައެއް ނެތް. އެހެންވީމަ އަޅުގަނޑުމެންގެ ނަތީޖާ މިއަދު މި އިޢުލާނު ކުރަނީ މިހާތަނަށް ލިބިފަ ހުރި ހުރިހާ ޝަކުވާތަކަކަށްވެސް ބެލުމަށް ފަހުގަ."

ފުއާދު ވިދާޅުވިއެވެ.

އިންތިޚާބުގެ ކަންކަން ކާމިޔާބުކަމާއި އަމާންކަމާއެކު ކުރިއަށް ގެންދިޔުމުގައި ރައްޔިތުން ދެއްވި އެއްބާރުލުމަށް ފުއާދު ތައުފީޤު ޝުކުރު ދެންނެވިއެވެ.