ނޮވެންބަރު މަހު ރާއްޖެއަށް 2 ލައްކައެއްހާ ފަތުރުވެރިން

މި އަހަރުގެ ނޮވެންބަރ މަހު ރާއްޖެއަށް 2 ލައްކައެއްހާ ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ތިމާވެއްޓާއި ބެހޭ ވުޒާރާގެ ތަފާސްހިސާބުތައް ދައްކާގޮތުން މިއަހަރުގެ ނޮވެންބަރ މަހު ރާއްޖެއަށް 195،127 ފަތުރުވެރިން ވަނީ ޒިޔާރަތްކޮށްފައެވެ. މިއީ މިއަހަރުގެ އޮކްޓޫބަރުމަހު ރާއްޖެއަށް ޒިޔާރަތްކޮށްފައިވާ 190,445 ފަތުރުވެރިންނާއަޅާ ބަލާއިރު %2.4 އިތުރު އަދަދެކެވެ. އަދި މިދިޔަ އަހަރުގެ ނޮވެންބަރ މަހާއި އަޅާބަލާއިރު %12 އިތުރު އަދަދެކެވެ.

މިނިސްޓްރީގެ ތަފާސްހިސާބުތައް ދައްކާގޮތުގައި މިއަހަރުގެ ނޮވެންބަރު މަހުގެ ނިޔަލަށް ރާއްޖެއަށް 2،022،061 ފަތުރުވެރިން ވަނީ ޒިޔާރަތްކޮށްފައެވެ. މިދިޔަ އަހަރުގެ ނޮވެންބަރ މަހުގެ ނިޔަލަށް ރާއްޖެ އައިސްފައިވަނީ 1،837،635 ފަތުރުވެރިންނެވެ. އެހެންކަމުން މިއީ މިދިޔަ އަހަރުގެ މި މުއްދަތާއި އަޅާބަލާއިރު %10 އިތުރު އަދަދެކެވެ.

ރާއްޖެއަށް 2 މިލިއަން ވަނަ ފަތުރުވެރިޔާ އައިސްފައިވަނީ ނޮވެންބަރުމަހުގެ 27 ވަނަ ދުވަހެވެ. ރާއްޖެެއަށް 2 މިލިއަން ފަތުރުވެރިން ފުރަތަމަ ފަހަރަށް އައިސްފައިވަނީ މިދިޔަ އަހަރުގެ ޑިސެންބަރު 26 ވަނަ ދުވަހުއެވެ. އެހެންކަމުން މިއަހަރު 2 މިލިޔަން ފަތުރުވެރިން ހަމަވީ މިދިޔަ އަހަރާއި އަޅާބަލާއިރު 1 މަސްދުވަހު ކުރިންނެވެ.

އަހަރުގެ މިހާތަނަށް އެންމެ ގިނަ ފަތުރުވެރިން ޒިޔާރަތްކުރި 5 ޤައުމު:

* ޗައިނާ: 312،478 ފަތުރުވެރިން

* ރަޝިއާ: 253،834 ފަތުރުވެރިން

* އިނގިރޭސިވިލާތް: 181،300 ފަތުރުވެރިން

* ޖަރުމަނުވިލާތް: 152،739 ފަތުރުވެރިން

* އިޓަލީވިލާތް: 132،004 ފަތުރުވެރިން

ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުގައި ރާއްޖެއަށް މިހާރު އެވްރެޖްކޮށް ދުވާލެއްގެ މައްޗަށް 6000 އަށްވުރެ ގިނަ ފަތުރުވެރިން ޒިޔާރަތްކުރެއެވެ. އަދި ސަރުކާރުން ވަނީ ދެން ކުރިއަށް އޮތް އަހަރުތަކުގައި ދެ މިލިއަން އަށް ވުރެ ގިނަ ފަތުރުވެރިން ރާއްޖެ އަންނާނެކަމަށް ލަފާކުރެވޭ ކަމަށް ވިދާޅުވެފައެވެ.