ފެބްރުއަރީ މަހަކީ ރާއްޖޭގެ ސިޔާސީ ލީޑަރުންނަށް ނުރައްކާތެރި މަހެއް!

ދިވެހިރާއްޖޭގައި މަލްޓި ޕާޓީ ޑިމޮކްރަސީ ތައާރަފްވިތާ ގާތްގަނޑަކަށް ވާނީ 14 ވަރަކަށް އަހަރެވެ. އެހެންކަމުން އެ ނިޒާމަކީ ޅަފަތުގައި އޮތް ނިޒާމެކޭ ބުނުން ވަނީ ހެދޭ ދޮގަކަށެވެ. ރާއްޖޭގެ ޑިމޮކްރަސީއަކީ ޒުވާން ފައްތަރަށް އަޅާފައިވާ ނިޒާމެކޭ ބުނެލަމާތޯއެވެ. މިވޭތުވެދިޔަ 14 ވަރަކަށް އަހަރުގެ ތެރޭގައި ރާއްޖޭގެ ޑިމޮކްރަސީގެ ހަޔާތުގައި ވަނީ އެކި ހާދިސާތައް ހިނގާފައެވެ.

އޭގެ ތެރެއިން ބައެއް ހާދިސާތަކަކީ ތާރީޚުގައި ރަން އަކުރުން އެއްބަޔަކު ފަވާނެ ހާދިސާތަކެވެ. އަނެއް ހާދިސާތަކަކީ ތާރީޚުގައި ކަޅު އަކުރުން ފަވާނެ ހާދިސާތަކެވެ. ހާދިސާ ލިޔާނެ ކުލަވަރު އާންމުގޮތެއްގައި ބިނާވެގެންވަނީ ތިމާގެ ސިޔާސީ ފިކުރާއި ނަޒަރިއްޔާތުގެ މައްޗަށެވެ. ކޮންމެ ކުލަޔަކުން ހާދިސާތައް ލިޔުނަސް، ފެބްރުއަރީ މަހަކީ ދިވެހި ސިޔާސީ ތާރީޚުގައި ފާހަގަކޮށްލެވޭ ފަދަ ހާދިސާތަކެއް ހިނގާފައިވާ މަހެކެވެ.

އެހެންކަމުން ފަހުގެ ތާރީޚުގައި މިމަހުގައި ހިނގި ބައެއް ހާދިސާތައް ބަލާލަމާ ހެއްޔެވެ؟

7-8 ފެބްރުއަރީ 2012:

7 ފެބްރުއަރީ އެއްބަޔަކަށް ގައުމީ ބަތަލުންތަކެއް ނުކުމެ، ވަތަނާއި ދެކޮޅު ސަރުކާރެއް ވައްޓާލި ނަސްރުގެ ދުވަހެކެވެ. އަނެއްބައި މީހުންނަށް އެއީ ޑިމޮކްރަސީ ފުނޑުފުނޑުވެގެންދިޔަ ހިތާމައިގެ ދުވަހެކެވެ. ކޮންމެ ނަޒަރަކުން ބެލިކަމުގައިިވިޔަސް، 2012ވަަނަ އަހަރުގެ ފެބްރުއަރީ މަހުގެ ހަތްވަަނަ ދުވަހު ޖުމްހޫރީ މައިދާން ސަރަހައްދުގައި ސިފައިންނާއި ފުލުހުން ހިންގި ކުރިމަތިލުމާއި މަސްރަހު ހޫނުވެގެން ގޮސް އިސްތިއުފާ ދެއްވުމަށް އޭރުގެ ރައީސް މުހައްމަދު ނަޝީދަށް މަޖުބޫރުވެގެންދިޔަ ހާދިސާއަކީ އޭގެ ކުރިން ދިވެހި ތާރީޚުގައި ފެނިފައި ނުވާފަދަ މަންޒަރެކެވެ.

އެއަށްފަހު އޭގެ އޭގެ އަނެއްދުވަހު އެމްޑީޕީގެ ސަފުތައް އަލުން ރުކުރުވާލުމަށްފަހު މަގުމައްޗަށް ނުކުތުުމުން ސިފައިންނާއި ފުލުހުންގެ އޮފިސަރުން އެމްޑީޕީގެ އިސްވެރިންނާއި އެކްޓިވިސްޓުންނަށް "ޖަޒުބާތުގައި" ޖެހިގެން ދެވުނު އަނިޔާއަކީ ދިވެހިންގެ ތެރެއިން ގިނަބަޔެއްގެ ހިތުން އަދިވެސް ނުފިލާނެ ފަދަ ހާދިސާއެކެވެ.

ހަމަ އެގޮތަށް 8 ފެބްރުއަރީ ވެގެންދިޔައީ އެމްޑީޕީގެ އެކްޓިވިސްޓުން ނިކުމެ ޤައުމަށް އިތުރު ބޮޑު ހުޅެއްގެނުވި ދުވަހަކަށެވެ.

ނަމަވެސް ތަގުދީރުގައި ކަންެއޮތްގޮތް ބައްލަވާށެވެ. އޭރު ރައީސް ނަޝީދާއި އެމަނިކުފާނުގެ ސަރުކާރާއި ދެކޮޅަށް ނުުކުތް ގިނަ ފަރާތްތައް މިއަދު އެތިބީ އެމަނިކުފާނާއި ކޮނޑާއި ކޮނޑު ޖައްސަވައިގެންނެވެ. ސިޔާސީ ކަންތައްތައް ދެން އޮންނާނީ މިފަދަ އުސޫލަކުން ނޫންތޯއެވެ؟

22 ފެބްރުއަރީ 2015:

ކުރީގެ ރައީސް މުހައްމަދު ނަޝީދުގެ ސަރުކާރު ވައްޓާލަންޖެހުމުގެ ހުއްޖަތެއްގެ ގޮތުގައި ގިނަ ފަރާތްތަކުން ދައްކާފައި ވަނީ ކްރިމިނަލް ކޯޓުގެ އޭރުގެ އިސްގާޒީ އަބްދުﷲ މުހައްމަދު ހައްޔަރުކުރުމެވެ.

އެ މައްސަލައިގެ ދައުވާ ހުޅުމާލޭ މެޖިސްޓްރޭޓް ކޯޓުގައި އުފުލުމަށްފަހު މައްސަލަ ދިރާސާކުރުމަށް ކަމަށްބުނެ ޕީޖީން މައްސަަލަ އަނބުރާ ގެންދިޔައެވެ.

ނަމަވެސް 2015ވަނަ އަހަރުގެ ފެބްރުއަރީމަހުގެ 22ވަނަ ދުވަހުގެ މެންދުރުފަސް ވެގެންދިޔައީ އެ މައްސަލަ އަލުން އެނބުރި އައުމަށެވެ. އެ މައްސަލައިގައި އެމަނިކުފާނު ހައްޔަރުކުރެވި، ޝަރީއަތް ނިމެންދެން ބަންދުގައި ބެހެއްޓުނެވެ. އޭރު އިދިކޮޅު ފަރާތްތަކުން ދިޔައީ އޭރުގެ ރައީސް އަބްދުﷲ ޔާމީންގެ ސަރުކާރާއި ދެކޮޅަށް މުޒާހަރާއެއްވެސް ރާއްވަވަމުންނެވެ.

އެދުވަހު ރައީސް ނަޝީދު އެމަނިކުފާނުގެ އަނބިކަނބަލުންގެ ގެކޮޅުން ގެންދަން ފުލުހުން ޖެހުނީވެސް ވަރަށް ހާލުންނެވެ. ފުލުހުންގެ ވެހިކަލް ވަށާލައި އެމްޑީީޕީގެ ސަޕޯޓަރުން ތިބުމުން ފުލުހުން އެންމެފަހުން ޖެހުނީ ގަދަބާރުން އެމީހުން އެތަނުން ދުރުކުރާށެވެ.

އެއަށްފަހު އެދުވަހުގެ ހަވީރު، އެމަނިކުފާނު ކޯޓަށް ހާޒިރުކުރި ވަގުތު ހިނގައިދިޔަ ކަންކަމާއި، ޝަރީއަތް ނިމެންދެން ބަންދުގައި ބެހެއްޓުމަށް މުއްދަތު ޖެހުމާއި އެކު އެ ދުވަސްވެސް ވަނީ ދިވެހި ސިޔާސީ ތާރީޚުގައި ފެބްރުއަރީ މަސް ޚާއްސަ ކޮށްދީފައެވެ.

1 ފެބްރުއަަރީ 2018:

ކުރީގެ ރައީސް އަބްދުﷲ ޔާމީންގެ ވެރިކަމުގެ ދައުރުގައި އެމަނިކުފާނަށް ދައުލަތުގެ ތެރެއިންނާއި ބޭރުން ޗެލެންޖްތަކާއި ކުރިމަތިލައްވަން ޖެހިވަޑައިގެންފައިވެއެވެ. ނަމަވެސް 2018 ވަނަ އަހަރުގެ ފެބްރުއަރީ މަހުގެ ފުރަތަމަ ދުވަހުގެ ރޭ ސުޕްރީމް ކޯޓުން ނެރުނު އަމުރު ވެގެންދިޔައީ އެމަނިކުފާނަށް ކުރިމަތިވި ބޮޑު އިމްތިހާނަކަށެވެ.

އިދިކޮޅަށް ތިއްބެވި ހުރިހާ ސިޔާސީވެރިން ދޫކޮށްލުމަށް އެރޭ ކޯޓުން އަމުރުކުރުމާއި އެކު މުޅި ރާއްޖެ ކެކިއުުުތުރި އަރައިގެންދިޔައެވެ. މިގޮތުން ބައެއް ފަރާތްތަކުން އެރޭ އުފަލުން ކަރުނަވެސް އަޅައި ހެދިއެވެ. ނަމަވެސް އާޚިރުގައި ކުޅިބައި މޮޅަށް ކުޅުއްވީ ރައިސް ޔާމީންއެވެ. ވެެރިކަމުގެ ދައުރުގައި ދެވަނަ ފަހަރަށް ކުއްލި ހާލަތު އިއުލާންކުރައްވާ، ސަރުކާރު ވައްޓާލަން އުޅުނުކަމުގެ ތުހުމަތުގައި އެއްބަފާ ބޭބޭފުޅާއި، އުއްތަމަ ފަނޑިޔާރު ފަަދަ ފަރާތްތައް ހައްޔަރުކުރެއްވިއެވެ.

ކަންވެގެން ނިމުނުއިރު އެ އަމުރުވެސް ބާތިލްކުރީ ހަމަ އެ އަމުރު ނެރުނު އަމުރު ނެރުނު ކޯޓުންނެވެ. އެ އަމުރު ނެރުނީ އިދިކޮޅުން ކޯޓަށް ރިޝްވަތުވެސް ދީގެންނެވެ .

18 ފެބްރުއަރީ 2019:

2018ވަނަ އަހަރުގެ ފެބްރުއަރީ މަހު ސުޕްރީމް ކޯޓުން ނެރުނު އާދަޔާ ޚިލާފު އަމުރަށްފަހު ރައީސް ޔާމީން ބަލިވުމުގެ ސިލްސިލާ ފެށުނީކަމަށް ގިނަ ފަރާތްތަކުން އޭރު ބުންޏެވެ. ކަންވީވެސް އެހެންނެވެ. އެ އަހަރުގެ ރިޔާސީ އިންތިޚާބުގައި އެމަނިކުފާނު ބޮޑު ތަފާތަކުން ބަލިވެ ވަޑައިގެންނެވީއެވެ.

ދިވެހި ހަރުބަހެއްގައި އޮވެއެވެ. ތިމާ ފޭހުނު އިލޮށި ހެރޭނީ ތިމާގެ ލޮަލަށެވެ. ކުރީގެ ރައީސް އަބްދުﷲ ޔާމީންއަށްވެސް ވީ އެބީދައިންނެވެ. އެމަނިކުފާނުގެ ސަރުކާރުން ސީދާ އަންގަވައިގެން ޝަރުއީ ނިޒާމުން ރައީސް ނަޝީދަށް ޖެއްސެވިކަމަށް އިދިކޮޅު ފަރާތްތަކުން ބުނާ، ޝަރީއަތް ނިމެންދެން ބަންދުގައި ބެހެއްޓުމުގެ އަމުުރު އެމަނިކުފާނުގެ މައްޗަށްވެސް އައީއެވެ.

އިއްޔެގެ ޝަރީއަތުގެ މަޖިލީހުން ރައީސް ޔާމީންގެ މައްޗަށް އެ އަމުރު އައީ ހެއްކެއްގެ ހެކިބަސް ބަދަލު ކުރަން އުޅުނުކަމަށް ތުހުމަތުކޮށެވެ.

އަދި ފައިނޭންޝަލް އިންޓެލިޖެންސް ޔުނިޓް، އެފްއައިޔޫއިން ފުލުހުންނަށް ހުށަހެޅި އެސްޓީއާރްއާ ގުޅިގެން ވެސް ނުފޫޒު ފޯރުވައި އެ މައްސަލަ ކުރިއަށް ނުގެންގޮސް ބޭއްވުމަށް ރައީސް ޔާމީން މަސައްކަތް ކުރެއްވި ކަން އެނގޭނެ ސިއްރު ލިޔުމެއް ވެސް ޕީޖީއިން އިއްޔެ ވަނީ ހުށަހަޅާފައެވެ.

އެއާއި އެކު އެމަނިކުފާނު މިއަދު ހުންނެވީ މާފުށި ޖަލުގެ ތޭރިތަކުގެ ފަހަތުގައެވެ.

2012 ވަނަ އަހަރުގެ ފެބްރުއަރީ މަހު ހިނގިކަމަކާއި ގުޅިގެން އެކި އަހަރުތަކުގެ ފެބްރުއަރީ މަހު ހިނގި ހާދިސާތަކަށް ބަލަމާތޯއެވެ. އެއް ހާދިސާ އަނެއް ހާދިސާއާއި ކިތަންމެހާވެސް ގުޅެއެވެ. އިހުގެ ހަތުރުން އަދުގެ މިތުރުންނަށެވެ. އިހުގެ އަނެކާގެ ހާލަތު އަދުގެ ތިމާގެ ހާލަަތަށެވެ.