ބައިނަލްއަގުވާމީ ގުރުއާން މުބާރާތަކުން ދިވެހި ދަރިވަރަކަށް ތިން ވަނަ ލިބިއްޖެ

މެލޭޝިއާގައި ބޭއްވި ބައިނަލްއަޤްވާމީ ޤުރުއާން މުބާރާތުގައި ރާއްޖެ ތަމްސީލްކުރި ދިވެހި ދަރިވަރަކު 3 ވަނަ ހާސިލްކޮށްފިއެވެ.

މި މުބާރާތުގައި ރާއްޖެ ތަމްސީލުކުރި، ފާޠިމަތު ޝާޔާ ޒާހިރު 3 ވަނަ ހާސިލްކޮށްފައިވަނީ މެލޭޝިއާގެ ވެރިރަށް ކުއަލަލަމްޕޫރުގައި ބޭއްވި 64 ވަނަ "މެލޭޝިއަން އިންޓަނޭޝަނަލް އަލްގުރްއާން ރިސައިޓޭޝަން އެންޑް މެމޮރައިޒޭޝަން އެސެމްބްލީ" (އެމްޓީއެޗްކިއުއޭ) މުބާރާތުންނެވެ.

ޖުމްލަ 52 ގައުމަކުން 76 ބައިވެރިންނާއިއެކު، މި މަހުގެ 5 އިން 12 އަށް ކުރިއަށްގެންދިޔަ މި މުބާރާތުން ޝާޔާއަށް 3 ވަނަ ލިބުނީ ހިފްޒު ބައިންނެވެ.

ޝާޔާގެ މި ކާމިޔާބީ އާއި ގުޅިގެން ޝާޔާ އަށް މަރުހަބާ ވިދާޅުވަމުން، އިސްލާމީ ކަންތައްތަކާއި ބެހޭ ވަޒީރު، ޑރ.މުޙައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރާއްޖެއަށް ލިބުނު ފަޚުރެއް ކަމަށެވެ.

މިދިޔަ އަހަރުގެ އޭޕްރީލްގައި މިސްރުގައި ބޭއްވި ގުރުއާން މުބާރާތަކުން 2ވަނަ ހޯދާފައިވާ ޝާޔާ އަކީ މި އަހަރު ބޭއްވި ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތުން ހާފިޒުންގެ ބައިން އެއް ވަނަ ހާސިލްކޮށްފައިވާ ފަރާތެއްކަން ފާހަގަކޮށްލަން ޖެހެއެވެ.