ހައްގު މަގުގައި ސާބިތުވެ ހުރުމަށް، ރަނގަޅު މީހުންނާއެކު އުޅުމަކީ އެންމެ މުހިންމު އެއް ކަންތައް: ޝެއިޚް ސަމީރު

ހައްގު މަގުގައި ސާބިތުވެ ހުރުމަށް، ރަނގަޅު މީހުންނާއެކު އުޅުމަކީ އެންމެ މުހިންމު އެއް ކަންތައްކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝައިޚް އަހުމަދު ސަމީރު ރޭ ވިދާޅުވެއްޖެއެވެ.

ރަމަޟާންމަހުގެ ރޭތައް އިޙްޔާކުރުމަށް ސިލްސިލާކޮށް ބާއްވަމުންދާ ފޯރަމްތަކުގެ ތެރެއިން މާލޭގައި ބޭއްވި 3 ވަނަ ފޯރަމްގައި ވާހަކަދައްކަވަމުން ޝެއިޚް ސަމީރު ވިދާޅުވީ، ރަސޫލާ ﷺ ގެ ހަދީޘް ބަސްފުޅުން، ”މީހާ ވަނީ އޭނާގެ އެކުވެރިޔާގެ ދީނުގައި “ ކަން އެނގޭ ކަމަށެވެ. އެހެންކަމުން ހެޔޮ މީހުންނާއެކު އުޅެ ހެޔޮ މަޖިލިސްތަކަށް އައި ހެދުމަކީ މުހިންމު ކަމެއްކަން ޝެއިޚް ފާހަގަކުރެއްވިއެވެ.

ހައްގު މަގުގައި ސާބިތުވެ ހުރުމަށް، ރަނގަޅު މީހުންނާއެކު އުޅުމަކީ އެންމެ މުހިންމު އެއް ކަންތައް… އަޅުގަނޑުމެންގެ ތެރޭގައި އުޅޭނެ ރާއްޖޭގައި ދީނީ ނަސޭޙަތް ދޭކަން ނޭނގޭ މީހުންވެސް. މި ރާއްޖޭގައި ހެޔޮ ކަމުގެ ކަންކަން ހިނގާކަން މާ ބޮޑަށް ސަމާލުކަން ނުދޭ މީހުންވެސް އުޅޭނެ. އަނެއް ބަޔަކު ހަމަ، އިސްލާމިކް މިނިސްޓްރީގެ ހުރިހާ ޓުވިޓާ އެކައުންޓާ ފޭސްބުކު ފޮލޯކޮށް، ދަރުސްތަކާއެއްޗެހި ޓިކްކޮށް، ގޭގައި ހިއްޕައިގެން، ވޯލްޑްކަޕް ބަލާހެން ދަރުސް ތަކަށް އަންނަ މީހުންވެސް އުޅޭނެ

ޝެއިޚް އަހުމަދު ސަމީރު

ކަންމިހެން ހުރުމުން، ހެޔޮ މީހުންނާއެކު ހެޔޮ މަޖިލިސް ތަކަށް އައުމުގެ ފުރުސަތު ލިބުމަކީ ވަރަށް ބޮޑު ނިޢުމަތެއް ކަމުގައި ޝެއިޚް ވިދާޅުވުއެވެ. އެހެންކަމުން އެކަމަށްޓަކައި މާތް الله އަށް ޝުކުރުވެރިވާންޖެހޭ ކަމަށް ވިދާޅުވިއެވެ.

ޚާއްސަކޮށް ޒުވާނުން ވިޔާނުދާ ފަސާދަކުރާ މީހުންނާއެކުގައި އެމީހުންނަށް މަޖިލިސް ކުރާ ކަމުގައި ވަނީނަމަ، ހަދީޘްގައި އޮންނަ ފަދައިން، އެކުވެރިޔާގެ މިސާލަކީ ގިރުނބާ ދަމާ މީހަކާ އަތަރުވިއްކާ މީހާގެ މިސާލޭ. ގިރުނބާ ދަމާ މީހާ ކައިރީ އިންނަންޏާ އޭނާ ގައިން ނުބައި ވަސް ދުވާނެ. ހެދުންވެސް ހެދުމުގައި ކަނި އައިސް ޖެހި ހެދުން ވިރި، އޭނާގެ ފަރާތުން ނެތް ހެވެއް. އެކަމަކު އަތަރު ވިއްކާ މީހާ ކައިރިން އޭނާ އެއްޗެއް ގަނެވެސްދާނެ. ނޫނީ ހަދުޔާއަކަށްވެސް ދީ ފާނެ. ނޫނީ އެއްޗެއް ނުގަތަސް ހަދިޔާއެއް ނުދިނަސް އޭނާ އެތާ އިންނަންޏާ އޭނާ ގައިން މީރުވަސް ދުވާނެ.

ޝެއިޚް އަހުމަދު ސަމީރު

އެހެންކަމުން ހެޔޮ މަޖިލިސް ތަކަށް އައުމުގެ ތައުފީޤް ދެއްވުމަކީ ވަރަށް ބޮޑު ނިޢުމަތެއް ކަމުގައި ޝެއިޚް ވިދާޅުވިއެވެ.

މީގެ އިތުރުން ޝެއިޚް ވިދާޅުވީ، އިސްލާމްކަން މަތީގައި އަބަދުވެސް ދެމިތިބޭތޯ ދުޢާކުރަންޖެހޭކަމަށެވެ.

އެހެނީ އިސްލާމް ދީނާމެދު އެކިއެކި ޝުބުހާތައް ފަތުރާއިރު ގިނަގިނައިން ދުޢާކުރަންވީ މި ނިޢުމަތުގެ މަތީގައި ސާބިތުވެ ދެމިތިބޭތޯކަމަށް ކަމަށާ ހިތަކީ ވަރަށް އަވަހަށް ފުރޮޅޭ އެއްޗެއްކަމަށެވެ. އެހެންކަމުން، އަހަރެމެންގެ ހިތް އިސްލާމް ދީނުގެ މަތީގައި ދަމަހައްޓަވާ ސާބިތުކަން ދެއްވުމަށް އެދި ދުޢާކުރަންޖެހޭކަމަށެވެ.

"ހިތަށް މި ނަން ދެވިފައިވަނީވެސް ހިތަކީ އެކިއެކި އޮއިވަރުތަކާއެކު ފުރޮޅޭ އެއްޗެއްކަމަށްވާތީ. ކިހާވަރަކަށް މި ހިތް ފުރޮޅޭތީދޯ ނަބިއްޔާ ސ.އ.ވ އެ ހިތް ސިފަކުރައްވާފައިވަނީ ސަހަރާއެއްގެ ތެރޭގައި ހުންނަ ގަހެއްގައި އެލުވިފައި އިންނަ ފަތެއްގެ ސިފައިގައި. ދޫނި ފަތެއް ފަދަ އެއްޗެއްގެ ގޮތެއްގައި. އެޖެހޭ ވަޔާއެކު އެފުށް މިފުށަށް އެނބުރޭ އެއްޗެއްގެ ގޮތުގައި. ކިހާ ނާޒުކު އެއްޗެއްތޯ މިއީ." ޝެއިޚް ވިދާޅުވިއެވެ.