މުދައްރިސުންގެ ހިދުމަތް، މާއްދީ އެއްވެސް އެއްޗަކުން އަގެއް ނުކުރެވޭނެ: ރައީސް

މުދައްރިސުން ކޮށްދެއްވަމުންގެންދަވާ ހިދުމަތްތަކަކީ، މާއްދީ އެއްވެސް އެޗަކުން އަގު ނުކުރެވޭނެ ހިދުމަތެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިއަދު ފާހަގަކުރަމުންދާ ޓީޗަރުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް ޑރ.މުއިއްޒު ވިދާޅުވީ،  މުދައްރިސުންގެ ބުރަ މަސައްކަތާއި ހިންމަތަކީ ދުނިޔެއާއި އާޚިރަތުގެ މަންފާ އޭގައި އެކުލެވިފައިވާ، މާއްދީ އެއްވެސް އެއްޗަކުން އަގުނުކުރެވޭނެ، ޤަދަރުވެރި، ފަޚުރުވެރި ޚިދުމަތެއްކަމަށެވެ.

މި ޤައުމުގެ ދިދަ މާދަމާ އުފުލާނެ ޢަޒުމު ވަރުގަދަ، ހިތްވަރު ހުރި، މޮޅުކުދީން މިއަދު އެތިބީ މަދަރުސާތަކުގައިކަން ފާހަގަކުރައްވަމުން ރައީސް ވިދާޅުވީ ދިވެހީން އެދޭފަދަ ހަރުދަނާ ޖީލެއްގެ ގޮތުގައި އެކުދީން ތަރުބިއްޔަތުވާނީ މުދައްރިސުން މިއަދު ދިން އިރުޝާދަކާއި ތަޢުލީމަކާއި އޯގާތެރިކަމަކުން ކަމަށެވެ. އަދި ހަމަ އެހެންމެ އުޖާލާ ކުރިމަގެއް ރާއްޖެއަށް ހޯދައިދިނުމުގެ އެންމެ ބޮޑު ދައުރަކާއި ބާރެއް އޮތީ މުދައްރިސުންގެ އަތްމަތީގައި ކަމަށްވެސް ރައީސް ފާހަގަކުރެއްވިއެވެ.

ރައީސްގެ ޕޯސްޓްގައި ވަނީ ދިވެހިރާއްޖޭގެ ތަޢުލީމީ ދާއިރާގައި މަސައްކަތްކުރައްވާ ހުރިހާ އެދުރުންނަށް ކުރިއެރުމާއި ފަހިކަން ހޯދައިދިނުމަށް ސަރުކާރުން ޚާއްޞަ ސަމާލުކަމެއް ދޭކަމުގެ ޔަގީންކަން އަރުވާފައެވެ.

އެކްސްގައި ކުރެއްވި ޕޯސްޓްގައި ރައީސް ވަނީ މިއަދު ފާހަގަކުރަމުންދާ ޓީޗަރުންގެ ދުވަހުގެ އުފާވެރި ދުވަހުގެ ތަހުނިޔާ މުދައްރިސުންނަށް އަރިސްކުރައްވާފައެވެ.

ކޮންމެ އަހަރެއްގެވެސް އޮކްޓޯބަރުމަހުގެ 5 ވަނަ ދުވަސް ފާހަގަކުރަނީ ޓީޗަރުންގެ ދުވަހުގެ ގޮތުގައެވެ. ޓީޗަރުންގެ ދުވަސް މިއަދު ފާހަގަކުރަމުންދާއިރު، މިއަދު ރާއްޖޭގެ ތައުލީމީ ދާއިރާއަށް ކުރިމަތިވެފައި އޮތް އެންމެބޮޑު ގޮންޖެހުމަކީ މުދައްރިސުން ލިބުމުގެ ދަތިކަމެވެ. މިކަމަށް ހައްލެއް ގެނައުމުގެ ގޮތުން ސަރުކާރުން ވަނީ 2024 ވަނަ އަހަރު މުދައްރިސުން ތަމުރީނުކުރުމުގެ ގައުމީ ޕްރޮގްރާމެއް ފައްޓަވާފައެވެ.

ރާއްޖޭގައި ކިޔަވައިދޭ މުދައްރިސުންނަކީ ދިވެހިންނަށް ހެދުމަށްޓަކައި ޤައުމީ ފެންވަރުގެ ޕްރޮގްރާމެއް ހިންގައި ކުރިއަށްގެންދިއުމަކީ މި ސަރުކާރުގެ މިނިފެސްޓޯގައި ހިމެނޭ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ.