ޕީޕީއެމްގެ ސަރުކާރެއްގައި އެންމެ އިސްކަން ދޭނެ ސިނާއަތަކީ މަސްވެރިކަން: ރައީސް ޔާމީން

ޕީޕީއެމްއަށް ވެރިކަން ކުރުމަށް އިތުރު ފުރުސަތެއް ރައްޔިތުން ދީފިނަމަ އެންމެ އިސްކަމެއް ދޭނެ ސިނާއަތަކަށް މަސްވެރިކަން ހައްދާނެ ކަމަށް އެޕާޓީގެ ރައީސް އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު އެހެން ވިދާޅުވީ، ޕީޕީއެމްއާއި، ޕީއެންސީން މ އަތޮޅަށާ، ފ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން، މ.ދިއްގަރަށް ވަޑައިގެން، އެރަށުގެ ރައްޔިތުންނާ ބައްދަލު ކުރައްވާ ދެއްކެވި ވާހަކައިގައެވެ.

ރައީސް ޔާމީން ވިދާޅުވީ މަސްވެރިންގެ ގިނަ ކަންބޮޑުވުންތަކެއް އެބަހުރި ކަމަށެވެ. އަދި ކަންބޮޑުވުންތަކުގެ ތެރޭގައި އެމަނިކުފާނުގެ ވެރިކަމުގައިވެސް ނުކުރެވި ހުރި ބައެއް ކަންކަން ހިމެނޭކަން ފާހަގަކުރައްވައި ވިދާޅުވީ، ޕީޕީއެމްގެ ސަރުކާރެއްގައި އެންމެ އިސްކަމެއް ދޭނެ ދެކަމުގެ ތެރެއިން އެއް ކަމަކީ މަސްވެރިކަން ކަމަށެވެ.

" އިިރާދަކުރެއްވިއްޔާ އަޅުގަނޑުމެން އެންމެ އިސްކަން ދޭ ދެކަމުގެ ތެރެއިން އެއްކަމުގެ ގޮތުގައި މަސްވެރިކަން ހިމަނާނަން. އަނެއްކަމަކީ ޒުވާނުންނަށް ވަޒީފާގެ ފުރުސަތު ފަހިކޮށްދިނުން." ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، މިހާރު އަތޮޅުތެރެއަށް އިދިކޮޅުން ކުރަމުން އަންނަ ދަތުރަކީ، މީގެ ކުރިން، ޕީޕީއެމްގެ ވެރިކަމުގައި ކޮށްދިން ކަންކަން، ނުވަތަ ހިންގި މަޝްރޫއުތަކުގެ ހާލަތު ބަލަން ކުރައްވާ ދަތުރުތަކެއް ކަމަށެެވެ.

އަދި މި ސަރުކާރުން، 24 ގަޑިއިރު ކަރަންޓް ދޭނެ ކަމަށް ވައުދުވިއިރު، މ އަތޮޅަށް ކުރައްވަމުންގެންދަވާ ދަތުރުފުޅުންވެސް، އެއަތޮޅުގައި 24 ގަޑިއިރު ކަރަންޓު ޔަގީން ވެފައިނުވާކަން އެނގިވަޑައިގެންނެވި ކަަމަށް ވިދާޅުވިއެވެ.