މިދިޔަ އަހަރު ނިމުނުއިރު ރަސްމީ ރިޒާވް ހުރީ 712 މިލިއަން ޑޮލަރުގައި: ގަވަރުނަރު

2018 ވަނަ އަހަރު ނިމުނުއިރު ރަސްމީ ރިޒާވްގައި 712 މިލިއަން ޑޮލަރު ހުރިކަމަށް ގަވަރުނަރު އަހުމަދު ނަސީރު ވިދާޅުވެއްޖެއެވެ.

އެމްއެމްއޭގެ 38 ވަނަ އަހަރީ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމިއްޔާތުގައި ވާހަކަ ދައްކަވަމުން އަހުމަދު ނަސީރު ވިދާޅުވީ 2018 ވަނަ އަހަރު ރާއްޖޭގެ މާލީ ދާއިރާ އޮތީ ވަރަށް ހަރުދަނާކޮށް ކަމަށެވެ.

އެގޮތުން ބޭންކިން އަދި އެނޫންވެސް ދާއިރާތަކުގެ ފައިނޭންޝިންގް ރޭޝިއޯތަކާއި އެސެޓްސްތަކުގެ ފެންވަރު ރަގަޅުވެ، އަދި ރައުސްމާލުގެ ފުއްދުންތެރިކަން ވަރުގަދަކުރެވިފައިވާކަމަށް ވިދާޅުވިއެވެ.

ނަސީރު ވިދާޅުވީ އެމިންގަނޑު ހުރީ ޖުމްލަ އެސެޓްސްގެ ނިސްބަތުން ރައުސްމާލު މަދުވެގެން ހުންނަންޖެހޭ ކަމަށް އެމްއެމްއޭއިން ކަނޑައަޅާފައިވާ މިންވަރަށްވުރެވެސް މަތީގައި ހިފެހެއްޓިފައި ކަމަށެވެ.

އެގޮތުން 2018 ވަނަ އަހަރު ނިމުނުއިރު ދައުލަތުގެ ރަސްމީ ރިޒާވުގައި 712 މިލިއަން ޑޮލަރު ހުރިކަމަށާއި މިއަދަދަކީ އޭގެ ކުރީ އަަހަރާ އަޅާބަލާއިރު 21 އިންސައްތައިގެ ކުރިއެރުމެއް ކަމަށްވެސް އޭނާ ވިދާޅުވިއެވެ.

މީގެއިތުރުން ނަސީރު ވިދާޅުވީ އަދި އެމްއެމްއޭ އަކީ ރައްޔިތުން އިތުބާރުކުރާ، އަދި ނަޒާހަތްތެރި މުއައްސަސާއެއްގެ ގޮތުގައި އޮންނަން ޖެހޭ އިދާރާއެއް ކަމަށާއި ޝަރުއީ ދާއިރާގެ ކަންކަން އިސްލާހުކުރުމަށް މަސައްކަތްކުރާ ގޮތަށް، މާލީ ދާއިރާ އާ ގުޅުންހުރި އިސްލާހުތަކަށްވެސް ހާއްސަ އިސްކަމެއް ދިނުމަކީ ވަރަށް ބޮޑަށް އެދޭ ކަމެއް ކަމަށް ވިދާޅުވިއެވެ.

އެމްއެމްއޭގެ އެތެރޭގެ ހިންގުން ހަރުދަނާ ކުރުމާއި ބެހޭ ގޮތުންވެސް މިބައްދަލުވުމުގައި ނަސީރު ވާހަކަދެއްކެވިއެވެ. އެގޮތުން، އޮތޯރިޓީގެ އެތެރޭގެ ހިންގުމަށް ގެންނަންޖެހޭ މުހިއްމު ބޮޑެތި ބަދަލުތައް ގެންނަމުންދާކަމަށާއި ރައްޔިތުންގެ އިތުބާރު ވަރުގަދަ ކުރުމަށްޓަކައި އަޅަންޖެހޭ ވަރަށް ގިނަ ފިޔަވަޅުތައް މިހާރު އަޅަމުންދާކަމަށް ނަސީރު ވިދާޅުވިއެވެ.

ނަސީރު ވިދާޅުވީ 21 ވަނަ ގަރުނުގައި ބަވަނަވަމުންދާ ދުނިޔޭގައި މާލީ ދާއިރާއަށް އަންނަ ތަރައްގީއަށް އަހުލުވެރިވުމަށް އެމްއެމްއޭއިން ވެސް މަސައްކަތްކުރަމުންދާ ކަމަށެވެ.

އަދި އެމްއެމްއޭގެ ޒަމާނީ ވިސްނުން ހުރީ ޑިޖިޓަލް ކަރަންސީ އާ ދިމާލަށް ކަމަށާއި އެހެންކަމުން އެމްއެމްއޭގެ ވެސް އަމާޒަކީ ޓެކްނޮލަޖީ ގޮތުން ކުރިއެރުންތައް ހޯދާ އިންގީލާބީ އަދި އީޖާދީ ބަދަލުތައް އެދާއިރާއަށް ގެނައުން ކަމަށް ނަސީރު ވިދާޅުވިއެވެ.

އެހެންކަމުން އެންމެ އިސްކަމެއްދީގެން ކުރިއަށްގެންދާ އެއް މަޝްރޫއަކީ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓް، ކަމަށާއި އެ މަޝްރޫއުގެ ތެރެއިން ރާއްޖޭގެ ފައިސާގެ މުއާމަލާތްތައްކުރުމުގައި ނަގުދު ފައިސާއަށް ބަރޯސާނުވެ އެންމެ ޒަމާނީ ފެންވަރުގައި ޑިޖިޓަލްކޮށް ބޭނުންކުރުމުގެ މަގު ފަހި ވެގެން ދާނެ ކަމަށްވެސް ވިދާޅުވިއެވެ.