ޓީޗަރުންގެ މުސާރައިގެ އޮނިގަނޑަށް ހުށަހަޅަންޖެހޭ އިސްލާހުތައް މި ދަނީ ބަލަމުން: ވަޒީރު ޝަފީއު

ޓީޗަރުންގެ މުސާރައިގެ އޮނިގަނޑަށް އެންމެ ފަހުން ގެނެސްފައިވާ ބަދަލުތަކުގެ ތެރެއިން، ޝަކުވާ ބޮޑުވި ކަންކަމުގައި އިސްލާހު ގެންނަން ޖެހޭތޯ ބަލަމުންދާކަމަށް ތައުލީމާއި ބެހޭ ވަޒީރު ޑރ. އިސްމާއިލް ޝަފީއު ވިދާޅުވެއްޖެ އެވެ.

"މިހާރު" ނޫހަށް ދެއްވި ބަސްދީގަތުމެއްގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، ދައުލަތުގެ ޕޭހަމަނައިޒޭޝަންގެ ވަކި ޕޮލިސީއެއް އޮތްއިރު، އެ އެލަވަންސްތައް މިހާރު ތައާރަފް ކުރަނީ ޕޭ ކޮމިޝަންގެ ތެރެއިން ކަމަށެވެ.

ކުރީގެ ސަރުކާރުން ހެލްތު ދާއިރާގެ މުސާރަތައް ބޮޑުކުރުމުން އެލަވަންސްތައް ލިބުމުގައި އެ ދާއިރާގައި ވެސް ގޮންޖެހުންތައް ހުރިކަން ފާހަގަކުރައްވަމުން ވަޒީރު ޝަފީއު ވިދާޅުވީ، މިހާރު މި އޮތް ޕޭ ފްރޭމްވޯކަށް ހުށަހަޅަން ޖެހޭ އިސްލާހުތައް ބަލަމުންދާ ކަމަށެވެ.

"މިހާރު މި އޮތް ޕޭ ފްރޭމްވޯކަށް އަޅުގަނޑުމެން މިހާރު މި ދަނީ ބަލަމުން ކޮން ކަހަލަ ބަދަލުތަކެއްތޯ، އިސްލާހުތަކެއްތޯ ހުށަހަޅަން ޖެހޭނީ. ކޮން ކަހަލަ ބަދަލުތަކެއްތޯ ގެންނަން ޖެހޭނީ."

ވަޒީރު ޝަފީއު ވިދާޅުވިއެވެ.

ކުއްލިއަކަށް އެފަދަ ބަދަލެއް ގެނެސްފި ނަމަ ދެމެހެއްޓެނިވި ގޮތެއްގައި އެކަން ހިނގަމުން ނުދާނެ ކަމަށާއި، ބަދަލެއް ގެންނާނީ އޮނިގަނޑު މުރާޖައާކޮށްފައި ކަމަށް ވަޒީރު ވިދާޅުވިއެވެ.

ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކޮށް، މުސާރައިގެ އޮނިގަނޑަށް ބަދަލު ގެނައުމަށް  މޭ 1، 2022 ގައި ނިންމީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައެވެ. އެ ބަދަލާއިއެކު ޓިީޗަރުންގެ މުސާރަ ބޮޑުވި ނަމަވެސް އެލަވަންސްތައް އުނިވުމުން ޝަކުވާ ބޮޑުވި އެވެ.

އޭގެ ތެރެއިން އެންމެ ބޮޑު އެއް ކަންބޮޑުވުމަކަށް އޮތީ، ރަށްރަށަށް ބަދަލުވާ ޓީޗަރުންނާއި ޕްރިންސިޕަލުންނަށް ލިބެމުން ދިޔަ އެލަވަންސް އުނިވުންކަން ފާހަގަކޮށްލެވެއެވެ.