ހައިލެވެލް ކޯ ގްރޫޕްގެ ތިންވަނަ ބައްދަލުވުން ބާއްވައިފި؛ އިތުރު ބައްދަލުވުމެއް އިންޑިޔާގައި ބާއްވަން ނިންމައިފި!

ދިވެހިރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމަށްޓަކައި ކުރަންޖެހޭ މަޝްވަރާތައް ކުރުމަށް ދެގައުމުގެ މަތީ ފަންތީގެ ބޭފުޅުން ހިމެނޭހެން އުފައްދާފައިވާ ހައިލެވެލް ކޯ ގްރޫޕްގެ ތިންވަނަ ބައްދަލުވުން އިއްޔެ ރާއްޖޭގައި ބާއްވައިފިއެވެ. އެ ބައްދަލުވުން ކުރިއަށް ގެންގޮސްފައިވަނީ ދިވެހިރާއްޖޭގެ ޚާރިޖީ ވުޒާރާގައެވެ.

އެ ބައްދަލުވުމާއި ގުޅިގެން ފޮރިން މިނިސްޓްރީން އިއްޔެ ނެރުނު ނޫސްބަޔާނެއްގައި ބުނެފައިވަނީ އެ ކޯ ގްރޫޕުގެ ބައްދަލުވުމުގައި އިންޑިއާ ސިފައިން ރާއްޖެއިން ބޭލުމަށް ފަހު ޑޯނިއާ މަތިންދާބޯޓާއި ހެކިލޮޕްޓަރުތައް ދުއްވަން އިންޑިއާގެ މަދަނީ މީހުންނާ ހަވާލުކުރުމުގައި ދެގައުމަށް ހޯދިފައިވާ ކުރިއެރުމާ ބެހޭގޮތުން ވާހަކަ ދައްކާފައިވާކަމަށެވެ.

އަދި މިހާރު އިންޑިޔާ ސިފައިން ތިބި ދެ ޕްލެޓްފޯމުން އަންނަ މެއި މަހުގެ 10 ވަނަ ދުވަހުގެ ކުރިން ސިފައިން ބާލާ މަދަނީ މީހުން ގެންނާނެކަމަށްވެސް އެ މިނިސްޓްރީން ބުނެފައިވެއެވެ.

މި ބައްދަލުވުމާއި ގުޅިގެން އިންޑިއާގެ އެކްސްޓާނަލް މިނިސްޓްރީން އާއްމުކުރި ނޫސް ބަޔާނެއްގައިވާގޮތުން އެ ބައްދަލުވުމުގައި ރާއްޖެއަށް އިންސާނީ އެހީ ފޯރުކޮށްދިނުމަށް، މަދަނީ މީހުންނާއެކު ހެލިކޮޕްޓަރުތައް އޮޕަރޭޓް ކުރުމާއި ގުޅޭ ގޮތުން ދެ ގައުމުގެ މެދުގައި މަޝްވަރާތަކެއް ކޮށްފައިވެއެވެ.

ހަމަ އެހެންމެ، ދެގައުމުގެ ރައްޔިތުންގެ މެދުގައި ގުޅުން ބަދަހި ކުރުމާއި، އަދި ދެގައުމުގެ ދެމެދުގައި އެކި ރޮނގު ރޮނގުން ގުޅުން ބަދަހިކުރުމާ ބެހޭ ގޮތުން ފުޅާ ދާއިރާއެއްގައި މަޝްވަރާތަކެއް ކުރިއަށް ގެންގޮސްފައިވާ ކަމަށްވެސް އެ ބަޔާނުގައި ބުންޏެވެ.

އެގޮތުން، އިންޑިއާއިން ރާއްޖޭގައި ހިންގާ މަޝްރޫއުތައް ހިންގުން އަވަސްކުރުމާއި، ދެގައުމުގެ ދެމެދުގައި ވިޔަފާރީގެ ދާއިރާ އާއި އިންވެސްޓްމަންޓްތައް އިތުރުކުރުމަށް ކުރެވޭނެ ގޮތްތަކުގެ އިތުރުން ދެ ގައުމުގެ ދެމެދުގައި ގާބިލުކަން އިތުރުކުރުމަށްވެސް މަޝްވަރާކޮށްފައިވާ ކަމަށް ބުނެފައިވެއެވެ.

ރާއްޖެއާއި އިންޑިޔާއިންވެސް ނެރުނު ބަޔާނުގައި ކޯ ގުރޫޕުގެ އިތުރު ބައްދަލުވުމެއް ދެ ގައުމުން އެއްބަސްވާ ތާރީޚެއްގައި، ނިޔުދިއްލީގައި ބާއްވަން މަޝްވަރާ ކޮށްފައިވާ ކަމަށް ބުނެފައިވެއެވެ.