ޗައިނާގެ ޒިއަމަން އެއަރގެ ފުރަތަމަ ފުލައިޓް މިއަދު ރާއްޖެ އަތުވެއްޖެ

ޗައިނާގެ ޒިއަމަން އެއަރގެ ފުރަތަމަ ފުލައިޓް ޗައިނާގެ ފުޖިއަން ޕްރޮވިންސްއިން މިއަދު ރާއްޖެ އަތުވެއްޖެއެވެ.

ޒިއަމަން އެއަރގެ ފުރަތަމަ ފުލައިޓް މިއަދު އިބުރާހިމް ނާސިރު އިންޓަނޭޝަނަލް އެއާރޕޯޓްގައި ޖެއްސުމާއިއެކު އޭގެން ދަތުރުކުރި ފަރާތްތަކަށް ވަނީ ސަގާފީ ބޮޑުބެރާ އެކު ވަރަށް ހޫނު މަރުހަބާ އެއް ކިޔާފައެވެ.

މިފުލައިޓް މިއަދު ހެދުނު އެއާރޕޯޓަށް ޖެއްސިއިރު ޗައިނާއިން ރާއްޖެއަށް ކަނޑައަޅައިފައިވާ ސަފީރު، ވާންގް ލީޝިން އަދި ސަރުކާރުގެ ކަމާއިބެހޭ ވުޒާރާތަކުގެ ވެރިން ވަނީ މި ފްލައިޓްގައި ރާއްޖެ އައި ފަތުރުވެރިންނަށް މަރުހަބާ ދެންނެވުމަށްޓަކައި އެއާރޕޯޓަށް ވަޑައި ގަންނަވާފައެވެ.

އެމް.އެމް.ޕީ.އާރު.ސީގެ މެނޭޖިންގ ޑިރެކްޓަރު ފާތުމަތު ތަޢުފީޤު ވިދާޅުވީ ގޮތުގައި މީ ފެށުމެއް ކަމަށާއި، ކުރިއަށް އޮތްތަނުގައި ވެސް ޗައިނާގެ އާ އެއާލައިންތަކުން ރާއްޖެއަށް ދަތުރު ފެށުމަށް މަސައްކަތް ކުރަމުންދާ ކަމަށެވެ. މިވަގުތު ބެއިޖިން ކެޕިޓަލް އެއާލައިނާއި ޗައިނާ އީސްޓާން އާއި ޝީޒުއާން އެއާލައިނުން ވެސް އަންނަނީ ޗައިނާ އާއި ރާއްޖެއާ ދެމެދު ސީދާ ދަތުރު ކުރަމުންނެވެ.

އޭގެ އިތުރުން މެނޭޖިންގ ޑިރެކްޓަރު ފާތުމަތު ތަޢުފީޤު ފާހަގަ ކުރެއްވި ގޮތުގައި ހޮންގްކޮންގް އެއާލައިންސްއިން ރާއްޖެއަށް މިއަހަރުގެ ޖެނުއަރީ މަހު ފެށި ސިދާ ދަތުރުތަކުގެ ސަބަބުން ޗައިނާއިން ރާއްޖެއަށް އަންނަ ފަތުރުވެރިންގެ އަދަދު ވަނީ އިތުރު ވެފައެވެ.

މިގޮތުން ޗައިނާއިން ޒިޔާރަތްކުރާ ފަތުރުވެރިންގެ އަދަދު ވަރަށް ބޮޑަށް އިތުރުވެ،އެންމެފަހުގެ ތަފާސް ހިސާބުތައް ދައްކާ ގޮތުން ޗައިނާ ވެފައި ވަނީ ރާއްޖެއަށް އެންމެ ގިނަ ފަތުރުވެރިން އަންނަ ގައުމަށެވެ. މީގެ ކުރިން ރާއްޖެއަށް އެންމެ ގިނަ ފަތުރުވެރިން އަންނަމުން ދިޔަ އިންޑިއާ ވަނީ މި ލިސްޓުގެ 5 ވަނައަށް ވެއްޓިފައެވެ.

ވޭތުވެދިޔަ އަހަރު ރާއްޖެއަށް 1.8 މިލިއަން ފަތުރުވެރިން ޒިޔާރަތްކޮށްފައިވާއިރު މިއަހަރުގެ އަމާޒަކީ 2 މިލިއަން ފަތުރުވެރިން ގެނައުން ކަމަށް ސަރުކާރުން ވިދާޅުވެއެވެ. އަދި ފަރުރުވެރިކަމާއި ބެހޭ ވުޒާރާއިން އަމާޒު ހިފާފައި ވަނީ 2.3 މިލިއަން ފަތުރުވެރިން ރާއްޖެއަށް ގެނައުމަށް ކަމަށް އެ ވުޒާރާއިން ހާމަކުރައްވައެވެ.