އަދުރޭ ޕީޕީއެމް ހައިޖެކްކޮށްފައިވާ ކަމަށްބުނެ ޒާހިދު ރަމީޒް ޕާޓީން ވަކިވެއްޖެ

ޕީއެންސީގެ ވަގުތީ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރ އަބްދުއްރަހީމް އަބްދުﷲ، ޕީޕީއެމްއާއި ޕީއެންސީ ހައިޖެކްކޮށްފައިވާކަމަށްބުނެ މަޝްހޫރު ވިޔަފާރިވެރިޔާ  އަދި ޕީޕީއެމްގެ ކައުންސިލް މެންބަރ ޒާހިދު ރަމީޒް، ޕީޕީއެމްއިން ވަކިވެއްޖެއެވެ.

މީގެ ކުރިން ހިތަދޫ މެދު ދާއިރާއަށް ވާދަކުރުމަށް ޕީޕީއެމްގެ ޓިކެޓު ދީފައިވާ ޒާހިދު ރަމީޒު، ރައީސް ޔާމީންއަށް އެޑްރެސްކޮށް ފޮނުވި ސިޓީއެއްގައި ވަނީ ޕާޓީ ގަޑުބަޑުވެފައިވާކަމުގެ ބޮޑެތި ތުހުމަތުތަކެއްކޮށްފައެވެ.

އެގޮތުން ރައީސް ޔާމީން ޖަލަށް ގެންދިޔަ ދަނޑިވަޅު ބަލައި، ޕީއެންސީގެ ވަގުތީ ރައީސް އަބްދުއްރަހީމް އަބްދުﷲ (އަދުރޭ) އާއި އޭނާ ކޮންޓްރޯލްކުރާ މަދު ބަޔަކު ވަނީ އަމިއްލަ މަސްލަހަތު އިސްކޮށް ޕީޕީއެމްއާއި ޕީއެންސީ ހައިޖެކްކޮށް، އެކި ގޮތްގޮތުން ދެ ޕާޓީ ގަޑުބަޑުކޮށްފައި ކަމަށް ޒާހިދު ވަނީ ފާހަގަކޮށްފައެވެ.

އަދި އެތައް ބަޔެއްގެ ތާއިދު ހޯދާފައި ވަނިކޮށް އެ ދާއިރާގެ ޓިކެޓް، އެންމެ މަތިން ނީލަންކީ ފަރާތަކަށް ވިއްކާލާފައިވާކަމަށް ޒާހިދު ވަނީ ބުނެފައެވެ.

"ޕާޓީ ހައިޖެކު ކޮށްގެން ތިބި ލޫޓަރުން، އެވެރިންނަށް މަންފާ ވާގޮތަށް، ޓިކެޓް ބަހާ، އެމަނިކުފާނުގެ (ރައީސް ޔާމީންގެ) ދާއިދު ސާފުކޮށް ދެއްވާފައިވާ އަޅިގަނޑު ފަދަ ކެނޑިޑޭޓުންގެ ހައްގުތައް ނަގާލާ ފައިސާގެ ދަހިވެތިކަމުގައި މަހުޖަނަކަށް ވިކި ހުސްވާ މަންޒަރު ދެކެން މަނިކުފާނު ނެތުމަކީ ފަހަރުގައި ހެޔޮ ރަހުމަތަކަށްވެސް ވެދާނެއެވެ."، އިސްތިއުފާގެ ސިޓީގައި ޒާހިދު ރަމީޒް ބުނެފައިވެއެވެ.

ޕްރޮގްރެސިވް ކޯލިޝަނުން ވަނީ ޒާހިދު ރަމީޒްގެ ބަދަލުގައި ހިތަދޫ މެދު ދާއިރާާއަށް ޖޭޕީން ވާދަކުރާާ ފަރާތަށް ތާއިދުކުރުމަށް ނިންމާފައެވެ. މި އިންތިޚާބުގައި ޒާހިދު ރަމީޒް ވާދަކުރަނީ އަމިއްލަ ގޮތުންނެވެ.