ރައީސް ޔާމީންގެ އެއާޕޯޓު އެޅުމުގެ ސިޔާސަތަށް ތާއީދު ކުރަން- ފައްޔާޒު

ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ހިންގެވި އެންމެ ރަނގަޅު އެއް މަޝްރޫއުއަކީ އެއާޕޯޓު އެޅުމުގެ މަޝްރޫއު ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުހީ ޕްރޮގްރާމްގައި ރޭ ވާހަކަ ދައްކަވަމުން މިނިސްޓަރު ވިދާޅުވީ، ރައީސް ޔާމީންގެ ވެރިކަމުގައި އެމަނިކުފާނު ކުރެއްވި ކޮންމެ ކަމަކީ "ގޯސް" ކަމެއް ކަމުގައި މިއަދުގެ ސަރުކާރުން ނުދެކޭ ކަމަށެވެ.

"ރައީސް ޔާމީންގެ ސިޔާސަތުތަކުގެ ތެރެއިން ހަމަ އަޅުގަނޑު ތާއީދު ކުރި އެއް ސިޔާސަތެއް 20 މިނެޓުން އެއާޕޯޓެއް އޮތުން އެއީ." މިނިސްޓަރު ވިދާޅުވިއެވެ.

ފައްޔާޒު އިތުރަށް ވިދާޅުވީ އެއާޕޯޓުގެ ސިޔާސަތަކީ ކަމުދާ ސިޔާސަތެއް ނަމަވެސް، އެކަމާ ގަބޫލު ނޫން ރައްޔިތުންތަކެއްވެސް ތިބި ކަމަށެވެ. އެގޮތުން ތިމާވެއްޓަށް ގެއްލުން ލިބޭނެތީ ގިނަ އެއާޕޯޓުތަކެއް އަޅަން ގިނަ ރައްޔިތުން ނުރުހޭ ކަމަށް ވިދާޅުވިއެވެ.

މިނިސްޓަރުގެ ވާހަކައިގައި ވަނީ ކޮންމެ 20 މިނެޓަކުން ދަތުރުކޮށްލާފައި، އެއާޕޯޓަކަށް ދެވޭ ގޮތަށް ރާއްޖޭގައި އެއާޕޯޓު އެޅުމުގެ ފައިދާތަކަށްވެސް އަލިއަޅުއްވާލައްވާފައެވެ.

އެގޮތުން، އެކަމުގެ ސަބަބުން ބަލި މީހުންނަށް ގިނަ ލުއިތަކެއް ލިބިގެންދާނެ ކަމަށާއި، ފަތުރުވެރިންނަށްވެސް ގިނަ ފަސޭހަތަކެއް ލިބޭނެ ކަމަށް ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ އޭރު އިދިކޮޅުގައި ތިބި ފަރާތްތަށް ރައީސް ޔާމީނާ ދެކޮޅަށް ނުކުތީ އަނިޔާވެރިކަމާ ކޮރަޕްޝަންގެ އަމަލުތަކާ ގުޅިގެން ނޭވާ ނުލެވޭ ހިސާބަށް ކަންކަން ދިޔުމުން ކަމަށެވެ.

ރައީސް ޔާމީންގެ ބައެއް ސިޔާސަތުތަކަށް ތައުރީފު ކުރައްވައި ވާހަކަ ދައްކަވަމުން މިނިސްޓަރު ވިދާޅުވީ އުމްރާނީ ތަރައްގީގެ ގިނަ މަޝްރޫއުތަކެއް ރައީސް ޔާމީން ހިންގެވި ކަމަށެެވެ. އެހެންނަމަވެސް އެމަނިކުފާނު އެކަންކަން ކުރެއްވި ގޮތް ކަމުނުދާ ކަމަށް ވިދާޅުވިއެވެ. އެގޮތުން ބައެއް މަޝްރޫއުތައް ހިންގީ ބޮޑު އަގުގައިކަން ފާހަގަކުރެއްވިއެވެ.

މީގެ އިތުރުން މިނިސްޓަރު ވިދާޅުވީ ރައީސް ޔާމީންގެ ސަރުކާރުން ފެއްޓެވި މަޝްރޫއުތަކުގެ ތެރެއިން އެއާޕޯޓު އެޅުމުގެ މަޝްރޫއަކީ ރަނގަޅު ކަމެއް ކަމަށެވެ. އެގޮތުން އެކަމުގެ ފައިދާތަކަށް މިނިސްޓަރުގެ ވާހަކައިގައި އަލިއަޅުއްވައިލެއްވިއެވެ.

މިނިސްޓަރު ފައްޔާޒު/ ފޮޓޯ: ވަންއޮންލައިން