މާލޭ ސިޓީކައުންސިލުން އަލްހާންއަށް މަސްވެރިންގެ ޕާކު ދޫކުރަން ދެކޮޅުހަދައިފި
ހެންވޭރު އުތުރު ދާއިރާއަށް ޖޭޕީގެ ޓިކެޓްގައި ވާދަކުރައްވާ އަލްހާން ފަހުމީގެ ކެމްޕެއިން ހަފްލާއެއް ބޭއްވުމަށް މަސްވެރިންގެ ޕާކް ދޫކުރުމަށް ސިޓީކައުންސިލުން ދެކޮޅު ހަދައިފިއެވެ.
އަލްހާންގެ ކެމްޕެއިން ޓީމުން ވޮއިސްއަށް މައުލޫމާތު ދެމުން ބުނީ ހ.ތެމާގެ މުހައްމަދު ޝިފާއު އިސްވެ ހުންނަވާ "އެއްބަޔަކު އަނެއްބަޔަކަށް" ނަމުގައި ބާއްވަން އުޅުނު ޖާފަތް ހަފްލާއަށް ހުއްދަނުދީ މާލެ ސިޓީ ކައުންސިލުން ހުއްޓުވާފައިވާކަމަށެވެ.
އެޓީމުން ބުނީ މަސްވެރިންގެ ޕާކުގައި ހަފްލާ ބޭއްވުމުގެ ހުއްދަ ނުދީ ހިފަހައްޓާފައިވަނީ އެތަނަކީ ސިޓީ ކައުންސިލްގެ ބެލުމުގެ ދަށުގައި އޮވެ، ތަރައްގީ ކުރުމުގެ މަސައްކަތްތަކެއް ކުރަމުންދާ ތަނަކަށް ވާތީކަމަށް ބުނެފައިވާކަމަށެވެ.
ނަމަވެސް އަލްހާންގެ ކެމްޕެއިން ޓީމުގެ ފަރާތުން މާލެ ސިޓީގެ ޑެޕިއުޓީ މޭޔަރ ޝަމާއު ޝަރީފަށް ގުޅާލުމުން ޝަމާއު ވަނީ އެތަނަކީ ސިޓީ ކައުންސިލްގެ ބެލުމުގެ ދަށުގައި އޮންނަ ތަނެއް ނޫންކަމަށާއި، ޕްލޭނިންގ މިނިސްޓްރީ ބެލުމުގެ ދަށުގައިވާތަނެއްކަމަށް ވިދާޅުވެފައިކަމަށް އަލްހާން ޓީމުން ވޮއިސްއަށް ކިޔާދިނެވެ.
ނަމަވެސް ސިޓީ ކައުންސިލުން އެތަން ތަރައްގީ ކުރުމުގެ މަޝްރޫއުއަކަށް ގާޑިޔާތައް ހުސްކުރުމަށް ނޯޓިސްދީފައިވާކަން ފާހަގަކޮށްލެވެއެވެ.
ޕްލޭނިންގ މިނިސްޓްރީއަށް ވޮއިސްއިން ގުޅާލުމުން ބުނެފައިވަނީ މަސްވެރިންގެ ޕާކަކީ އެ މިނިސްޓްރީގެ ތަނެއް ނޫންކަމަށް ވިދާޅުވެފައެވެ. އަދި މިއީ ސިޓީ ކައުންސިލްގެ ބެލުމުގެ ދަށުގައިވާ ތަނެއްކަމަށް ވަނީ ބުނެފައެވެ.
އެއާއެކު ޝަމާއުއަށް އަލްހާންގެ ކެމްޕެއިން ޓީމްގެ ފަރާތުން ގުޅުމުން ޝަމާއު އިތުރަށްވަނީ އެތަނުގެ މައުލޫމާތު އޮޅުން ފިލުވުމަށް މާލެ ސިޓީގެ މޭޔަރ ޝިފާއަށް ގުޅުމަށް އެދިފައެވެ. ނަަމަވެސް ޝިފާ އެފަރާތުގެ ފޯނަށް ޖަވާބު ނުދެއްވާކަމަށް އެޓީމުން ވޮއިސްއަށް ވަނީ މައުލޫމާތުދީފައެވެ.
މިކަމަކީ ސީދާ އަލްހާންގެ ކެމްޕެއިނަށް ހުރަސް އެޅުމަށް ސިޓީ ކައުންސިލުން ކުރި ދަށު ދަރަޖައިގެ އަމަލެއްކަމަށް އަލްހާންގެ ކެމްޕެއިން ޓީމުން ވަނީ ބުނެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
