ރޯލިން ޓޮބޭކޯ ޝިޕްމަންޓް ދޫކޮށްލީ ޤާނޫނުން އެތަކެތި އެތެރެކުރުން މަނާ ނުކުރާތީ: ކަސްޓަމްސް

ރޯލިން ޓޮބޭކޯ ޝިޕްމަންޓެއް ކަސްޓަމްސްއިން ދޫކޮށްލީ ޤާނޫނުން އެތަކެތި އެތެރެކުރުން މަނާ ނުކުރާތީކަމަށް އެ އިދާރާއިން ބުނެފިއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ރާއްޖޭގައި ފުޅާދާއިރާއެއްގައި ސިނގިރޭޓް ވިއްކަމުން އަންނަ ކުންފުންޏަކުން ވަނީ ރޯލިން ޓޮބޭކޯ ޝިޕްމަންޓެއް ރާއްޖެގެނެސް އެ ކްލިއާ ކޮށްފައެވެ. އެ ޝިޕްމަންޓް ކްލިއާ ކޮށްފައިމިވަނީ އެތެރެކުރިތާ ދުވަސްތަކެއްފަހުންނެވެ.

މިކަން ފެންމަތިވުމާ ގުޅިގެން މޯލްޑިވްސް ކަސްޓަމްސް ސާވިސްއިން އެކްސްގައި ކުރި ޕޯސްޓެއްގައި ބުނެފައިވަނީ ކަސްޓަމްސް އަކީ ތަންފީޒީ އިދާރާއެއްކަމަށްވާތީ ކަސްޓަމްސުން ހިފަހައްޓާނީ ޤާނޫނަކުން ރާއްޖެ އެތެރެކުރުން މަނާކޮށްފައިވާ ތަކެތި ކަމަށެވެ. އަދި ރާއްޖެއަށް އެތެރެކުރާ ހުރިހާ މުދަލެއްވެސް ކުލިއަރކުރާ މަރުހަލާގައި، ކަސްޓަމްސުން ބަލަންޖެހޭ އެކި އެކި ބެލުންތައް ބެލުމަށްފަހު، އެމުދަލެއް ޤާނޫނީގޮތުން ރާއްޖެ އެތެރެކުރުން މަނާނުވާ ނަމަ އެމުދަލެއް ދޫކުރަމުންގެންދާނޭކަމަށް ކަސްޓަމްސްއިން ބުނެއެވެ.

މިފަދަ އެހެން މައްސަލައެއްގައި ހަމަ އެކުންފުނިން ރާއްޖެ އެތެރެކުރި ސިނގިރޭޓް ތައްޔާރުކުރުމަށް ބޭނުންކުރާ އެއްޗެހިތަކެއް އެތެރެކުރި މައްސަލާގައި ސިއްހީ ވުޒާރާއިން ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާއަށް ފޮނުވާފައިވާ ސިޓީއެއްގައި ބުނެފައިވަނީ، ދުންފަތުގެ ބާވަތެއް އުފެއްދުމަކީ މަނާކަމެއްކަމުގައިވާތީވެ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އެއްވެސް އާލާތެއް އެއްވެސް ފަރާތަކުން އެތެރެކޮށްފިނަމަ، އެތަކެތި ހިފަހައްޓައި ނައްތާލުމަށް ދަންނަވާކަމަށެވެ.

ދުންފަތް ކޮންޓްރޯލްކުރުމުގެ ގާނޫނުގެ 10 ވަނަ މާއްދާގެ ދަށުން ރާއްޖޭގައި އެއްވެސް މިންވަރަކަށް ދުންފަތް އަދި ދުންފަތުގެ ބާވަތްތައް އުފެއްދުމަކީ މަނާކަމެކެވެ. އެ ޤާނޫނުގައި ބަޔާންކޮށްފައިވާގޮތުން ދުންފަތާއި، ދުންފަތުގެ ތަނޑިއާއި، ނިކޮޓިންއާއި، އެނޫންވެސް އެބާވަތުގެ އެއްވެސް މިންވަރަކަށް ހިމެނޭގޮތަށް ތައްޔާރުކޮށް ހަށިގަނޑަށް ވާސިލްވާގޮތަށް ހަދާފައި ހުންނަ ކޮންމެ އެއްޗެއްމެ ބެލެވޭނީ ދުންފަތުގެ ބާވަތެއްގެ ގޮތުގައެވެ.

ދުންފަތާއި ދުންފަތް ބޭނުންކޮށްގެން ތައްޔާރުކޮށްފައި ހުންނަ ސިނގިރޭޓާއި ބިޑިން ނަގާ ޑިއުޓީ މިދިޔަ އޮކްޓޯބަރުމަހުގެ 31 ވަނަ ދުވަހުން ފެށިގެން ބޮޑުކޮށްފައިވާއިރު، ދުންފަތުގެ ބާވަތްތަކަށް އޮތް ޑިމާންޑުވަނީ ވަރަށްބޮޑަށް އިތުރުވެފައެވެ.