އެމްއެމްޕީއާރްސީ މައްސަލައިގައި އިންޓަރޕޯލުން ނެރުނު ނޯޓިސްތަކެއް ބާތިލްކޮށްފި

އެމްއެމްޕީއާރްސީގެ ބޮޑު ޚިޔާނާތާއި، ރިޔާސީ ލޯންޗްކޮޅު ފިނިފެންމާގައި ހިނގި ގޮވުމުގެ ހާދިސާއާއި ގުޅިގެން ތަހުގީގަށް ހޯދުމަށް އިންޓަރޕޯލުން ރެޑް ނޯޓިސް ނެރުނު ބަޔެއް ފަރާތްތަކުގެ ނޯޓިސްތައް އުވާލައިފިއެވެ.

ރެޑް ނޯޓިސް އުވާލާފައިވަނީ މުހައްމަދު އައްލާމް ލަތީފް (މޮހޯ)، އަހުމަދު އިޝްފާހް އަލީ، މުހައްމަދު ހުސައިން (އޮއިއްޓޭ) އަދި މުހައްމަދު އަސީލް އަހުމަދުގެއެވެ. މީގެ ތެރެއިން މޮހޯ އަދި އިޝްފާހަކީ އެމްއެމްޕީއާރްސީގެ ބޮޑު ޚިިޔާާނާތުގައި މެދުވެރިއެއްގެ ދައުރު އަދާކުރިކަމަށް އޭސީސީން ތުހުމަތުކުރާ އެސްއޯއެފް ކުންފުނީގެ ހިއްސާދާރުންނެވެ.

އޮއިއްޓޭ އަކީ ކުރީގެ ނައިބު ރައީސް އަހުމަދު އަދީބުގެ އަރިހުގައި ކާރުދުއްވަން އުޅުނު ފަރާތެކެވެ. އަދި އަސީލަކީ އެމްއެމްޕީއާރްސީގެ ކުރީގެ ޑެޕިއުޓީ އެމްޑީއެވެ.

ފާހަގަކޮށްލެވޭ ގޮތުގައި މި މައްސަލައިގައި ހޯދަން އިއުލާންކުރި މުހައްމަދު ވިޝާމް (ވިޝް) ގެ ރެޑް ނޯޓިސް އަދި އުވާލެވިފައެއް ނުވެއެވެ. އަސީލް ފިޔަވާ މި ހުރިހާ ފަރާތްތައްވެސް ދިރިއުޅެމުންދަނީ އިނގިރޭސިވިލާތުގައެވެ. އަސީލް ދިރިއުޅެމުންދަނީ އޮސްޓްރޭލިޔާގައިކަން އެނގިފައިވެއެވެ.

މި ފަރާތްތަކުގެ ރެޑް ނޯޓިސް ނެގީ ފުލުހުން ބުނެގެންކަން އެ އިދާރާއިން ވަނީ ބުނެފައެވެ.