ޚާރިޖީ ސިޔާސަތުތަކުން ލުއިތަކެއް ދަނީ ލިބެމުން، ދުނިޔެވެސް ރައީސްގެ ސިޔާސަތުތައް ބަލައިގެންފި: ނައިބު ރައީސް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާރިޖީ ސިޔާސަތުތަކުގެ ސަބަބުން ރާއްޖެއަށް ވަރަށް ބޮޑެތި ލުއިތަކެއް ލިބެމުންދާކަމަށާއި، މުޅި ދުނިޔެވެސް އެމަނިކުފާނުގެ ސިޔާސަތުތައް ބަލައިގެންފައިވާކަމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ހުސައިން މުޙައްމަދު ލަތީފް ވިދާޅުވެއްޖެއެވެ.

ސަރުކާރަށް އަހަރެއް ފުރުމާއި ދިމާކޮށް، ދައުލަތުގެ މީޑިއާ ޕީއެސްއެމުގެ "ހަފްތާ 52" ލައިވް ކަވަރޭޖަށް ދެއްވި އިންޓަވިއުއެއްގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، މި ސަރުކާރުން ވެރިކަމާއި ހަވާލުވީއިރު އޮތް އެންމެ ބޮޑު ގޮންޖެހުމަކީ ދައުލަތުގެ ހިންގުމަށް ދަތިވާ މިންވަރަށް ދަރަނި ނަގާފައި ހުރުންކަމަށާއި، މިކަމުގައި ގައުމުތަކާ ގާތްގުޅުމެއް ބާއްވައިގެން މަސައްކަތްކޮށް، ސަރުކާރުން ކުރިއެރުންތައް ހޯދާފައިވާކަމަށެވެ.

މިގޮތުން، ދަރަނި ދައްކަންހުރި ގައުމުތަކާއެކު ގުޅުންތައް ބަދަހިވެފައިވާކަން ފާހަގަކުރައްވަމުން ނައިބު ރައީސް ވިދާޅުވީ، މި ކާމިޔާބީތައް ލިބެމުންދަނީ ސަރުކާރުގެ ޚާރިޖީ ސިޔާސަތުތަކުގެ ސަބަބުން ކަމަށެވެ.

"ދަރަނި ދައްކަންހުރި ގައުމުތަކާއެކު ގުޅުންތައް ބަދަހިވެއްޖެ، ޚާރިޖީ ސިޔާސަތުގެތެރެއިން ވަރަށް ބޮޑެތި ލުއިތަކެއް ދަނީ ލިބެމުން، މިވެސް ކާމިޔާބީތަކެއް، މި ކާމިޔާބީތައް ލިބެމުންދަނީ އަޅުގަނޑުގެމެންގެ ޚާރިޖީ ސިޔާސަތުތަކުން، ދުނިޔެވެސް ބަލައިގަނެފި ރައީސްގެ ސިޔާސަތުތައް،"

ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވީ، ރައީސް ޑރ.މުޢިއްޒަކީ ވިސްނުން ހެޔޮ، ބުއްދި އިސްކުރައްވާ، ކަމެއް ދިމާވިޔަސް މަޝްވަރާކުރައްވާ އަދި ކެބިނެޓުގެ ލަފާފުޅުތައްވެސް އަބަދުވެސް ހޯއްދަވާ ރައީސެއް ކަމަށެވެ. އެހެންކަމުން ރައީސް ޑރ.މުޢިއްޒާއިއެކު މަސައްކަތްޕުޅު ކުރައްވަން ވަރަށް ފަސޭހަކަމަށް ނައިބު ރައީސް ވިދާޅުވިއެވެ.

ނައިބު ރައީސް އިތުރަށް ވިދާޅުވީ، ސަރުކާރުން މަސައްކަތްކުރަމުންދަނީ އިޖުތިމާއީގޮތުން ރާއްޖޭގައި ހުރި ބޮޑެތި މައްސަލަތަކަށްވެސް ދާއިމީ ހައްލުތަކެއް ހޯދައިދިނުމަށް ކަމަށާއި، މިހާރު ސަރުކާރުން ގެންނަ ބަދަލުތަކާއެކު ގައުމުގެ މިސްރާބު ހުރީ އެމަގަށް ކަމަށެވެ.