ސުނާމީގައި ލިބުނު ގެއްލުންތައް ސިއްރުކުރަން އޭރުގެ ސަރުކާރުން މަސައްކަތް ކުރި- ރައީސް ނަޝީދު

ދެހާސް ހަތަރު ވަނަ އަހަރު ރާއްޖެއަށް އެރި ސުނާމީގައި ރަށްތަކަށް ލިބުނު ގެއްލުންތައް އޭރު ރައީސަކަށް ހުންނެވި މައުމޫން އަބްދުލްގައްޔޫމްގެ ސަރުކާރުން ސިއްރުކުރަން މަސައްކަތް ކުރި ކަމަށް ކުރީގެ ރައީސް ނަޝީިދު ވިދާޅުވެއްޖެއެވެ.

އެމްޑީޕީގެ ޓިކެޓްގައި ވިލިފުށީ ދާއިރާއަށް ވާދަކުރައްވާ ހަސަން އަފީފަށް ކެމްޕެއިން ކުރުމަށް ވިލިފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވަ ދެއްކެވި ވާހަކަފުޅުގައި ނަޝީދު ވިދާޅުވީ، ރައީސް މައުމޫންގެ ސަރުކާރުން މަސައްކަތް ކުރެއްވީ ސުނާމީގެ ޚަބަރު ސިއްރުކުރަން ކަމަށެވެ. އަދި ކަންތައްތައް ސިއްރުކުރުމަކީ އޭރުގެ އާންމު ސިޔާސަތެއް ކަމަށްވެސް ނަޝީދު ވަނީ ވިދާޅުވެފައިވެއެވެ. އަދި ރާއްޖެއަށް ސުނާމީގެ އަސަރު ކުރި ކަމުގެ ވާހަކަތައް މުޅި ދުނިޔެއަށް އެންމެ ފުރަތަމަ އެންގީ ހަސަން އަފީފު ކަމަށްވެސް ނަޝީދު ވަނީ ވިދާޅުވެފައެވެ.

ސުނާމީއާއި ގުޅިގެން ރައީސް ނަޝީދު އެފަދަ ވާހަކަތަކެއް ދައްކަވާފައިވާއިރު، ސުނީމީއަށް ފަހު އާންމު ހާލަތައް ރައްޔިތުން ރުޖޫއަ ކުރުމަށް އޭރުގެ ސަރުކާރުން މަސައްކަތްކޮށްފައިވާކަމަށް އޭރު ސަރުކާރުން ބުނެފައިވެއެވެ.

އެސުނާމީގައި ރާއްޖޭގެ ގިނަ ރަށްތަކަކަށް ބޮޑެތި ގެއްލުންތަކެއްވެ، ދިވެހި ގިނަ ރައްޔިތުންގެ ދިރިއުޅުން މުޅިން ވިއްސި ވިހާލިވެގެން ދިޔައެވެ. އަދި އެ ހާދިސާގައި ދިވެހިންގެ ތެރެއިން ބަޔަކު ގެއްލިފައިވާއިރު، އެއްބަޔަކު ވަނީ ދުނިޔެ ދޫކޮށްފައެވެ.

ނަޝީދު މައުމޫނުގެ ސަރުކާރަށް ނިސްބަތްކޮށް އެފަދަ ވާހަކައެއް ވިދާޅުވެފައިވާއިރު ރައީސް މައުމޫންއަކީ މިހާރު ވެރިކަން ކުރަމުން އަންނަ ސަރުކާރުގެ އިސް ލީޑަރެކެވެ. އަދި ރައްޔިތުންގެ މަޖިލީހުގެ އިންތިޚާބުގައިވެސް ސަރުކާރާއެކު މަސައްކަތް ކުރާނެ ކަމަށް މައުމޫން ވަނީ ވިދާޅުވެފައެވެ.