ރާއްޖެއަށް 60 ފަހަރު ޒިޔާރަތްކުރި އިނގިރޭސި ދެމަފިރިއަކު ރާއްޖޭގައި މަރުވެއްޖެ

އެލައިދޫ މޯލްޑިވްސް ރިސޯޓުގައި ޗުއްޓީ ހޭދަކުރަމުންދިޔަ އިނގިރޭސިވިލާތުގެ ދެމަފިރިއަކު، ޑައިވިންގ ހާދިސާއެއްގައި މަރުވެއްޖެއެވެ.

މި ހާދިސާގައި މަރުވެފައިވަނީ އުމުރުން 70 އަހަރުގެ އިލެއިން ރިޗްމަންޑް އާއި އޭނާގެ ފިރިމީހާ އުމުރުން 71 އަހަރުގެ މަލްކަމް ރިޗްމަންޑެވެ.

މި ހާދިސާ ހިނގާފައިވަނީ މިދިޔަ ޑިސެމްބަރު މަހުގެ ތެރޭގައެވެ. މައުލޫމާތު ލިބިފައިވާ ގޮތުގައި އިލެއިން މަރުވެފައިވަނީ ޑިސެމްބަރު މަހުގެ 19 ވަނަ ދުވަހު މޫދަށް އެރި އުޅުމުގެ ތެރޭގައެވެ. އޭނާގެ ފިރިމީހާ މަލްކަމް މަރުވީ އޭގެ ތިން ދުވަސް ފަހުން، ޑިސެމްބަރު 22 ގައި ހޮސްޕިޓަލުގައި ފަރުވާދެމުން ދަނިކޮށެވެ.

މި ދެމަފިރިންނަކީ އިނގިރޭސިވިލާތުގެ ޑާބީޝަޔަރގެ އިންކަރސަލްއަށް ނިސްބަތްވާ، ރާއްޖެއަށް ވަރަށް ބޮޑަށް ލޯބިކުރި ދެމަފިރިންނެވެ. އެގޮތުން އެމީހުން ވަނީ މިހާތަނަށް ރާއްޖެއަށް 60 ފަހަރު ޒިޔާރަތްކޮށްފައި ކަމަށާ ފާއިތުވި 17 އަހަރުވެސް ޑިސެންބަރު ޗުއްޓީ އެމީހުން ހޭދަކޮށްފައިވަނީ އެލައިދޫގައި ކަމަށް ޑެއިލީމެއިލްގައި ރިޕޯޓްކޮށްފައިވެއެވެ.

މި ހާދިސާ ހިނގަން މެދުވެރިވި ސީދާ ސަބަބެއް އަދި ސާފުވެފައި ނުވި ނަމަވެސް، މިއީ "ސްކޫބާ ޑައިވިންގ" ހާދިސާއެއްކަން އެމީހުންގެ އާއިލާގެ ފަރާތުން ވަނީ ކަށަވަރުކޮށްދީފައެވެ. މި މަރުތަކުގައި އެއްވެސް ތުހުމަތުކުރެވޭ ފަދަ ކަމެއް ނެތް ކަމަށް އިނގިރޭސިވިލާތުގެ ކަމާބެހޭ ފަރާތްތަކުން ބުނެއެވެ.

މި ދެމަފިރިންގެ ވަކިވުމާ ގުޅިގެން އެލައިދޫގެ މުވައްޒަފުންނާއި، އެ ރިސޯޓަށް ގަވާއިދުން ޒިޔާރަތްކުރާ ފަރާތްތަކުން ދަނީ ސޯޝަލް މީޑިއާގައި ހިތާމަ ފާޅުކުރަމުންނެވެ. އެމީހުން ބުނާ ގޮތުގައި ރިޗްމަންޑް ދެމަފިރިންނަކީ އެންމެންނާ ގުޅޭ، ވަރަށް ހިތްހެޔޮ ބައެކެވެ.

މި ދެމަފިރިންގެ ޖަނާޒާ ބޭއްވުމަށް ހަމަޖެހިފައިވަނީ މި މަހުގެ 29 ވަނަ ދުވަހު އިނގިރޭސިވިލާތުގެ ބްރިމިންގްޓަންގައެވެ. އަދި އެމީހުންގެ މަރުގެ މައްސަލައިގެ ތަހުގީގު (އިންކުއެސްޓް) ޖެނުއަރީ 30 ވަނަ ދުވަހު ކޯޓުގައި ކުރިއަށްދާނެއެވެ.