ގެދޮރުވެރިޔާ ސްކީމަށް ޝަކުވާ ހުށަހަޅައިދިނުމަށް މާލެސިޓީ ކައުންސިލުން އެހީތެރިވެދެނީ!

ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން ދޫކުރުމަށް ނިންމި 4،000 ފްލެޓް ލިސްޓަށް ޝަކުވާ ހުށަހެޅުމުގައި މާލެސިޓީ ކައުންސިލުން އެހީތެރިވެދިނުމަށް ނިންމާފައިވާކަމަށް އެ ކައުންސިލުން ބުނެފިއެވެ.

މާލެސިޓީ ކައުންސިލުން ބުނީ، ގެދޮރުވެރިޔާ ސްކީމްގެ ދަށުން ޝަކުވާ ހުށަހެޅުމަށް ބޭނުންވާ ފަރާތްތަކަށް އެހީތެރިކަން ފޯރުކޮށް ދިނުމުގެ ގޮތުން އެ އިދާރާގެ ޢާއްމު ޚިދުމަތްތަކާބެހޭ ބައި، މިއަދުން ފެށިގެން ހިދުަތްދެމުން ދާނޭކަމަށެވެ. އެގޮތުން ހުކުރު ދުވަސް ފިޔަވައި ކޮންމެ ދުވަހަކުވެސް ކަނޑައެޅޭ ވަކި ގަޑިތަކެއްގައި ހިދުމަތް ދެމުންދާނޭކަމަށް މާލެސިޓީ ކައުންސިލުން ބުންޏެވެ.

ހިދުމަތް ދިނުމަށް ހަމަޖެހިފައިވާ ގަޑިތައް:

- މިއަދުން ފެށިގެން، އެޕްރީލްމަހުގެ 5 ވަނަ ދުވަހުގެ ނިޔަލަށް.

ހެނދުނު 10:00 ން 14:30 އަށް، އަދި ރޭގަނޑު 21:30 ން 23:00 އަށް

- އެޕްރީލް 6 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށް.

ހެނދުނު 09:00 ން 16:00އަށް، އަދި ރޭގަނޑު 21:00 ން 23:00 އަށް

ފްލެޓް ލިސްޓާ ގުޅޭގޮތުން ޝަކުވާ ހުށަހެޅުމަށް ހުޅުވާލާފައިވާ އެންމެ ފަހު ތާރީހަކީ، އަންނަ އޭޕްރިލްމަހުގެ 15 ވަނަ ދުވަހެވެ. ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން ދޫކުރުމަށް ނިންމި 4،000 ފްލެޓް ލިސްޓަށް ޝަކުވާ ހުށަހެޅުމަށް ހުޅުވާލުމު މިހާތަނަށް އެންމެ ގިނައިން ޝަކުވާ ހުށަހަޅާފައިވަނީ 3 ކޮޓަރީގެ އެޕާޓްމަންޓްތަކާ ގުޅޭ ޝަކުވާތައްކަމަށް ހައުސިން މިނިސްޓްރީން މީގެ ކުރިން ވަނީ ބުނެފައެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރުން އާއްމުކުރި ފްލެޓް ލިސްޓް މުރާޖައާކުރުމަށްފަހު މި ސަރުކާރުން އަލުން އެ ލިސްޓް އާއްމުކޮށްފައިވަނީ، މިދިޔަ ފެބުރުއަރީމަހުގެ 27 ވަނަ ދުވަހެވެ.

ހައުސިން މިނިސްޓްރީން ވަނީ ފްލެޓަށް ފޯމް ހުށަހަޅާފައިވާ ފަރާތެއްނަމަ އެފަރާތުގެ ފޯމާއި ގުޅޭ ޝަކުވާ ގެދޮވެރިން ޕޯޓަލް މެދުވެރިކޮށް ހުށަހެޅުމަށް އަދި ލިސްޓުގައިވާ ފަރާތަކާއި ގުޅޭ ޝަކުވާއެއް ނަމަ އީމެއިލް ނުވަތަ މިނިސްޓްރީއަށް އެޑްރެސްކޮށް ފޮނުވޭ ސިޓީއަކުން ހުށަހެޅޭނޭ ކަމަށް ބުނެފައެވެ. މީގެ އިތުރުން، ޝަކުވާ ހުށަހެޅުއްވުމުގެ މުއްދަތުގެ ތެރޭގައި ޝަކުވާ ހުށަހެޅުއްވުމުގެ ކަންކަން ކުރިޔަށްގެންދާނެ ގޮތާއި ގުޅޭ އިތުރު މައުލޫމާތު ސާފުކުރުމަށް މިނިސްޓްރީގެ ނަންބަރު 4004911 އަދި 4004910 ފޯނަށް ގުޅައިގެން މައުލޫމާތު ސާފުކުރެވޭނޭ ކަމަށްވެސް މިނިސްޓްރީން ބުންޏެވެ.