މަރުވި ނޭޕާލް މީހާގެ ހަށިގަނޑު، ޤައުމަށް ފޮނުވާލައިފި

މިދިޔަ ނޮވެމްބަރުމަހު މަރުވި ނޭޕާލްގެ ރައްޔިތެއްކަމަށްވާ، އުމުރުން 25 އަހަރުގެ ކަންޗަން ދުންގެލްގެ ހަށިގަނޑު އޭނާގެ ޤައުމަށް ފޮނުވާލާފައިވާކަމަށް ފުލުހުން ބުނެފިއެވެ.

އޭނާގެ ހަށިގަނޑު އެންމެފަހުން ނޭޕާލަށް ފޮނުވާލާފައިމިވަނީ މޯޗަރީގައި ބާއްވާފައި އޮންނަތާ 28 ދުވަސްފަހުންނެވެ. ފުލުހުން ބުނެފައިވަނީ ކަންޗަންގެ ހަށިގަނޑު ނޭޕާލަށް ފޮނުވާލާފައިވަނީ މިދިޔަ އަންގާރަދުވަހު ކަމަށެވެ. ކަންޗަން ދުންގެލް މަރުވެގެން ފުލުހުންނަށް ރިޕޯޓްކުރީ މިދިޔަ ނޮވެމްބަރުމަހުގެ 9 ވަނަ ދުވަހުއެވެ. މިހާ ދުވަސްވީއިރުވެސް ގަލޮޅު ސަހަރާގެ މޯޗަރީގައި އޭނާގެ ހަށިގަނޑު ބާއްވާފައި އޮތީ، އެއްވެސް ފަރާތަކުން ހަށިގަނޑާ ހަވާލުނުވެގެންނެވެ.

ތަހުގީގަށް އެނގިފައިވާގޮތުގައި، ކަންޗަން ދުންގެލް ހޮސްޕިޓަލަށް ގެނެސްފައިވަނީ ވަރަށް ބޮޑަށް ބަނޑުގައި ރިއްސަން ފެށުމުންނެވެ.  ހޮސްޕިޓަލަށް ގެނައުމުގެ މަގުމަތީގައި އޭނާގެ ހަބަރު ހުސްވިކަން ފާހަގަކުރެވިފައިވާކަމަށް ފުލުހުން ބުނެއެވެ. ފުލުހުން ހާމަކުރި ގޮތުގައި، މެޑިކޯ ލީގަލް ރެޕޯޓްގައި ކަންޗަން ދުންގެލް މަރުވި ސަބަބު ނޭނގޭކަމަށް ވަނީ ބަޔާންކޮށްފައެވެ. މި ރިޕޯޓްގައި އޭނާ އަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަކޮށްފައިނުވާކަމަށާއި، ކަންޗަން ދުންގެލް އަކީ އެނީމިއާ ގެ ހިސްޓްރީ އޮތް އޮތް މީހެއްކަން އެނގިފައިވާކަމަށް ފުލުހުން ބުނެއެވެ.

ކަންޗަންއަކީ މާލޭގެ ކެފޭއެއްގައި މަސައްކަތްކުރަން އުޅުނު މީހެކެވެ.