ވޭޕް ވިއްކީ ހުއްދަދީގެން ކަމަށް ވިޔަސް އާއިލާތަކުން އެދުނީ އެކަން ހުޓާލަން؛ މިހާރު އެއީ މަނާ ކަމެއް: ރައީސް މުޢިއްޒު

ވޭޕްގެ ވިޔަފާރި ކުރަމުން އައި ފަރާތްތަކުން އެކަން ކުރީ ހުއްދަ ހޯދައިގެން ކަމަށް ވިޔަސް، ގައުމުގެ ދަރިން އެ ވަބާއިން ސަލާމަތް ކުރަން އާއިލާ ތަކުން އެދެމުން ދިޔަ ކަމަށާ، އެ އެދުމާއެއްގޮތަށް، މިއަދުން ފެށިގެން އެއީ މަނާ އެއްޗެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އދ. މަހިބަދޫގައި އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ، ރާއްޖޭގައި މީގެ ކުރިން އިލެކްޓްރޯނިކް ސިނގިރޭޓުގެ ނުވަތަ ވޭޕްގެ ވިޔަފާރި ކުރަމުން ގެންދިޔައީ ގާނޫނީ އިމުގެ ތެރެއިން ހުއްދަ އޮވެގެން ކަމަށެވެ. އަދި އެކަމުގައި އެ ވިޔަފާރި ކުރަމުންދިޔަ ފަރާތްތަކުގެ އެއްވެސް ކުށެއް ނެތް ކަމަށް ވިދާޅުވުއެވެ.

އެހެން ނަމަވެސް އެކަމުގެ ސަބަބުން ގައުމަށް ބޮޑެތި ގެއްލުންތަކެއް ކުރިމަތިވަމުންދިޔަ ކަމަށާ، އާއިލާތަކުން އެދެމުންދިޔައީ އެކަމުން ގައުމު ސަލާމަތް ކުރަން ކަމަށް ރައީސް މުއިއްޒު ވިދާޅުވި އެވެ.

ގައުމުގެ ރައްޔިތުން، ހާލުގެ ދުލުން އެދެމުން ދިޔައީ މިކަމުން ތިމަންނަމެންގެ ދަރިން، ސަލާމަތް ކޮށްދިނުމަށް. އެހެންވީމާ އަޅުގަނޑުމެން ނިންމީ އެކަން ހުއްޓާލަން. މިއަދުން ފެށިގެން، ރޭ ދަންވަރު 12 އިން ފެށިގެން، ގާނޫނީ ގޮތުން ރާއްޖޭގައި ވޭޕް ބޭނުން ކުރުމާއި، ވިއްކުމާ، މިކަމުގެ އެއްވެސް ކަމެއް ކުރުމަކީ މަނާ ވެގެން އެދިޔައީ

ރައީސް މުޢިއްޒު

ރައީސް ވިދާޅުވީ ވޭޕް ގެ އިތުރުން ދެން ހުރި ކަންކަންވެސް ހައްލު ކުރުމަށް އެ ބީދާއިން މަސައްކަތް ކުރައްވަމުންދާ ކަމަށެވެ. އަދި ސިއްހީ ގޮތުން ޒުވާނުންނާއި އާންމުން ސަލާމަތްތެރިކަމާއެކު ތިބެގެން މެނުވީ ގައުމަށްވެސް ކޮށްދެވޭނެ ކަމެއް ނޯންނާނެ ކަމަށް ވިދާޅުވިއެވެ.

އަދި ވޭޕްގެ އިތުރުން މަސއތުވާތަކެތީގެ ވަބާއިން އާއިލާތައް ސަލާމަތް ވުމަށްވެސް އެދޭ ކަމަށާ އެއީ ފަސޭހަކަމެއް ނޫން ނަމަވެސް، އެކަން ނުކޮށްވެސް ވާން ނެތް ކަމަށެވެ. އެހެން ކަމުން ގާނޫނަށް ގެންނަންޖެހޭ ބަދަކުތައް ގެންނަވަމުންދާ ކަމަށް އެމަނިކުފާނު ވިދާޅުވިއެވެ.

ރައީސް މުޢިއްޒު އިތުރަށް ވިދާޅުވީ، ބަޔަކު ކުށްވެރި ކުރުމަކީ ސަރުކާރުން އެދޭ ގޮތް ނޫން ކަމަށާއި ބޭނުންވަނީ މަސްތުގެ ބަވާއާއި އެ ނޫންވެސް ގޮތްގޮތުން ކުށުގެވެށީގައި ބަނދެވިފައިވާ މީހުން އެކަންކަމުން ސަލާމަތްކުރުން ކަމުގައި ރައީސް ވިދާޅުވި އެވެ.