ހިޔާ ހުރިހާ ފުލެޓެއްގައި ލިފްޓް ހަރުކޮށް ނޮވެމްބަރު މަހު ބޭނުންކުރަން ފެށޭނެ: އެޗްޑީސީ

ހުޅުމާލޭ ދެވަނަ ފިޔަވަހީގެ ހިޔާ ފްލެޓު ޓަވަރުތަކުގައި އަލަށް ޤާއިމްކުރާ ހުރިހާ ލިފްޓެއްގެ މަސައްކަތް ނިންމައި، ނޮވެންބަރު މަހު ބޭނުންކުރަން ފެށޭނެކަމަށް ހައުސިން ޑިވަލޮޕްމެންޓް ކޯޕަރޭޝަން، އެޗްޑީސީން ބުނެފިއެވެ.

ހިޔާގެ ކޮންމެ ޓަވަރެއްގައި 400އެއްހާ އެޕާޓުމަންޓު ހިމެނެއެވެ. ކޮންމެ ޓަވަރެއްގެ އާބާދީ 2000އާއި ގާތްކުރާއިރު މިހާރު ފްލެޓެއްގައި ހުންނާނީ 3 ނުވަތަ 4 ލިފްޓެވެ. އެހެންކަމުން، ބާރު ބޮޑު ވަގުތުތަކުގައި އިމާރާތަށް އަރައި ފޭބުމުގައި ގިނަ ދަތިތަކާއި ކުރިމަތިލާން ޖެހެއެވެ.

އެ މައްސަލަ ހައްލު ކުރުމަށް، ކޮންމެ ހިޔާ ޓަވަރެއްގައި 2 ލިފްޓް ހަރުކުރުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ އިންތިޚާބުގެ ކެންޕެއިން ތެރެއިން ވަޢުދުވެވަޑައިވެންފައެވެ.

އަދި ވެރިކަމަށް ވަޑައިގެން އެ މަސައްކަތް ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާއި ހަވާލުކޮށްގެން ކުރިއަށް ގެންދާއިރު، މިއަދު ވަނީ އެތަނުން 4 ފުލެޓެއްގައި ލިފްޓް ހަރުކުރުމުގެ މަސައްކަތް ނިންމާފައެވެ.

ބާކީ ހުރި ޓަވަރު ތަކުގެ ލިފްޓް ހަރުކޮށް ނިމޭނެ ތާރީޚާއި ގުޅޭގޮތުން މީޑިއާ ތަކަށް މައުލޫމާތު ދެއްވަމުން އެޗްޑީސީގެ އެސިސްޓެންޓް ޑިރެކްޓަރ ޙަސަން ޝަހީދު ވިދާޅުވީ ހިޔާގެ ފުރަތަމަ ދެ ޓަވަރުގައި ޤާއިމުކޮށްފައިވާ ލިފްޓުތައް އަންނަ މަހުގެ 12 ވަނަ ދުވަހު ބޭނުންކުރަން ފަށާނެކަމަށެވެ. އަދި ޓަވަރު 3 އަދި 4 ގައި ޤާއިމުކުރާ ލިފްޓުތައް އަންނަ މަސް ނިމުމުގެ ކުރިން ބޭނުންކުރަން ފެށޭނެކަމަށެވެ.

މީގެ އިތުރުން އޭނާ ވިދާޅުވީ، މުޅި މަޝްރޫޢުގެ 58 އިންސައްތަ ނިމިފައިވާކަމަށާ، މަސައްކަތް ނިންމައި، ނޮވެންބަރު މަހުގެ ތެރޭގައި ހުރިހާ ލިފްޓެއް ބޭނުންކުރަން ފެށޭނެކަމަށް އޭނާ ވިދާޅުވިއެވެ.

ހިޔާ ޓަވަރުތަކުގައި އިތުރަށް ހަރުކުރާ 32 ލިފްޓަށް 18 މިލިއަން ޑޮލަރު (278 މިލިއަން ރުފިޔާ) އަށްވުރެ ގިނައިން ޚަރަދުވާ ކަމަށް އެޗްޑީސީން ކުރީން ވަނީ ބުނެފަ އެވެ.