ތިނަދޫ ރޯހައުސްތަކަށް ކުރިމަތިލުމުގެ ފުރުސަތު އާދިއްތަދުވަހު ހުޅުވާލަނީ

ގދ.ތިނަދޫގައި ތަރައްޤީކުރި ރޯހައުސްތަކަށް އެދި ކުރިލަތިލުމުގެ ފުރުސަތު އަންނަ އާދިއްތަދުވަހު ހުޅުވާލުމަށް ނިންމައިފިއެވެ.

ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީން ބުނީ ތިނަދޫގައި ތަރައްޤީކޮށްފައިވާ 200 ރޯހައުސްއަށް ކުރިމަތިލުމުގެ ފުރުސަތު އަންނަ އާދިއްތަދުވަހުގެ ހެނދުނު 9 އަކުން ފެށިގެން ހުޅުވާލާނޭކަމަށެވެ. މިނިސްޓްރީން ބުނީ ރޯހައުސްތަކަށް ކުރިމަތިލުމުގެ ފުރުސަތު ހުޅުވާލާނީ ހިޔާވަހި ޕޯޓަލް މެދުވެރިކޮށްކަމަށެވެ. އެގޮތުން މިއަހަރުގެ ނޮވެމްބަރުމަހުގެ 7 ވަނަ ދުވަހުގެ ނިޔަލަށް ރޯހައުސްއަށް އެދި ހުށަހެޅޭނޭކަމަށް މިނިސްޓްރީން ބުނެއެވެ.

މިއީ 2022 ވަނަ އަހަރުގެ އޮކްޓޯބަރު މަހު ސިއެރާ ކޮންސްޓްރަކްޝަން އާއި ސްޓަ ކޮންސްޓްރަކްޝަންގެ ޖޮއިންޓް ވެންޗާއާއި ހަވާލުކޮށްގެން ކުރިއަށްގެންދިޔަ މަޝްރޫޢުއެކެވެ. އެ ހައުސިން ޔުނިޓްތައް އަޅަން ސިއެރާ ކޮންސްޓްރަކްޝަން އާއި ސްޓަ ކޮންސްޓްރަކްޝަންގެ ޖޮއިންޓް ވެންޗާއާ ހަވާލުކޮށްފައިވަނީ 540 މިލިއަން ރުފިޔާގެ އަގަކަށެވެ.

ތިނަދޫ ކައުންސިލުން ވަނީ މީގެކުރިން އެ ހައުސިން ޔުނިޓްތަކަށް ކުރިމަތިލުމަށް ހުޅުވާލާފައެވެ. ނަމަވެސް ހައުސިން މިނިސްޓްރީން ވަނީ އެންޑޯސްކުރުމަކާއި ނުލައި ކޮށްފައިވާ އިއުލާނެއް ކަމަށް ފާހަގަކޮށް އެ އިއުލާނު ބާތިލްކޮށްފައެވެ. މިނިސްޓްރީން މިހާރު ވަނީ، ތިނަދޫއިން ރޯހައުސްތައް ދޫކުރާ އުސޫލްތައް ގެޒެޓްކޮށްފައެވެ.

އޭގެ ތެރޭގައި ހިމެނެނީ އެއްމެދު އިމާޜާތަކުން 600 އަކަފޫޓުގެ ނުވަތަ އެއަށްވުރެ ބޮޑު ތަނެއް ގަނެފައިވާ ނުވަތަ އެފަދަ ތަނެއް ގަތުމަށް އެއްބަސްވުމެއްގައި ސޮއިކޮށްފައިވާ ފަރާތަކަށް ނުވުމާއި، ރާއްޖޭގެ އެއްވެސް ތަނެއްގައި އަމިއްލަ އެވަރުގެ ގޯއްޗެއް ނުވަތަ ސަރުކާރުން ދޫކުރާ އެވަރުގެ ފްލެޓެއް ނުވަތަ އެނޫންވެސް ތަނެއް ނެތުމެވެ.

މީގެ އިތުރުން ވަސިއްޔަތުން ލިބިފައިވާ ނުވަތަ ލިބެންޖެހޭ ބިމެއް ނެތުމާއި އެފަދައިން ލިބޭ ބިމެއް ދޫކޮށްލުމާއި، މަހަކަށް ޖެހޭ އާމްދަނީން 60،000 ހާސް ރުފިޔާއަށްވުރެ އިތުރަށް ލިބޭ ފަރާތެއް ކަމުގައި ނުވުން ހިމެނެއެވެ.