ރޭގެ މުޒާހަރާގައި ހިނގި ކުރިމަތިލުމުގެ ތެރެއިން ފުލުހެއްގެ ލޯމަތި ވަނީ ފަޅާލާފައި: ފުލުހުން

ރޭ މާލޭގައި ކުރިއަށްދިޔަ އެއްވުމެއްގެ ތެރެއިން ފުލުހުންނާ ކުރިމަތިލައި ހިންގި ހަމަނުޖެހުންތަކެއްގައި ފުލުހަކަށް އަނިޔާވެއްޖެއެވެ.

ފުލުހުން ބުނި ގޮތުގައި، ރޭ މާލޭގައި ކުރިއަށްދިޔަ މި އެއްވުމުގެ ބައިވެރިން ފުލުހުންނާ ކުރިމަތިލައި ހިންގި ހަމަނުޖެހުމެއްގައި ފުލުހެއްގެ ލޮލުމަތި ފަޅައިގެން ގޮސް އަނިޔާވެފައިވެއެވެ. އަނިޔާވި ފުލުހަށް ހޮސްޕިޓަލުން ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.

މި މުޒާހަރާއަކީ "އަދަދު" ނޫހުގެ ދެ ނޫސްވެރިން ކަމުގައިވާ މުހައްމަދު ޝަހުޒާން އާއި ލީވާން އަލީ ނާސިރު ކްރިމިނަލް ކޯޓުގެ ހުރުމަތް ކެނޑި މައްސަލައެއްގައި ޖަލަށްލާފައިވާތީ، އެ ދެ ނޫސްވެރިން މިނިވަންކުރުމަށް ގޮވާލައި އެމްޑީޕީން އިންތިޒާމުކުރި ހަރަކާތެކެވެ.

މަޖީދީ މަގާއި ޗާންދަނީ މަގު ގުޅުނު ކަންމަތިން ފެށި މި މުޒާހަރާގައި ކުރީގެ ރައީސް މުހައްމަދު ނަޝީދު ވެސް ބައިވެރިވެވަޑައިގެންނެވިއެވެ.

މުޒާހަރާ ރޫޅާލުމަށް ފުލުހުން ހަރަކާތްތެރިވާން ފެށީ ރޭ ދަންވަރު 12:30 ހާއިރުއެވެ. އެސްއޯ ފުލުހުން ޝީލްޑުތަކާ އެކު ނުކުމެ މުޒާހަރާ ރޫޅާލުމުގެ ތެރޭގައި، އާންމު ދަތުރުފަތުރަށް ހުރަސް އަޅައި، ފުލުހުންގެ އަމުރަށް ނުކިޔަމަންތެރިވި ގިނަ ބަޔަކު ވަނީ ހައްޔަރުކޮށްފައެވެ.

ފުލުހުން މައުލޫމާތު ދިން ގޮތުގައި، ފުލުހުންގެ ގާނޫނީ ވާޖިބަށް ހުރަސްއަޅައި އަމުރަށް ނުކިޔަމަންތެރިވި ކަމުގެ ތުހުމަތުގައި ރޭ ޖުމްލަ ނުވަ މީހަކު ވަނީ ހައްޔަރުކޮށްފައެވެ. އޭގެ ތެރޭގައި ހިމެނެނީ ހަތް ފިރިހެނުންނާއި ދެ އަންހެނުންނެވެ.