އިމިގްރޭޝަންގެ އޮޕަރޭޝަނުން ސަލާމަތްވުމަށް ކުޅުދުފުއްޓަށް ދިޔަ 9 ބިދޭސީއަކު ހޯދައިފި

ރާއްޖޭގައި ގަވާއިދާއި ޚިލާފަށް އުޅެމުންދާ ބިދޭސީން ހޯދުމަށް އިމިގްރޭޝަނުން ކުރިއަށްގެންދާ އޮޕަރޭޝަނުން ސަލާމަތްވުމަށް ހދ.ކުޅުދުފުއްޓަށް ދިޔަ 9 ބިދޭސީއަކު ހޯދައިފިއެވެ.

އިމިގްރޭޝަނުން ބުނީ، ގަވާއިދާއި ޚިލާފަށް އުޅޭ ބިދޭސީން މާލެ ދޫކޮށް ރާއްޖޭގެ އެކި ރަށްރަށަށް ދާކަމުގެ ރިޕޯޓު ލިބެމުންދާކަމަށާއި، އެގޮތުން އިއްޔެ ލިބުނު މަޢުލޫމާތަކާއެކު ކުޅުދުއްފުއްޓަށް ދިޔަ ބޯޓެއްގައި ތިބި ބިދޭސީން ބަލާ ފާސްކޮށްފައިވާ ކަމަށެވެ.

ކުޅުދުއްފުށީ ސިޓީ ކައުންސިލް، ޕޮލިސް އަދި އިމިގްރޭޝަން ގުޅިގެން ކުރިއަށް ގެންދިޔަ މި މަސައްކަތުގެ ތެރެއިން މި ބޯޓުގައި ދަތުރުކުރި ބިދޭސީންގެ ތެރެއިން ގަވާއިދާ ހިލާފަށް ތިބި 9 މީހުނަށް ނޯޓިސްދީ އިމިގްރޭޝަނަށް ހާޒިރުވުމަށް އަންގާފައިވާ ކަމަށާއި، ބޯޓުގެ ކެޕްޓަނަށް ލިޔުމުން ނަސޭހަތްދީފައިވާ ކަމަށް އިމިގްރޭޝަނުން ހާމަކުރެއެވެ.

އިމިގްރޭޝަނުން އިތުރަށް ބުނީ، އެންގުމާ އެއްގޮތަށް އަމަލުނުކޮށްފިނަމަ އިމިގްރޭޝަން ޤާނޫނުގެ ދަށުން މިފަރާތްތަކާ މެދު ފިޔަވަޅު އެޅިގެންދާނެކަމަށެވެ.

މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އިމިގްރޭޝަންގެ ކޮންޓްރޯލަރ މުހައްމަދު ޝައްމާން ވަހީދު ވިދާޅުވީ، މި އޮޕަރޭޝަނާއި ގުޅިގެން ބިދޭސީން ބައެއް ރަށްރަށަށް ފިލައިގެންދާ މައްސަލަ އެ އިދާރާއަށް ވެސް ފާހަގަކުރެވިފައިވާ ކަމަށާއި، ކުޅުދުއްފުށި ސިޓީ ކައުންސިލުން ވެސް އެކަން ފާހަގަކޮށްފައިވާ ކަމަށެވެ.

ބިދޭސީން ދެނެގަތުމަށް ކުރިއަށްގެންދާ އޮޕަރޭޝަން، އަތޮޅުތަކަށް ފުޅާކުރެއްވުމަށް މަސައްކަތްކުރައްވަމުން ގެންދަވާކަމަށްވެސް ޝައްމާން ވަނީ މީގެ ކުރިން ވިދާޅުވެފައެވެ.

ގަވާއިދާއި ޚިލާފަށް ހިންގާ އެތައް ވިޔަފާރިއެއް ބަންދުކޮށް، ނުގަވާއިދުން އުޅެމުންދިޔަ އެތައް ބިދޭސީން ހަމައެކަނި މިދިޔަ ހަފްތާގެ ތެރޭގައި ވެސް ޑީޕޯޓްކޮށްލާފައިވާއިރު، މި އޮޕަރޭޝަންގެ ދަށުން އިމިގްރޭޝަންގެ 200 އަށް ވުރެ ގިނަ އޮފިސަރުން އަންނަނީ ހަމައެކަނި މާލޭގެ އެކި ސަރަހައްދުތަކުގައި ހަރަކާތްތެރި ވަމުންނެވެ.