ކޮވިޑްގެ ހާލަތުން އަރައިގަތުމަށް ފަސޭހަވި އެންމެ ބޮޑު އެއްސަބަބަކީ ޕްރައިވެޓް ސެކްޓާ އިން ކުރި ހޭދަ: ޚަލީލް

ކޮވިޑް-19 ގެ ބަލިމަޑުކަމުގެ ދުވަސްވަރު ރާއްޖޭގެ ޞިއްޙީ ނިޒާމަށް ވަރަށް ބޮޑު ލޮޅުމެއް ކުރިމަތިވި ކަމަށާއި، އެ ހާލަތުން އަރައިގަތުމަށް ފަސޭހަވި އެންމެ ބޮޑު އެއް ސަބަބަކީ ޕްރައިވެޓް ސެކްޓަރުން ކުރި ހޭދައާއި މަސައްކަތް ކަމަށް ޞިއްޙީ ވަޒީރު ޑރ.އަބްދުﷲ ޚަލީލް ވިދާޅުވެއްޖެއެވެ.

ތިން ރަށެއްގެ ރައްޔިތުންނަށް ޗަންޕާ މުޙައްމަދު މޫސާ ހަދިޔާކުރެއްވި ފިޒިއޮތެރަޕީ އިކުއިޕްމަންޓް ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ކޮވިޑްގެ ދުވަސްވަރު ސަރުކާރުން ގިނަ މަސައްކަތްތަކެއް ކުރި ނަމަވެސް، ރާއްޖޭގެ ޕްރައިވެޓް ސެކްޓަރުން ދިވެހި ރައްޔިތުންނަށް ވަރަށް ބޮޑަށް އެހީތެރިކަން ފޯރުކޮށްދިން ކަމަށެވެ.

"އަޅުގަނޑުމެންނަށް އެހާލަތުން އަރައިގަތުމަށް ދިމާވި އެންމެ ބޮޑު އެއްސަބަބަކީ ޕްރައިވެޓް ސެކްޓާ އިން ކުރި ހޭދަ، ކުރި މިންނަތް މަސައްކަތް، އޮހޮރި ދާ"

ވަޒީރު ޚަލީލް ވިދާޅުވިއެވެ.

މިގޮތުން ކޮވިޑް ގެ ދުވަސްވަރު ޓްރީޓޮޕް ހޮސްޕިޓަލުން 3 މަސްދުވަހަށް އެއްވެސް ޝަރުތަކާ ނުލައި އެ ހޮސްޕިޓަލުގެ ޚިދުމަތްތައް ރައްޔިތުންނަށް ހުޅުވާލައި، ފުރިހަމަ ޚިދުމަތެއް ފޯރުކޮށްދިން ކަމަށާއި، ޗަންޕާ ސެންޓްރަލް ހޮޓެލް ވެސް ދިވެހި ރައްޔިތުންނަށް ހުޅުވާލި ކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ޗަންޕާ ބްރާދާސް ގުޅިފައި އޮންނަ ކޮންމެ ވިޔަފާރި އަކުން އެބޭފުޅުން މަސައްކަތްޕުޅު ކުރައްވަނީ ވިޔަފާރީގެ ފައިދާ ހޯދުމާއިއެކު، އެ ފައިދާއަކީވެސް ރައްޔިތުންނަށް ހެދުމަށްޓަކައިކަން ފާހަގަކުރެވިގެންދާ ކަމަށެވެ.

މި ރަސްމިއްޔާތުގައި ހއ.ހޯރަފުށި، ޅ.ހިންނަވަރު އަދި ޅ.ކުރެންދޫ އަށް ޗަންޕާ މުޙައްމަދު މޫސާ ހަދިޔާކުރެއްވި ފިޒިއޮތެރަޕީ އިކުއިޕްމަންޓް، ރައްޔިތުންގެ މަޖިލީހުގައި އެ ރަށްތައް ތަމްސީލުކުރައްވާ މެމްބަރުންނަށް ހަވާލުކޮށްދެއްވީ އެބޭފުޅާގެ ދަރިކަނބަލުން ސާރާ މޫސާއެވެ.