ވައްކަމެއްގެ ޒިންމާ ނުނެގުމުން ނިންމީ ހައްމާދު މަރާލަން!

ދާދިފަހުން އއ.މާޅޮސް ކައިރިން ލަނޑާނަގާ ދޯންޏެއްގައި އިސްމާއިލް ހައްމާދު މަރާލަން ހަމަލާދިނީ ވައްކަމެއްގެ ޒިންމާ ނުނެގުމުގެ ސަބަބުންކަމަށް ހާމަވެއްޖެއެވެ.

މިއަދު އޮތް ރައްޔިތުންގެ މަޖިލީހުގެ ކޮމެޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ ހައްމާދަށް ހަމަލާދިންކަމަށް އެ ދޯނީގައި މަސައްކަތްކުރާ އިސްމާާއިލް އާސިފް އެއްބަސްވެފައިވާ ކަމަށެވެ. އެގޮތުން ފަނޑިޔާރެއްގެ ކުރިމައްޗަށް އާސިފް ހާޒިރުކުރުމުން، ކުށަށް އިއުތިރާފުވެ މިކަން ހިނގައިދިޔަ ގޮތް ކިޔައިދިންކަމަށް ކޮމިޝަނަރ ވިދާޅުވިއެވެ.

މީގެ އިތުރުން ހައްމާދަށް ހަމަލާދިނުމަށް ބޭނުންކުރި ވަޅި ވެސް ކަނޑުގެ 15 ވަރަކަށް މީޓަރު އަޑިން ހޯދާފައިވާކަމަށް އެބޭފުޅާ ވަނީ ހާމަކުރައްވާފައެވެ.

އާސިފްގެ ފަރާތުން ހައްމާދަށް ހަމަލާދިނުމުން އޭނާ މޫދަށް ފުންމާލައި، ފަތާފައިގޮސް އއ.މާޅޮހަށް އެރިއެވެ. އެއަށްފަހު އެރަށު ސިއްހީ މަރުކަޒުގައި ފަރުވާ ދިނުމަށްފަހު، އޭނާއަށް މިހާާރު ދަނީ މާާލޭގެ އައިޖީއެމްއެޗްގައި ފަރުވާ ދެމުންނެވެ. މި މައްސަލައިގެ ތަހުގީގަށް ހައްމާދުގެ ބަޔާން ނެގިފައިވާކަމަށް ސީޕީ ހަމީދު ވަނީ ވިދާޅުވެފައެވެ.

ހައްމާދު މަރާލުމަށް ހަމަލާދިން ސަބަބެއް ފުލުހުން ހާމަކޮށްފައި ނުވިނަމަވެސް، މީޑިޔާގެ ރިޕޯޓްތަކުން ބުނާގޮތުގައި އާސިފްގެ ފަރާތުން ހަމަނުޖެހުން ހިންގައި ހަމަލާދީފައިވަނީ ރިސޯޓެއްގެ ޑިންގީއެއް ވަގަށް ނަގަން އުޅުމަށްފަހު، ނާކާމިޔާބުވެ ފަޅާއެރުމުން އެ ވައްކަމުގެ ޒިންމާ ނުނެގުމުންނެވެ. މި ވައްކަމުގެ މައްސަލައިގައި އާސިފް ހައްޔަރުކޮށްފައި ޑިންގީއެއް ފަދަ އެއްޗެއްގެ ތެރޭގައި އޮންނައިރު، އޭނާގެ ކައިރީގައި ފުލުހަކު ހުންނަ ވީޑިޔޯއެއް ވަނީ އާންމުވެފައެވެ.

ހައްމާދާއި އާސިފަކީ ހަރުކަށި ފިކުރުގެ ފަރާތްތަކެއްކަމަށްވުމުން، މައްސަލައެއް ދިމާވެއްޖެނަމަ އޮންނަ އުސޫލަކީ ކޮންމެވެސް އެއް ފަރާތަކުން ޒިންމާ ނެގުންކަމަށް "ސަން" ގައި ވަނީ ބުނެފައެވެ.

އެގޮތުން ހައްމާދަކީ އެ ދޯނީގެ ކައްޕިކަމުގައިވުމުން ވައްކަމުގެ ޒިންމާ ހައްމާދު ނެގުމަށް އެދުމުން، އެކަމާއި އޭނަ ދެކޮޅު ހެދުމުން ހަމަލާދިނީ ކަމަށްވެއެވެ. ހައްމާދަށް ހަަމަލާދިނީ އާސިފް އެކަނި ކަމަށާއި، ދެން ހުރި މީހާ އޮތީ ނިދަންކަމަށް ހޯމް މިނިސްޓަރ ވިދާޅުވި ނަމަވެސް، ހައްމާދު ހޯދަން ދެ މީހަކު މާޅޮހަށް އެރިކަމަށްވެއެވެ.