"ދިޔަނެރު ދޭއް" ފަޅު ގައި ސަފާރީ ބަނދަރު ތަރައްގީ ކުރަނީ

ސަފާރީތައް އަޅަން ބޭނުންކުރާ ބަނދަރުގެ ގޮތުގައި ''ދިޔަނެރު ދޭއް'' ފަޅު ތަރައްގީ ކުރަން ސަރުކާރުން ނިންމައިފިއެވެ.

އެކަން އިއުލާންކޮށްފައިވަނީ، ރޭ ބޭއްވި ފަސްވަނަ މޯލްޑިވްސް ބޯޓިންގް އެވޯޑްސް ހަފްލާ ގައި ޓޫރިޒަމް މިނިސްޓަރު އަލީ ވަހީދެވެ.

އެހަފްލާ ޝަރަފުވެރިކޮށްދެއްވައި މިނިސްޓަރު އަލީ ވަހީދު ދެއްކެވި ވާހަކައިގައި ވިދާޅުވީ، މާލެ އާއި އަށް ކިލޯމީޓަރު ދުރުގައި އޮންނަ "ދިޔަނެރު ދޭއް" ފަޅުގައި ސަފާރީތަކަށް ހާއްސަ ބަނދަރު ހެދުމަށް ނިންމީ، ފަޅުތައް ބަހައިލި އިރު ފުރަތަމަ އެ ބަނދަރު އެޅުމަށް ސަރުކާރުން ބޭނުންވި ފަޅު އެހެން ބަޔަކަށް ދިނުމުންނެވެ.

އަދި އެފަޅު އަލުން ހޯދުމަށް އެއްބަސްވުން ބާތިލުކޮށް، ކޯޓަށް ދާނަމަ، އެކަމުގައި ދައުރު ނިމެންދެން އުޅެން ޖެހިދާނެތީ، މާލެއާ ކައިރިން ބަނދަރު ހަދަން އެންމެ އެކަށޭނެ، ދާއިރާގެ މީހުންނަށް ފަސޭހަވާނެ ތަނެއްގައި ސަފާރީތައް އަޅާނެ ބަނދަރެއް ހެދުމަށް ނިންމީ ކަމަށް އަލީ ވަހީދު ވިދާޅުވިއެވެ.

އެގޮތުގެ މަތިން "ދިޔަނެރު ދޭއް" ފަޅު ހަމަޖެއްސީ ކަން ފާހަގަކުރައްވައި އަލީ ވަހީދު ވިދާޅުވީ، އަންނަ އަހަރަށް މި ޕްރޮޖެކްޓު ރާވާފައިވާކަމަށެވެ.

އަލީ ވަހީދު ވިދާޅުވީ މި ސަރުކާރުން ބޭނުންވަނީ ކަމެއް ބަދަލުކުރި ބައެއްގެ ގޮތުގައި އުޅެ ނިމިދާން ކަމަށެވެ. އަދި އެކަން ކާމިޔާބު ކުރުމަށް ދާއިރާގެ ބޭފުޅުންގެ ހިޔާލާއި މަޝްވަރާ މުހިއްމު ކަމަށް މިނިސްޓަރު ފާހަގަަކުރެއްވިއެވެ. އެގޮތުން ސަފާރީތައް އޯވާ ނައިޓަށް ބަނދަރުކުރާނެ ސަރަހައްދެއް އޮތުމުގެ މުހިއްމުކަން ވެސް އޭނާ ފާހަގަކުރެއްވިއެވެ.

މީގެއިތުރުން ރައީސް ޔާމީންގެ ސަރުކާރުގައި ގެނައި އުމްރާނީ ތަރައްގީ ފާހަގަކުރައްވައި އަލީ ވަހީދު ވަނީ އެކަމަށް ފާޑުވިދާޅުވެފައެވެ.

އަލީ ވަހީދު ވިދާޅުވީ މި ސަރުކާރު އައީ އުސް އިމާރާތް އަޅައިގެން އިގްތިސޯދު ބައްޓަން ކުރަން ނޫން ކަމަށާއި މި ސަރުކާރުން ބޭނުން ވަނީ ދެމެހެއްޓެނެވި ތަރައްގީ ގެނެސް ދިނުމަށް ކަމަށެވެ.

އަލީ ވަހީދު ވިދާޅުވީ، ރައީސް ޔާމީންގެ ސަރުކާރުގެ ފަހު އަހަރާއި މި ސަރުކާރުގެ ފުރަތަަމަ އަހަރާ ބައެއް މީހުން އަޅާ ކިޔާ ކަމަށެވެ. ނަމަވެސް އެ ސަރުކާރުގެ ކެމްޕެއިން އަހަރާއިމި ސަރުކާރުގެ ފުރަތަމަ އަހަރާ އަޅާ ނުކިޔޭނެ ކަމަށް ވިދާޅުވިއެވެ.

އެގޮތުން ދެ ސަރުކާރުގެ ދުވެލި އެއްވަރު ވާކަށް ނުޖެހޭނެ ކަމަށާއި މިސަރުކާރު އައީ ވަރަށް ގިނަ ކަންތައްތަކަށް ކޮށްފީމޭ ބުނަން، އެއް އަހަރު ތެރޭ ދައުލަތުގެ ބަޖެޓު ދުއްވާލަން ނޫން ކަމަށް އަލީ ވަހީދު ވިދާޅުވިއެވެ.