ވަޒީރު ޚަލީލަށް، ލަންކާ މީހަކު މަރުގެ އިންޒާރު ދިން މައްސަލައެއް

ޚާރިޖީ ވަޒީރު އަބްދުالله ޚަލީލް ރަސްމީ ދަތުރުފުޅެއްގައި ލަންކާއަށް ވަޑައިގެން ހުންނަވަނިކޮށް އެ ގައުމަށް ނިސްބަތްވާ މީހަކު މަރުގެ އިންޒާރު ދިން މައްސަލައެއް ފުލުހުން ބަލަންފަށައިފިއެވެ.

ވަޒީރު ޚަލީލަށް އިންޒާރުދީ ނަދީޝް ޕެރެރާ ނަމަކަށް ކިޔާ ލަންކާގެ ރައްޔިތަކު އެކްސްގައި، މީހަކު ކުރި ޕޯސްޓެއްގައި ވަނީ، ވަޒީރުގެ ކާރުކޮޅުގެ އެކްސިޑެންޓެއްވެ އެބޭފުޅާ އަވަހާރަވެދާނެ ކަމަށް ބުނެފައެވެ. އަދި އެފަހުން ކުރި އެހެން ޕޯސްޓެއްގައިވެސް ވަނީ، އެ މޭރުމުން ވާހަކަދައްކައި އިންޒާރު ދީފައެވެ.

އެކަމާ ގުޅިގެން ނޫސްވެރިއަކު ކުރި ސުވާލަށް ޖަވާބުދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، އެކަން ފުލުހުންގެ ސަމާލުކަމަށް އައިސްފައިވާތީ ކަމާގުޅުންހުރި އިދާރާތަކާއި އެކު ބަލަންޖެހޭ ކަންކަން ބަލަމުންދާ ކަމަށެވެ.

ނަމަވެސް މައްސަލައާއި ގުޅިގެން އަދި މީހަކު ހައްޔަރު ކޮށްފައި ނުވާ ކަމަށާ، ސުވާލު ކުރަންޖެހޭ ފަރާތްތަކާ ސުވާލު ކުރަމުންދާ ކަމަށް އޮފިޝަލް ވިދާޅުވިއެވެ.

އެނގިފައިވާ ގޮތުގައި މި މީހާއަކީ ރާއްޖެ ނާދެވޭ ގޮތަށް ޑީޕޯޓް ކޮށްފައިވާ ލަންކާ މީހެކެވެ. އޭނާ ކުރިން ދިރިއުޅުނީ ދިވެއްސަކާ ކައިވެނިކޮށްގެން ރާއްޖޭގައެވެ.

މި ލަންކާ މީހާގެ އެކްސް އެކައުންޓްގައި ގިނަ އަދަދަކަށް އިމިގްރޭޝަން ކޮންޓްރޯލާ ޖެނެރަލް ޝައްމާން ވަހީދާއި މިނިސްޓަރު ޚަލީލް ޓެގުކޮށް ޕޯސްޓުކޮށްފައިވެއެވެ.

އަދި ކޮންޓްރޯލާ ޝަމްޢާންއަށްވެސް އިންޒާރުތައްދީ އޭނާގެ ދަރިފުޅާ އޭނާއާއި ދުރުކޮށްފައިވާ ކަމަށާ، އެކަމާ އޭނާ ދެރަވާކަމަށް ބުނެ، ދަރިފުޅާ ބައްދަލު ވުމަށް އެދޭ ކަމަށް ބުނެފައިވެއެވެ. މީގެ އިތުރުން، އޭނާގެ ދެ އަހަރުގެ ދަރިފުޅު ހުރީ ރާއްޖޭގައި ކަމުން ނުވަ މަސްވަންދެން ދަރިފުޅު ނުފެންނަ ކަމަށް ބުނެފައިވެއެވެ.

އެ ފިރިހެން މީހާގެ ޕްރޮފައިލް ފޮޓޯގައިވެސް ވަނީ ދަރިފުޅާއެކު ނަގާފައުވާ ފޮޓޯއަކާ، ޝަމްއާންގެ ފޮޓޯއެއް ހިމަނާފައެވެ. އަދި ދަރިފުޅު މަތިން ހަނދާންވާ ކަމަށް އޭގައި ލިޔެފައި ވެއެވެ.