2027 ގައި ސަރުކާރު ސުކޫލުތަކުގެ ރަސްމީ އަދި އެކްޓިވިޓީ ޔުނީފޯމު ބަދަލުވާ ގޮތުގެ ނަމޫނާ ސުކޫލް ތަކަށް ފޮނުވައިފި

2027 އިން ފެށިގެން ސަރުކާރު ސްކޫލްތަކުގެ ރަސްމީ ޔުނިފޯމާއި އެކްޓިވިޓީ ޔުނިފޯމަށް ގެންނަން ނިންމާފައިވާ ބަދަލުގެ ނަމޫނާ އާއި ދަރިވަރުންގެ ޔުނިފޯމު ހުންނަންވާ ގޮތުގެ އުސޫލް އެޑިއުކޭޝަން މިނިސްޓްރީން ސްކޫލްތަކަށް ފޮނުވައިފި އެވެ.

މިނިސްޓްރީން ސްކޫލްތަކަށް ފޮނުވި ސާކިޔުލާގައިވާގޮތުން ސަރުކާރު ސްކޫލްތަކުގެ ޔުނިފޯމް އެއްގޮތް ކުރަން ނިންމާފައި ވަނީ ހަތަރު ކުލައަކަށެވެ. އެއީ ގައުމީ ދިދައިގައި ހިމެނޭ ތިން ކުލަ ކަމަށްވާ ފެއްސާއި ރަތާއި ހުދުގެ އިތުރުން، އެޑިއުކޭޝަން މިނިސްޓްރީގެ ކުލަ، ނޫ ކުލައަށެވެ.

ޔުނިފޯމަށް ގެންނަން ނިންމާފައިވާ ބަދަލުގައި، ރަސްމީ ޔުނިފޯމުގެ ގަމީސް ހުންނަން ޖެހޭނީ ހުދު، ސްކައި ބްލޫ، ޓީލް ގްރީން ނުވަތަ މަޑު ރަތް ކުލައިގައެވެ. އަދި ރަސްމީ ޔުނީފޯމުގެ ފަޓުލޫނު/ސްކާޓް/ސޯޓު ހުންނަން ޖެހޭނީ ކަޅު ނުވަތަ ނޭވީ ބްލޫ ކުލައިން ކަމަށް އުސޫލްގައިވެ އެވެ.

ބުރުގާ އަޅާ ދަރިވަރުންނަށް ޔުނީފޯމު ކުލައަށް ވުރެ ގަދަ ކުލައެއްގެ ބުރުގާ ބޭނުން ކުރެވިދާނެއެވެ. އެގޮތުން ނޭވީ ބްލޫ، ރޯޔަލް ގްރީން ޑާކް ރެޑް ނުވަތަ ހުދު ކުލަ ބުރުގަލަށް ބޭނުން  ކުރެވިދާނެއެވެ. ނުވަތަ ފަޓުލޫނު ނުވަތަ ސްކާޓް ކުލައިގެ ބުރުގާ ވެސް ބޭނުންކުރެވިދާނެއެވެ.

ފެހި، ރަތް އަދި ނޫ ނުވަތަ ސްކޫލުން ބޭނުންކުރާ ކުލައަކުން އެކްޓިވިޓީ ޔުނިފޯމު ލެވިދާނެ އެވެ. އެކްޓިވިޓީއާ އެކު ސްކާޓް ނުވަތަ ފަޓުލޫނު ހުންނަން ޖެހެނީ ކަޅު ކުލައިންނެވެ.

މި އުސޫލުގައި ވަނީ ކޮންމެ ކީސްޓޭޖަކަށް އަދި ކޮންމެ ގިންސަކަށްވެސް ވަކިން ޔުނީފޯމުގައި ހުންނަން ޖެހޭ ޝަރުތުތައް ވަރަށް ތަފްސީލުކޮށް ބަޔާންކޮށްފައެވެ.

އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވި ގޮތުގައި  ޔުނީފޯމަށް ބޮޑު ބަދަލެއް ގެންނަން ނިންމީ، އެކަމުގައި ސްކޫލުތަކާއި ބެލެނިވެރިންގެ ޝަކުވާ ބޮޑުވުމުންނެވެ. އަދި މި އުސޫލަށް އަމަލުކުރަން ފެށުމުން ޔުނީފޯމް އަގުހެޔޮވެ، މޮނޮޕޮލައިޒްކުރުން ހުއްޓުވޭނެ ކަމަށް މިނިސްޓަރު ވަނީ ވިދާޅުވެފައެވެ.