އައްޑޫ މީހުން މާލޭގައި ކުރާ ވިޔަފާރިތަކާއި ދެކޮޅަށް ދަނީ ކެމްޕޭންކުރަމުން: ޒާހިދު ރަމީޒު

ނިއުޕޯޓް ބަންދުކުރުމަށް ގޮވާލާ ކުރަމުންދާ ކެމްޕެއިންއަކީ އައްޑޫ މީހުން މާލޭގައި ހިންގާ ވިޔަފާރިތަކާއި ދެކޮޅަށް ކުރާ ކެމްޕޭނެއްގެ ގޮތުގައި ނިއުޕޯޓްގެ ކުރީގެ އިސްވެރިޔާ ޒާހިދު ރަމީޒު ސިފަކޮށްފިއެވެ.

ޒާހިދު މިހެން ބުނެފައިވަނީ ނިއުޕޯޓްގެ ތަންތަން ބަންދު ނުކުރެވިގެން އުޅެނީ ހިތަދޫ މެދު ދާއިރާގެ މެންބަރ މުހައްމަދު އަސްލަމްގެ ނުފޫޒުންކަމަށް ބުނެ ޓްވިޓަރގައި ގިނަ ބަޔަކު ވާހަކަދައްކަމުން ދިޔުމާއި ގުޅިގެން ފޭސްބުކްގައި އާންމުކުރި ބަޔާނެއްގައެވެ.

އޭނާ ބުނީ ނިއުޕޯޓާއި އަސްލަމާއި ދެމެދު ވިޔަފާރީގެ އެއްވެސް ގުޅުމެއް ނޯންނާނެކަމަށާއި އޮތްހާވެސް ގުޅުމަކީ އާއިލީ ގުުޅުމެއް ކަމަށެވެ. އަދި ދެފަރާތުގެ ސިޔާސީ ވިސްނުން ތަފާތުކަމުގައިވިޔަސް، އެކަމުގެ ސަބަބުން އާއިލީ ގުޅުންތަކަށް އެއްވެސް ނުރަނގަޅު ނުފޫޒެއް ނުފޯރާކަމަށް ޒާހިދު ފާހަަގަކުރިއެވެ. ޒާހިދު ބުނީ އޭނާ ދެކޭ ގޮތުގައި ނިއުޕޯޓުގެ ކަންކަމުގެ ތެރެއަށް އަސްލަމް ވައްދަމުންދަނީ މަޖިލީހުގެ ރައީސްގެ މަގާމަށް އަސްލަމް އިންތިޚާބުވުމުގެ ފުރުސަތު ހަނިކުރުމުގެ މަގުސަދުގައެވެ.

ޒާހިދު އިތުރަށްވަނީ ނިއުޕޯޓްގެ ތަންތަން މިހާރުވެސް ހިންގަމުންދަނީ ސިވިލް ކޯޓުން ހުކުމްކޮށްގެން ލިބުނު ހުއްދައާއި އެއްކޮށްކަމަށް ފާހަަގަކޮށް، މިހާތަނަށް ހުކުމް ނުކުރާ ހަމައެކަނި މައްސަލައަކީ ބްރިޖް ޕްލެޓްފޯމްގެ މައްސަލަކަމަށް ބުނެފައެވެ.

އޭނާ ވަނީ ނިއުޕޯޓަށް ދަތިތައް ކުރިމަތިކުރުވަމުންދަނީ އޭނާއާއި މެދު ސިޔާސީ ފިކުރުގެ ސަބަބުން ޒާތީ މައްސަލަތަކެއް ހުރި ފަރާތްތަކެއްކަމަށް ސިފަކޮށްފައެވެ. ޒާހިދު ވަނީ ފަތުރުވެރިކަމުގެ ސިނާއަތް ފިޔަވައި ދައުލަަތަށް ކުލީގެ ގޮތުގައި އެންމެ ބޮޑު އާމްދަނީއެއް ފޯރުކޮށްދެނީ ނިއުޕޯޓުންކަމަށް ބުނެފައެވެ.

މި ބަޔާން ނިންމާލަމުން ޒާހިދު ވަނީ ޓްވިޓަރގައި ދައުރުވަމުންދާ ޓްވީޓްތަކަށް ބަލާފައި މިއީ އައްޑޫ ރައްޔިތުންނާއި އައްޑޫ މީހުންގެ ވިޔަފާރިތަކާއި ދެކޮޅަށް ކުރާ ކެމްޕޭނެއްކަން ބުނަން ތައްޔާރުކަމަށް ބުނެފައެެވެ. އޭނާ ވަނީ އައްޑޫގެ ފަރާތްތަކަށްވެސް އުނދަގުލާއި ނުލައި މާލޭގައި ވިޔަފާރިކުރުމުގެ ހައްގު އޮންނާނެކަމަށް ބުނެފައެވެ.

އަދި އަމިއްލަ ހައްގާއި، މުވައްޒަފުންނާއި، އާއިލާ އަދި އައްޑޫ ސިޓީގެ ހައްގުގައި ވަކާލާތުކުރާނެކަމަށާއި އިރާދަކުރެއްވިއްޔާ އިންސާފު ގާއިމްވާނެކަމަށްވެސް ޒާހިދު ވަނީ ބުނެފައެވެ.