މޫސުން ގޯސްވެ އިއްޔެއާއި މިއަދު، ކަނޑުމަތީގެ 6 ހާދިސާއެއް

މޫސުން ގޯސްވެ، ކަނޑު ގަދަވުމުގެ ސަބަބުން ރެއާއި މިއަދު ކަނޑުމަތީގެ 6 ހާދިސާއެއްގެ ހިނގައިފިއެވެ.

އެގޮތުން އެމްއެންޑީއެފް އިން ބުނެފައިވާގޮތުން، 9 ފަތުރުވެރިންނާ 5 ފަޅުވެރިންނާއެކު ދަތުރުކުރި 'ކޮޅުލިޔާ' ނަމަކަށްކިޔާ ސަފާރީ ތިމަރަފުށި އެއަރޕޯޓް ބީޗަށް ލައްވެފައިވާ ކަމުގެ ރިޕޯޓް ރޭ ދަންވަރު 01:10 ކަންހާއިރު ރިޕޯޓް ކޮށްފައިވާ ކަމަށެވެ.

މިހާރު އެ މީހުން ތިބީ އެރަށު ގެސްޓްހައުސްއެއްގައި ކަމަށްވާއިރު ހާދިސާގައި އެއްވެސް މީހަކަށް އަނިޔާއެއް ނުލިބޭ ކަމަށް ބުނެފައިވެއެވެ.

ރޭގައި ހިނގި ދެވަނަ ހާދިސާ އަކީ، ތ.އަތޮޅު ތެރެއިން ބާޖެއް ކަފު ޖަހައިގެން ދަތުރުކުރި ޓަގު ބޯޓެއް މޫސުން ގޯސްވެ ވައު ކަނޑައިގެންދިއުމެވެ. މި ހާދިސާގެ ރިޕޯޓް ރޭ 0:2:54 އެމްއެންޑީއެފަށް ލިބިފައިވާ ކަމަށް އެ އިދާރާއިން މައުލޫމާތު ދޭއިރު، މިވަގުތު ބާޖު އޮތީ ގ. ގުރައިދޫ ކައިރިއަށް ބީހިފައި ކަމަށް ބުނެފައިވެއެވެ. އަދި ޓަގު ބޯޓް އޮތީ އެސަރަހައްދުގައި އެންކަރުކޮށްގެން ކަމަށްވެސް ބުނެފައިވެއެވެ.

މިއާއެކު ރޭ ދަންވަރު 3:20 ކަންހާއިރު،' ފިޝްމަން' ކިޔާ މަސް ދޯންޏެއް ލ. އަތޮޅަށް ދަތުރުކުރަނިކޮށް ލ. ހިތަދޫގެ 23 މޭލު ބޭރުން ދިޔަވާކަމަށް ރިޕޯޓް ލިބިފައިވާ ކަމަށް އެމްއެންޑީއެފްއިމް މައުލޫމާތު ދީފައިވެއެވެ.

މިދޯނި މިހާރު ވަނީ މަޑުމަޑުން ދުއްވާފައި އައިސް ލ. ހިތަދޫ ބަނދަރަށް ވަދެފައި ކަމަށާ، މިހާދިސާގައި ހަރަކާތްތެރިވެފައިވަނީ ފާސްޓް އިންޓަރ ސެޕްޓަރ ކްރާފްޓް ' މާފަތް' ކަމަށް ސިފައިން މައުލޫމާތު ދެއެވެ.

މީގެ އިތުރުން، 6މީހުންނާއެކު ދަތުރުކުރި ' ބިނާ ކާގޯ' ކިޔާ ސަޕްލައި ދޯންނެއް ލ. ހިތަދޫގެ 11 މޭލު ބޭރުން އިންޖީން ހުއްޓި ދިޔަވާތީ ރޭގެ 02:43 ހާއިރު ލިބިފައިވާ ކަމަށާ، މިހާރު މިދޯނި އިތުރު ދޯންޏެއްގެ އެހީގައި މިހާރު ކަފުޖަހައިގެން ދަތުރު ކުރަމުންދާ ކަމަށް އެމްއެންޑީއެފުން ބުންޏެވެ. މިހާދިސާގައި ހަރަކާތްތެރިވަމުންދަނީ ފާސްޓް އިންޓަރ ސެޕްޓަރ ކްރާފްޓް ' މާފަތް' ކަމަށްވެސް ބުންޏެވެ.

ފަސް ވަނަ ހާދިސާއަށް ރިޕޯޓް ކޮށްފައިވާ ކަމަށް އެމްއެންޑީއެފުން ބުނެފައިވަނީ، 10 މީހުންނާއެކު ދަތުރުކުރި ސައުތު އެކްސްޕްރެސް ދޯންޏަށް ދިޔަވާތީ ރޭ 2:48 ގައި ރިޕޯޓް ކުރެވުނު ހާދިސާއެވެ.

އެ ދޯންޏަށް ސިފައިން އެހީތެރިކަން ފޯރުކޮށްދީފައިވާއިރު، ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާއެކު މި ދޯނި މިއަދު ހެނދުނު 09:00 ހާއިރު ލ.މާމެންދޫ ބަނދަރަށް ވައްދާފައިވާ ކަމަށްވެސް ބުނެފައިވެއެވެ.

ހަމަ އެހެންމެ، 80 ފޫޓްގެ ފާގަަތި ނަމަކަށް ކިޔާ ދޯންޏަށް ދިޔަވާތީ ސެންޓްރަލް އޭރިއާ ކޮމާންޑް ދ.ކުޑަހުވަދޫ ޕޯސްޓްގެ ސިފައިން ވަނީ ހަރަކާތްތެރިވެފައިވާ ކަމަށާ، މިހާދިސާގެ ރިޕޯތް ލިބިފައިވަނީ 05:00 ހާއިރު ކަމަށް ސިފައިން ބުންޏެވެ. އަދި ދޯނީގައި ހުރި ބިދޭސީ ފަޅުވެރިއަކަށް އަނިޔާވެ އިތުރުފަރުވާއަށް ފ.ނިލަންދޫ ހޮސްޕިޓަލަށް ގެންގޮސް ދިނުމަށް  ސެންޓްރަލް އޭރިއާ ކޮމާންޑް ކޯސްޓްގާޑް ތާޑް ސްކޮޑްރަންގެ އެހީތެރިކަމާއެކު އެ މީހާ ވަނީ ނިލަންދޫއަށް ގެންގޮސްދީފައި ކަމަށްވެސް ބުންޏެވެ.