މިރޭގެ މެޗު ރޮނާލްޑޯއަށް ވަރަށް ޚާއްސަ

ސައުދީ ޕްރޮފެޝަނަލް ލީގުގައި ޗެންޕިއަން އަލް ހިލާލްޱއާއި ދެކޮޅަށް ދެވަނައިގައި އޮތް އަލް ނަސްރުން ކުޅޭ މެޗަކީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯއަށް އެއްގޮތަކަށްވުރެ ގިނަގޮތްގޮތުން ޚާއްސަ މެޗެކެވެ.

މިމެޗަކީ ލީގުގައި މުހިންމު މެޗަކަށް ނުވި ނަމަވެސް، ލީގުގެ އެންމެ ގިނަ ލަނޑުޖެހި ކުޅުންތެރިއާގެ މަގާމަށް ވާދަކުރަމުން އަންނަ އަލް ހިލާލްގެ ސާބިއާ ފޯވާޑް އެލެގްޒަންޑާ މިޓްރޮވިޗް އަދި ރޮނާލްޑޯއަށް ވެސް ވަރަށް މުހިންމު މެޗެކެވެ. އަދި މިމެޗަށް ނުކުންނައިރު، ލަނޑު ލިސްޓުގެ ކުރީގައި އޮތީ ރޮނާލްޑޯއެވެ.

ލީގުގައި ރޮނާލްޑޯ ކުޅުނު 28 މެޗުގައި 33 ލަނޑު ކާމިޔާބުކޮށްފައި ވާއިރު، މިޓްރޮވިޗު ދެވަނައިގައި އޮތީ 25 މެޗުގައި ކާމިޔާބުކުރި 26 ލަނޑާއެކު އެވެ. މީގެ އިތުރުން މިމެޗުގައި ރޮނާލްޑޯ ލަނޑެއް ކާމިޔާބު ކޮށްފިނަމަ ސައުދީ ޕްރޮފެޝަނަލް ލީގުގައި އެއް ސީޒަނެއްގައި 34  ލަނޑުޖަހައިގެން، އަލް އިއްތިހާދުގެ މޮރޮކޯ ފޯވާޑް އަބްދުއް ރައްޒާގު ހަމްދުﷲ ހަދާފައިވާ ރެކޯޑާއި އަރާ ހަމަކުރެވޭނެއެވެ.

މީގެ އިތުރުން މިސީޒަނުގައި މިދެޓީމު މިހާތަނަށް ހަތަރު ފަހަރެއްގެމަތިން ވާދަކޮށްފައިވާއިރު، އޭގެ ތެރެއިން އަލް ހިލާލް ވަނީ ތިން މެޗުން މޮޅުވެފައެވެ.ޱއަދި އަރަބި ކުލަބު ޗެންޕިއަންސް ކަޕްގެ ފައިނަލުގައި ރޮނާލްޑޯގެ ދެލަނޑާއެކު އަލް ނަސްރު މޮޅުވިއިރު، މިދެޓީމު އެންމެ ފަހުން ކުޅުނު ސައުދީ ސުޕަކަޕްގެ ސެމީ ފައިނަލުގައި ރޮނާލްޑޯއަށް ވަނީ ރަތްކާޑު ދައްކާފައެވެ.

ލީގުގައި ކޮންމެ ޓީމަކުން 31 މެޗު ކުޅެފައިވައިރު، އެއްވަނައިގައި އަލް ހިލާލް އޮތީ 89 ޕޮއިންޓާއެކުއެވެ. ދެވަނައިގައި އޮތް އަލް ނަސްރަށް ލިބިފައިވަނީ 77 ޕޮއިންޓެވެ. އަލް ނަސްރުގެ ދަނޑުގައި ކުޅޭ މިމެޗު ފެށުމަށް ހަމަޖެހިފައިވަނީ ރައްޖެގަޑިން 23:00 ގައެވެ.