އިސްލާމީ ވުޒާރާއިން އެކަނިވެސް ކުންފުނިތަކަށް 30 މިލިއަނަށްވުރެ ގިނަ ރުފިޔާ ނުދައްކާ އޮތް: ޝަހީމް
ލިޔުންތެރިޔާ
އަބްދުﷲ ހުސައިން
އަދުގެ ސަރުކާރު ވެރިކަމާ ހަވާލުވިއިރު އިސްލާމިކް މިނިސްޓްރީން އެކަނިވެސް ކުންފުނިތަކަށް 30 މިލިއަނަށްވުރެ ގިނަ ރުފިޔާ ނުދައްކާ އޮތްކަމަށް ވަޒީރު މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ސަރުކާރުން އަމިއްލަ ދިވެހި ކުންފުނިތަކަށް ނުދައްކާ އޮތް ފައިސާ ދެއްކުމާ ގުޅޭގޮތުން އެމްޑީޕީ ސަރުކާރުގެ މާލީ ވަޒީރު އަމީރު އެކަމާ ވާހަކަދެއްކެވުމާ ގުޅިގެން މިނިސްޓަރު ޝަހީމް ކުރެއްވި ޕޯސްޓެއްގައި ވިދާޅުވީ، އަދުގެ ސަރުކާރު ފެށުން އިރު އިސްލާމީ ވުޒާރާގައި އެކަނި ވެސް 30 ވަރަކަށް މިިލިއަން ރުފިޔާ ކުންފުނިތަކަށް ނުދައްކާ އޮތް ކަމަށާއި މަސައްކަތްކޮށްފަ ބިލްތައް ނައިސް ހުރި އަދަދާއެކު ޖުމުލަ 50 މިލިއަން އޮތް ކަމަށެވެ.
ޝަހީމް ވިދާޅުވީ އެ ހުރިހާ ފައިސާއެއް މި ސަރުކާރުން މިދިޔަ އަހަރެއްހާ ދުވަހުގެ ތެރޭގައި ދައްކައި ނިންމާފައިވާ ކަމަށެވެ.
ދިވެހި ވިޔަފާރިތައް މެދުވެރިކޮށް ކުރުވާ ފައިސާނުދީ ހުރި މައްސަލަތައް ހައްލުކޮށް ދެއްވާނެ ކަމުގެ ޔަގީންކަން ދެއްވާ ކުރިއަށްއޮތް 5 ހަފްތާގެ ތެރޭގައި އެކަން ކޮށް ނިންމަވާނޭކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ. އެކަމާ ގުޅިގެން ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެފައިވަނީ ކޮންޓްރެކްޓަރުންނަށް ސަރުކާރުން ދޭންޖެހޭ ފައިސާތައް ބިލިއަނުން ހުރިކަމަށާއި، އެ ފައިސާ ދިނުމުގެ ގާބިލުކަން އަދުގެ ސަރުކާރުގައި ނެތްކަމަށެވެ. އަމީރު ވިދާޅުވެފައިވަނީ ސަރުކާރުން މީގެ ކުރިން އެހެން ބުނިނަމަވެސް އެކަންކަން ކުރެވިފައި ނުވާކަމަށެވެ.
ރައީސް ޑރ.މުހައްމަދު މުއިއްޒު އިއްޔެ ވިދާޅުވެފައިވަނީ 2023 ވަނަ އަހަރުގެ ނޮވެމްބަރުމަހުގެ 17 ވަނަ ދުވަހު ސަރުކާރު ހިންގުމާ އެމަނިކުފާނު ހަވާލުވެވަޑައިގެންނެވިއިރު ދިވެހި ވިޔަފާރިތައް މެދުވެރިކޮށް ކުރުވާ ފައިސާނުދީ ހުރި އެތައްހާސް ބިލުތައް ހިމެނޭހެން، ދިވެހި ސަރުކާރަށާއި ސަރުކާރު ހިއްސާވާ ކުންފުނިތަކަށް، ގާނޫނުތަކާއި ގަވާއިދުތަކުގައި ކަނޑައަޅާފައިވާ އުސޫލުތަކާ އެއްގޮތްވާ ގޮތުގެ މަތީން ހުށަހަޅާފައިވާ އެންމެހައި ބިލުތަކަށް އަދާކުރަންޖެހޭ ފައިސާ، ކުރިޔަށް އޮތް ފަސް ހަފްތާ ތެރޭ ދައްކާ ނިމޭނެ ކަމަށެވެ.
އެމަނިކުފާނު ވިދާޅުވީ ފުން އަނދަވަޅެއްގައި އޭރު އޮތް ދިވެހި އިގްތިސާދު ނަގާ ކޮޅަށް ޖެހުމުގައި ކުރެވެމުންދާ މަސަައްކަތުގެ ތެރެއިން މީ ހާސިލްކުރެވޭ ވަރަށް ބޮޑު ކާމިޔާބިއެއް ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
