ނޫސްވެރިއަކު ކުރި ޓްވީޓަކާއި ގުޅިގެން ފުލުހަށް ހާޒިރުކޮށްފި

ނޫސްވެރިއަކު ކުރި ޓްވީޓަކާއި ގުޅިގެން ފުލުހަށް ހާޒިރުކޮށް ބަޔާން ނަގައިފިއެވެ.

މިއަދުގެ ވަގުތެއްގައި އައްޑޫސިޓީގެ ހިތަދޫ ޕޮލިސް ސްޓޭޝަނަށް ހާޒިރުކޮށް ބަޔާން ނަގާފައިވަނީ "ދިޔަރެސް" ނޫހުގައި ހަރަކާތްތެރިވާ ފަރާތެއްކަމުގައިވާ އަހުމަދު އަޒާނެވެ. އަޒާނަކީ ސޯޝަލް މީޑިޔާގައި ހަރަކާތްތެރިވާ އެކްޓިވިސްޓެއްކަންވެސް ފާހަގަކޮށްލެވެއެވެ.

އަޒާން ހާޒިރުކޮށްފައިވަނީ ގިނަ އަދަދެއްގެ އިލްމުވެރިންތަކެއް ހައްޔަރުކުރަން އުޅޭކަމަށްބުނެ، މައުލޫމާތު ލިބިފައިވާކަމަށް ޓްވީޓްކުރުމާއި ގުޅިގެންނެވެ.

މިކަމާއި ގުޅިގެން ވޮއިސްއަށް މައުލޫމާތުދެމުން އަޒާން ބުނީ އޭނާ ހާޒިރުކުރުމަށްފަހު އެފަދަ ޓްވީޓްތައް ނުކުރުމަށް ނަސޭހަތްތެރިވެފައިވާ ކަމަށެވެ. އަދި ނަސޭހަތްދިން ލިޔުމުގައި ސޮއިކުރަން އެދުމުން، އޭގެ ކޮޕީއެއް ދިނުމުން ސޮއިކުރާނެކަމަށް ބުނުމުން ޓްވީޓްކޮށްފާނެކަމަށް ބުނެ ފުލުހުން އެ ލިޔުން ދީފައި ނުވާކަމަށް އަޒާން ބުންޏެވެ.

އެހެންކަމުން ނަސޭހަތްދިން ލިޔުުމުގައި އޭނާ ސޮއިކޮށްފައި ނުވާނެކަމަށްވެސް ވަނީ ބުނެފައެވެ.