ދައުލަތުގެ ރިކަރަންޓް ހަރަދުތައް އަންނަނީ ދަށްވަމުން: ފިނޭންސް

މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ދައުލަތުގެ ރިކަރަންޓް ހަރަދުތައް ދަށަށް ގޮސްފައިވާކަމަށް ފިނޭން މިނިސްޓްރީން ބުނެފިއެވެ.

ފިނޭންސް މިނިސްޓްރީން ނެރެ އާއްމުކޮށްފައިވާ ދައުލަތުގެ ހަރަދު ބަރަދު ހުރިގޮތް ދައްކުވައިދޭ ތަފާސްހިސާބުތަކަށް ބަލައިރު، މިދިޔަ އަހަރާ އަޅާބަލާއިރު، މިއަހަރުގެ މިހާތަނަށް ދައުލަތުން ކުރި ހަރަދުތައް ވަނީ 20 އިންސައްތަ ދަށަށްގޮސްފައެވެ. މިހިނގާ މެއިމަހުގެ 15 ވަނަ ދުވަހުގެ ނިޔަލަށް 12.9 ބިލިއަން ރުފިޔާ ޚަރަދުކޮށްފައިވާއިރު، މިދިޔަ އަހަރުގެ އެ މުއްދަތުގެ ތެރޭގައި ޚަރަދުކޮށްފައިވަނީ 16.2 ބިލިއަން ރުފިޔާއެވެ.

ތަފާސްހިސާބުތަކަށް ބަލާއިރު، ދައުލަތުގެ ބަޖެޓުން މިހިނގާ މެއިމަހުގެ 15 ވަނަ ދުވަހުގެ ނިޔަލަށް ރިކަރަންޓް ޚަރަދުގެ ގޮތުގައި 11.8 ބިލިއަން ރުފިޔާ ހޭދަކޮށްފައިވެއެވެ. މިއީ ނިމިގެންދިޔަ އަހަރުގެ މި މުއްދަތުގެ ތެރޭގައި ރިކަރަންޓް ޚަރަދުގެ ގޮތުގައި ރެކޯޑްކޮށްފައިވާ މިންވަރަށްވުރެ 4.5 އިންސައްތަ ދަށް ޢަދަދެކެވެ.

އަހަރުެގ މިހާތަނަށް ދައުލަތުގެ ރިކަރަންޓް ޚަރަދުގެ ގޮތުގައި ރިކޯޑްކޮށްފައިވާ ޖުމުލަ ޢަދަދުގެ ތެރެއިން 59.2 އިންސައްތަ ހޭދަކޮށްފައިވަނީ، ދައުލަތުގެ އޮފީސްތަކުގެ އިދާރީ ހިންގުމާ ގުޅޭ ޚަރަދުތަކެވެ. އެގޮތުން، އޮފީސް ހިންގުމަށް ބޭނުންވާ ތަކެއްޗަށް ދައުލަތުގެ ބަޖެޓުން ހޭދަކޮށްފައިވާ ޚަރަދު، ނިމިގެންދިޔަ އަހަރާ އަޅައިބަލާއިރު 71.7 އިންސައްތައިން ދަށްވެ، އިދާރީ ހިންގުމުގެ ޚަރަދުގެ ގޮތުގައި މިއަހަރުގެ މިހާތަނަށް 7.0 ބިލިއަން ރުފިޔާ ވަނީ ހޭދަކޮށްފައެވެ. މިއީ މިދިޔަ އަހަރުގެ މި މުއްދަތުގެ ތެރޭގައި ހިނގާފައިވާ ޚަރަދަށްވުރެ 10.0 އިންސައްތަ ދަށް ޢަދަދެއްކަމަށް ފިނޭންސުގެ ތަފާސްހިސާބުތަކުން ދައްކައެވެ.

ސަރުކާރުގެ ރިކަރަންޓް ހަރަދުތައް ދަށަށްދާން ފަށާފައިމިވަނީ ހަރަދުތައް ކުޑަކުރުމަށް ފިޔަވަޅުތަކެއް އެޅުމަށް ނިންމައި އެކަންކަން ތަންފީޒުކުރަން ފަށާފައިވަނިކޮށްކަން ފާހަގަކޮށްލެވެއވެެ.