މަރުގެ ހުކުމް ތަންފީޒުކުރުމާއި ބެހޭގޮތުން ހޯމް މިނިސްޓަރާއި ސުވާލުކުރަނީ

ދިވެހިރާއްޖޭގައި މަރުގެ ހުކުމް ތަންފީޒުކުރުމާއި ބެހޭގޮތުން ހޯމް މިނިސްޓަރ އައްޝައިޚް އިމްރާން އަބްދުﷲ އާއި ސުވާލުކުރުމަށް މަހިބަދޫ ދާއިރާގެ މެންބަރު އަހުމަދު ތޯރިގު މަޖިލީހަށް ހުށައަޅުއްވައިފިއެވެ.

މިނިސްޓަރ އިމްރާން ތޯރިގާއި ސުވާލުކުރުމަށް ހުށައަޅުއްވާފައިވަނީ ދިވެހިރާއްޖޭގައި މަރުގެ ހުކުމް ތަންފީޒުނުކުރާނެކަަމަށް ރައީސް އޮފީހުގެ މިނިސްޓަރ މުހައްމަދު ނަސީމް އދ.ގެ ކޮމެޓީ އެގެންސްޓް ޓޯޗަރގައި ވިދާޅުވެފައިވުމުން، މަރުގެ ހުކުމް ތަންފީޒުކުރުމާއި މެދު މި ސަރުކާރުގެ ސިޔާސަތަކީ ކޮބައިކަން އޮޅުން ފިލުވުމަށެވެ.

ތޯރިގު އިތުރަށް ވިދާޅުވީ ގާނޫނު އަސާސީގެ 10 ވަނަ މާއްދާގައި ރާއްޖޭގެ ގާނޫނުގެ މައިގަނޑު މަސްދަރަކީ އިސްލާމްދީން ކަމަށް ބަޔާންކޮށްފައިވާކަމަށާއި އިސްލާމްދީނުގެ މަސްދަރަކާއި ޚިލާފުވާ އެއްވެސް ގާނޫނެއް ރާއްޖޭގައި ނެހެދޭނެކަމަށެވެ.

ފާހަގަކޮށްލެވޭ ގޮތުގައި ކޮމެޓީ އެގެއިންސްޓް ޓޯޗަރގައި ނަސީމް މި ވިދާޅުވި ބަސްފުޅާއި ގުޅިގެން ދިވެހި ސަރުކާރުން ވަނީ މަރުގެ ހުކުމް ތަންފީޒުކުރުމާއި މެދު ދިވެހިރާއްޖޭގެ ސިޔާސަތު ބަދަލުނުވާކަން ހާމަކޮށްފައެވެ. އެގޮތުން "މޮރޮޓޯރިއަމް އޮން ދަ ޔޫސް އޮފް ދަ ޑެތް ޕެނެލްޓީ" (މަރުގެ ހުކުމް ތަންފީޒުކުރުން ހުއްޓުވުން) ރެޒޮލޫޝަނާ ދެކޮޅަށް ރާއްޖެއިން ވަނީ ވޯޓުދީފައެވެ.

އދ.ގެ އާންމު މަޖިލީހުގައި މިނެގުނު ވޯޓުގައި ރާއްޖެއިން ވޯޓުދިން ގޮތް ތަފްސީލްކޮށްދީ، ދިވެހިރާއްޖެއިން އޭރު އދ.އަށް ކަނޑައަޅުއްވާފައި ހުންނަވާ ދާއިމީ މަންދޫބު ޑރ.އަލީ ނަސީީރު ވަނީ ވާހަކަފުޅުވެސް ދައްކަވާފައެވެ.

ރ. އަލީ ނަސީރު މުޙައްމަދު ވިދާޅުވިގޮތުގައި، 2014 ވަނަ އަހަރު ވުޖޫދަށްއައި އައު ޤާނޫނުލްޢުޤޫބާތުގައި، ކަނޑައެޅޭ ވަކި ހާލަތްތަކެއްގައި އަދަބެއްގެ ގޮތުން މަރުގެ ހުކުމް ދެވޭނެކަމަށް ބަޔާންކޮށްފައިވާކަމާއި، އެހެންކަމުން އިސްލާމީ ޝަރީޢަތާ އެއްގޮތަށް އެހުކުމް ތަންފީޒުކުރަން ޖެހޭކަމަށެވެ.

ދިވެހިރާއްޖޭގައި މަރުގެ ހުކުމް ތަންފީޒުނުކުރާތާ 60 އަހަރު ވެފައިވާކަން ފާހަގަކުރައްވާ، އެންމެ ފަހުން މަރުގެ ހުކުމް ތަންފީޒުކޮށްފައިވަނީ 1954 ގައި ކަމަށްވެސް ޑރ.އަލީ ނަސީރު ވިދާޅުވިއެވެ.

މީގެ އިތުރުން، ވަކިފަރާތަކަށް ނުޖެހޭ، މިނިވަން، އަދި ރައްޔިތުންގެ އިތުބާރާއި ޔަޤީންކަން ލިބިފައިވާ ތަނަކަށް އަދުލު އިންސާފު ޤާއިމްކުރުމުގެ ދާއިރާ ހެދުމަށް، އެދާއިރާ މުޅީން އިސްލާހުކޮށް، ވަރުގަދަކުރުމަށްޓަކައި ކުރަންޖެހޭ މަސައްކަތް ކުރާނެކަމުގެ ޔަޤީންކަންވެސް ދިވެހިރާއްޖެއިން ވަނީ ދީފައެވެ. އަދި ދިވެހިރާއްޖޭގެ އަދުލު އިންސާފު ޤާއިމްކުރުމުގެ ދާއިރާއަށް ރައްޔިތުންގެ ފުރިހަމަ އިތުބާރާއި ޔަޤީންކަން ލިބެންދެން، ދިވެހިރާއްޖެއިން މަރުގެ ހުކުމް ތަންފީޒު ނުކުރާނެ ކަންވެސް ވަނީ ހާމަކޮށްފައެވެ.