ހުޅުމާލޭގައި އަޅާ ކަންނެލި ޕެކިންގ ފެސިލިޓީގެ މަސައްކަތް މި އަހަރު ފަށައި އަންނަ އަހަރު ނިންމާލެވޭނެ: ޝިޔާމް

ހުޅުމާލޭގައި އެޅުމަށް މަސައްކަތް ކުރަމުންދާ ކަންނެލި ޕެކިންގ ފެލިޓީގެ މަސައްކަތް މި އަހަރުގެ މެދު ތެރޭގައި، ފެށިގެންދާނެ ކަމަށާ، އަދި އަންނަ އަހަރުގެ ތެރޭގައި ނިންމާލެވޭނެ ކަމަށް މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ވަނީ، ރައީސް ޑރ މުހައްމަދު މުޢިއްޒުގެ ވައުދުފުޅާ އެއްގޮތަށް ބޮޑު ކަންނެލީގެ އަގު 80 ރުފިޔާ އާއި 100 ރުފިޔާއާ ދެމެދަށް މަތި ކުރެވޭނީ ކޮން އިރަކުންތޯ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ބޮޑު ކަންނެލީގެ މަސްވެރިކަން ކުރާ ފަރާތްތަކަށް ބޭނުންވާ ހައްލެއް ހޯދައިދިނުމުގެ މަސައްކަތް މި ސަރުކާރުން ފަށާފައިވާ ކަމަށެވެ.

ކަނޑުއޮތް ގިރި އަކީ ބޮޑުކަންނެލީގެ މަސްވެރިކަން ކުރާ ފަރާތްތަކަށް ސޮލޮޔުޝަނެއް ދިނުމަށްޓަކައި ހުރިހާ ސަރުކާރަކުންވެސް މަސައްކަތް ކުރަމުންދިޔަ ބަނދަރެއް. އެހެން ނަމަވެސް އެ ބަދަރަކީ ހައްލު ނުލިބި އޮތް ބަނދަރެއް. މި ސަރުކާރުން ރައީސް މި ނިންމެވީ އަމާން ބަނދަރަކަށް ބޮޑުކަންނެލި ކިރުމަށް. އެއީ ހުޅުމާލޭ ބަނދަރު. ހުޅުމާލޭ ބަނދަރުގައި އެންމެ މަގަތުން އެ އޮތީ 25000 އަކަފޫޓުގެ ޖާގައެއް ބޮޑު ކަންނެލީ މަސްވެރިނަށް މަސް ޕެކް ކުރުމަށްޓަކައި، ކަނޑައެޅިފައި.

މަސްވެރިކަމާބެހޭ ވަޒީރު އަޙްމަދު ޝިޔާމް.

ޝިޔާމް ވިދާޅުވީ، ހުޅުމާލޭގައި އަޅަން ނިންމާފައިވާ ކަންނެލި ޕެކިންގ ފެސިލިޓީއަށް ބޭނުންވާ ފައިސާވެސް މިހާރު ހަމަޖެހިފައިވާ ކަމަށެވެ. އެ މަޝްރޫއު ނިމުން، ބޭނުން އަގެއްގައި ކަންނެލި ގަތުމުގެ ފުރުސަތު ލިބިގެންދާނެ ކަމަށް ޝިޔާމް ވިދާޅުވިއެވެ.

ޝިޔާމްގެ ވާހަކައާއި ގުޅިގެން ގަލޮޅު ދެކުނު ދާއިރާގެ މެންބަރު މުހައްމަދު އިބްރާޙީމް (ކުޑޫ) ވަނީ، ކަންނެލި ޕެކިން ފެސިލިޓީގެ މަސައްކަތް ފެށި އަދި އެކަން ނިމޭނެ އިރަކާއި ގުޅޭގޮތުން ވަޒީރާ ސުވާލު ކުރައްވާފައެވެ.

"އިރާދަކުރެއްވިއްޔާ ކުރިއަށްއޮތް ދެ މަހެއްގެ ތެރޭގައި އަޅުގަނޑުމެން އިއުލާންކުރާނަން. އިއުލާންކޮށް މަސައްކަތް އަޅުގަނޑުމެން މި އަންދާޒާކުރަނީ މިއަހަރުގެ މެދުތެރޭގައި މަސައްކަތް ފެށިގެންދާނެކަމަށް. މިއީ އެހާ ބޮޑު ފެސިލިޓީއަކަށް ނުވާތީވެ އަޅުގަނޑުމެން މި އަންދާޒާކުރަނީ މިއަންނަ އަހަރުގެ މެދުތެރެއަށް މި މަސައްކަތް ނިންމާލެވޭނެކަމަށް. އެހިސާބުން ފެށިގެން އިރާދަކުރެއްވިއްޔާ ކަންނެލި މަސްވެރިންނަށް މިއޮތް ގޮންޖެހުމަށް ވަރަށް ބޮޑު ހައްލެއް މި ލިބިގެންދިޔައީ".

މަސްވެރިކަމާބެހޭ ވަޒީރު އަޙްމަދު ޝިޔާމް.

މިއާއެކު ޝިޔާމް ވިދާޅުވީ، ބޮޑުކަންނެލީގެ މަސްވެރިކަން ކުރާ ފަރާތްތަކުގެ އޮތީ މައިގަނޑު ދެ ކަނބޮޑުވުމެއްކަމަށެވެ.

އެއީ ތެޔޮ އެސްޓީއޯގެ ރޭޓުން ތެޔޮ ނުލިބޭ ނުލިބުމާއި، ޕެކް ކުރާނެ ފެސިލިޓީއެއް ނެތުންކަމަށެވެ. އަދި މިދިޔަ އަހަރުގެ ޖުލައި މަހުގެ ތެރޭގައި އެސްޓީއޯގެ ރޭޓުން ކަންނެލި މަސްވެރިކަން ކުރާ ފަރާތްތަކަށް ތެޔޮ ލިބޭނެގޮތް ހަމަޖައްސަވައިދެއްވައި އެތަނުން އެއް ކަންބޮޑުވުމަށް ނިމުމެއް ގެނެސްދެއްވާފައިވާއިރު، ހުޅުމާލޭގައި އަޅަން ނިންމާފައިވާ ޕެކިން ފެސިލިޓީ ނިމުމުން ކަންނެލި މަސްވެރިކަން ކުރާ ފަރާތްތަކުގެ އަނެއް ކަންބޮޑުވުމަށްވެސް ހައްލު ލިބިގެންދާނެކަމަށް ވަޒީރު ވިދާޅުވިއެވެ.