ރައީސް މައުމޫން ބޭނުންފުޅު ނުވިނަމަ، ރާއްޖެއަށް ޑިމޮކްރަސީ ނުގެނެވުނީސް: ޤާސިމް
ލިޔުންތެރިޔާ
އަބްދުﷲ ހުސައިން
ރައީސް މައުމޫން ބޭނުންފުޅު ނުވިނަމަ ރާއްޖެއަށް ޑިމޮކްރަސީ ނުގެނެވުނީސްކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާޙީމް ވިދާޅުވެއްޖެއެވެ.
ޤާސިމް އިބްރާހީމްގެ ބަޔޯގްރަފީ ނެރުމުގެ ހަފްލާގައި, ހަޔާތުގައި ހިނގާދިޔަ މުހިއްމު ކަންކަމުގެ މައްޗަށް ބައްލަވާލައްވައި ވާހަކަދައްކަވަމުން ޤާސިމް ވިދާޅުވީ، ރާއްޖެ މިއަދު މިދެކޭ ޑިމޮކްރަސީގެ ހައްޤުވެރި ފަރާތަކީ ރައީސް މައުމޫނުކަމަށެވެ. ޤާސިމް ވިދާޅުވީ ރާއްޖެއަށް އިސްލާހީ މަސައްކަތްތައް ގެނައުމަށް ކުރި ދަތުރުގައި ރައީސް މައުމޫނުގެ ވެރިކަމުގައި ޖަލުގައި ހައްޔަރުވެ ހުންނަން ޖެހުނުނަމަވެސް އެއީ އަނިޔާއެއްކަމަށް ނުބަލާކަމަށާއި، އެކަން ސިފަކުރަނީ މުސްތަޤްބަލް އުޖާލާކުރުމަށްޓަކައި ލިބުނު ދަރުހެއްގެ ގޮތުގައި ކަމަށެވެ.
ކޮންމެ މީހަކު ކޮންމެ އެއްޗެކޭ ކީ ނަމަވެސް މައުމޫނަކީ ޑިކްޓޭޓަރު ނުވަތަ ހުދުމުހުތާރު ވެރިއެއްކަމަކަށް ޤަބޫލުފުޅު ނުކުރައްވާ ކަމަށާއި، ރާއްޖެއަށް ޑިމޮކްރަސީ ލިބުނީ އެމަނިކުފާނު ބޭނުންފުޅުވެގެން ކުރެއްވި މަސައްކަތުންކަމަށް ޤާސިމް ވިދާޅުވިއެވެ.
ޤާސިމް ވިދާޅުވީ، މިއަދު މިދެކޭ ޒަމާނީ ޑިމޮކްރަސީ އާއި އަސާސީ ހައްޤުތަކާއި މިނިވަންކަން ލިބުމުގައި ރައީސް މައުމޫނާއި އެމަނިކުފާނުގެ ސަރުކާރުން އެކަންއޭރު ކޮށްދެއްވަން ނެތްނަމަ ޑިމޮކްރަސީ މިއަދުވެސް ނުލިބުނީސްކަމަށެވެ.
އަޅުގަނޑު މިއީ އެމަސައްކަތުގައި އެންމެ އިސްކޮށް ހުރި މީހާ. ފައިނޭންސް ދާއިރާގައިކަމަށް ވިއަސް، އެމްއެމްއޭގައި ކަމަށްވިއަސް، އަދި ރައްޔިތުންގެ ހާއްސަ މަޖިލީހުގައި ކަމަށް ވިއަސް. އެހެންވީމަ ވަރަށް ސާބިތުކަމާއެކު މިދަންނަވަނީ މައުމޫނު އެކަންކޮށްދެއްވަން ނެތްނަމަ ދިވެހިރާއްޖެއަކަށް މިއަދު މިދެކޭ ޑިމޮކްރަސީ އަޅުގަނޑުމެންނަކަށް ނުގެނެވޭނެ. އެއީ ލާހިކުކަމެއްނޫން
ޤާސިމް ވިދާޅުވިއެވެ
ޤާސިމް ވިދާޅުވީ ރައީސް މައުމޫން ނެރުއްވި އިސްލާހީ އެޖެންޑާގައި ނެތް ކަމެއް މިއަދަކު ވަކި ކުރެވިފައިނެތް ކަމަށާއި، މިނިވަންކަމާއެކު ބަހުސް ކުރަން ފެށުނީވެސް އޭގެ ދަށުން ކަމަށެވެ. ޤާސިމް ވިދާޅުވީ މިއަދު މިދެކޭ ޑިމޮކްރަސިއާ އަސާސީ ހައްޤުތަކާއި، މިނިވަންކަން ލިބުމުގައި ރައީސް މައުމޫނާއި އެމަނިކުފާނުގެ ސަރުކާރު އެކަންކޮށްދެއްވަން ނެތްނަމައީ މިއަދު މަގުމަތީގައި ޖެހުނީ ހަޅޭލަވަން ކަމަށާއި، އިސްލާހީ އެޖެންޑާގެ ދަށުން އެމަނިކުފާނު އެ މަސައްކަތް ފެއްޓެވީ އެހާލަތު ޤައުމަށް ބޭނުންވާކަން ވިސްނި ވަޑައިގަންނަވާތީމަމަށް ޤާސިމް ފާހަގަކުރެއްވިއެވެ.
މިމޭރުމުން ވާހަކަދައްކަވަމުން ޤާސިމް ވިދާޅުވީ ރައީސް މައުމޫނަކީ ވަރަށް ވިސްނުންތެރި އިލްމީ ބޭފުޅެއް ކަމަށާއި، ރާއްޖެ ޒަމާނީ ޑިމޮކްރަސީއަށް ގެންގޮސްދިނުމުގައި އެމަނިކުފާނު ކުރެއްވީ ޝުކުރުވެރިވުން ހައްޤު މަސައްކަތެއް ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
