ބިލްތައް ބޮޑުވި ސަބަބު ދެނެގަތުމުގެ މަސައްކަތް ސްޓެލްކޯއިން ފަށަނީ

މާލެ ސަރަހައްދުގެ ގެތަކުގެ ކަރަންޓް ބިލްތައް ބޮޑުވި މައްސަލަ ދެނަގަތުމަށް ބިލްތައް ބޮޑުވިކަމަށް ފާހަގަކުރެވުނު ގެތަކަށް ސްޓެލްކޯގެ ޓީމުތަކުން ދިއުމަށް ނިންމައިފިއެވެ.

ސްޓެލްކޯގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޤައުމީ ކަރަންޓް ކުންފުނި، ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ، ބައެއް ގޭތަކުގެ ބިލްތައް ބޮޑުވުމުގެ ކަންބޮޑުވުން ރައްޔިތުން ފާޅުކުރަމުންދާކަމަށާއި އެކަން އެ ވީގޮތް ދެނެގަތުމުގެ މަސައްކަތް ސްޓެލްކޯއިން ފެށުމަށް ނިންމާފައިވާކަމަށެވެ. ފަހުމީ ވިދާޅުވީ އެންމެފަހުގެ ކަރަންޓްބިލް، އޭގެކުރީ މަހާ އަޅާބަލާއިރު ކުޑަކަމަށާއި، އެގޮތުން މާލޭގެ ގެތަކުގެ ކަރަންޓްބިލްތައްކުގެ 94 އިންސައްތަ މިމަހު ކުޑަކަން ފާހަގަކުރެވޭ ކަމަށެވެ.

މާލެއަށްވުރެ ހުޅުމާލޭގެ އެޕާޓްމަންޓްތަކުގެ ކަރަންޓްބިލްތައް ބޮޑުކަން ފާހަގަކުރެވޭ ކަމަށާއި މިގޮތުން މާލޭގެ 6 އިންސައްތަ ބިލްތައް އިންތިހާއަށް ބޮޑުއިރު، ހުޅުމާލެސިޓީ 15 އިންސައްތަ ބިލްތައް ބޮޑުކަން ފާހަގަކުރެވޭކަމަށް ފަހުމީ ވިދާޅުވިއެވެ. ފަހުމީ ވިދާޅުވީ އިންތިހާއަށް ބޮޑުވި ކަރަންޓްބިލްތަކުގެ އެ ތަފްސީލް ސްޓެލްކޯގެ އިތުރުން ރައްޔިތުންނަށްވެސް އެނގެންޖެހޭ ކަމަށެވެ.

އެ އެޕާޓްމަންޓްތަކަށް ވިޒިޓްކޮށްފަ އެނަޖީ އޮޑިޓެއް ކުރުމަށް އަޅުގަނޑުމެން މި ނިންމީ. ތަންތަނުގެ ހާލަތު ބަލައިގަނެ އެތަންތަނުގައި ބޭނުންކުރަނީ ކޮންކަހަލަ އާލަތްތަކެއްތޯ އެއާކޮންޑިޝަންތަކެއްތޯ އަދި ބޭނުންކުރާ ޖުމްލަ އެޕާޓްމަންޓްތަކުގެ އިންޝިއުލޭޝަންހުރީ ކިހިނެތްތޯ ބަލައި ކަސްޓަމަރުންނަށް ބޭނުންވަނީ އެ މައުލޫމާތުތައް ފޯރުކޮށްދިނުމަށް. އޭރުން އެބޭފުޅުންނަށްވެސް މަގުފަހިވާނެ ކަރަންޓް އިގްތިސާދުކުރުމަށް ކުރެވިދާނެ ކަންތައްތަކެއް ބަލައި ފިޔަވަޅުތައް އަޅަން

ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވިއެވެ.

ފަހުމީ ވިދާޅުވީ ބިލްކުރުމުގައި އެއްވެސް އޮޅުވާލުމެއް ނޯންނާނެ ކަމަށާއި، އެ ޔަގީންކަން ރައްޔިތުންނަށް ދޭކަމަށެވެ. މިގޮތުން އެކަންކަމާ ގުޅިގެން ސާފްކުރަން ބޭނުންވާ ކަމެއް އޮތްނަމަ އެކަމުގެ ފުރިހަމަ އެއްބާރުލުން ސްޓެލްކޯއިން ދޭނޭަކަމަށްވެސް ފަހުމީ ވިދާޅުވިއެވެ.

ބިލްތަކާ ގުޅޭގޮތުން ކަސްޓަމަރުންގެ އެ ހުންނަ ކަންބޮޑުވުންތައް ކުޑަކުރުމަށް ކުރިއަށްއޮތްތަނުގައި ބައެއް ކަންކަން ކުރެއްވުމަށް ނިންމަވާފައިވާކަންވެސް ފަހުމީ ވަނީ ވިދާޅުވެފައެވެ. މިގޮތުން ބިލްތައްޔާރުކުރުމަށްފަހު ވަގުތުން ކަސްޓަމަރުންނަށް ބިލް ދިނުމުގެ އުސޫލެއް ގާއިމްކުރައްވާނޭކަމަށާއި، އޭރުން ކަސްޓަމަރުންނަށް ބައެއް ކަންކަމުގައި ޔަގީންކަމެއް ލިބިގެންދާނޭކަން އެމްޑީ ވަނީ ފާހަގަ ކުރައްވާފައެވެ.